7
Tôiq Ngang Dù Da Ep-ra-im
1 “Jò Au broq brêh ca Is-ra-ên,
èh tôiq lôi da Ep-ra-im
wa bìac ngang dù da Sa-ma-ri jah patô loh ro rang,
taiq wì haq khoi broq trong amòng;
mangai atùng mùt enh trom,
mangai tablah jêh raliang enh gùng.
2 Wì haq ùh hèm ta manoh Au jah hmàng rìm
bìac dù da wì haq.
Manàiq bìac dù wì haq
'ban 'bua wì haq ŏi jang ngìa Au.
3 “Wì haq yŏc dèh bìac dù broq lem manoh bùa,
yŏc dèh trong amòng broq lem manoh 'bài cwan.
4 Dìq dŏng wì haq tango anang,
tìah ca ùnh khàng ta tanùh phiang 'benh,
'nhac ca mangai phiang 'benh khoi hêq
ca trùt ùnh enh jò wàt dàc trùh jò dàc bôq.
5 Ta hì lem bùi da bùa bèn tŏc broq bùa,
'bài cwan bù alac nho loh ca ùh hrŏc;
bùa lem bùi rùp tì ca 'bài mangai loq jù lê.
6 Manoh wì haq bình halùih trong tình,
tìah ca ùnh khàng dêh ta tanùh;
mangai phiang 'benh cùi hliac 'ngah ca mang
mahaq trùh daxroq ùnh xôq ŏi cheo dêh.
7 Dìq dŏng wì haq tôq tìah ca tanùh ùnh,
lŏn apom dèh 'bài cwan.
Dìq dŏng 'bài bùa wì haq loh ca raliang,
mahaq ùh i cabô ta wì haq creo dang Au.
8 “Ep-ra-im alôn ti 'bài jàn 'noiq;
Ep-ra-im tìah ca 'benh phiang 'nhòq blàq.
9 'Bài jàn Diac 'noiq khoi lŏn padren haq,
ma cla haq ùh 'nì!
Xàc gàu haq khoi co tang nòi,
ma cla haq ùh loq!
10 Bìac catèh da Is-ra-ên patô hlài da haq;
'nhac ca wì haq glàm bìac 'màng aih
mahaq xôq ùh wìh hlài dèh ta Chuaq Boc Plình,
wa hadai ùh chaq Haq!
11 “Ep-ra-im tìah ca chìm trù blùng,
ùh i ca manoh rabiaq,
taiq haq creo dang Aicàp wa A-si-ri.
12 Jò wì haq 'nang loh lam ta aih, Au tang hlàm ca wì haq.
Au broq ca wì haq taclìh tìah ca chìm taclìh;
Au baxa wì haq
tiaq troi bàu khoi anoi 'noh ca tagop wì haq.
13 Nan xa ca wì haq,
taiq wì haq khoi cađac Au;
can raliang hech ta-ùc ta wì haq,
taiq wì haq khoi broq tôiq tajraq hlài ca Au.
'Nhac ca Au enh dèch wì haq,
mahaq wì haq capoch amòng tajraq hlài ca Au.
14 Wì haq ùh dìq ca manoh
đòiq creo dang ca Au jò wì haq hràng rayoih dèh ta jùang;
wì haq gop yŏc 'mau wa alac nho neo ca dađeh
wa tajraq hlài ca Au.
15 Au raq khoi hnài wì haq, khoi broq dêh ca tì wì haq,
'nhac ca 'màng aih, wì haq xôq chaq trong dù tajraq ca Au.
16 Wì haq tawìh tiaq bìac ma dech 'ngwan.
Wì haq tìah ca panenh khoi tagùt tagech.
Cwan wì haq tacro ca pla chang,
ma jah 'màng aih taiq rapet wì haq hloh bàu padèch.
Wì haq wìa broq do
ca mangai Aicàp.”