6
Jàn Padreo Hlài Bàu Lech Ca Boc Plình
1 “Trùh beq, bèn wìh hlài ta Chuaq;
taiq Haq khoi hich bèn,
mahaq Haq khoi broq brêh ca bèn;
Haq jêh bèn,
mahaq Haq khoi càt hlài habau bèn.
2 Ta baiq hì, Haq broq brêh ca bèn;
hì piq Haq dèch bèn yòng;
bèn jah rìh ŏi jang ngìa Haq.
3 Bèn khòh canao loq ca Chuaq;
wa phai dìq dèh padren canao loq ca Haq beq.
Haq jah trùh ta bèn,
bìac aih joq 'nàng tìah ca mat mahì tŏc jò daxroq,
Haq trùh ta bèn
tìah ca mè pùc taneh jò padrang.”
4 “Ô Ep-ra-im! Au broq 'màng leq ca ìh cô èh?
Au broq 'màng leq ca ìh cô èh ô Juđa?
Taiq manoh loq waq da pì tìah ca yùc daxroq,
tìah ca diac ngom jò ŏi xrŏih.
5 Taiq 'màng aih Au khoi pŏt pì tang pŏt nhò bàu mangai capoch thai Boc Plình;
Au khoi jêh wì haq xam bàu loh enh hacùng Au.
Bìac hadrah da Au plôh loh tìah ca can 'ngah.
6 Ma jah 'màng aih Au enh ca bìac loq wèq dèh bàu thai ca ngè tadreo,
bìac canao loq ca Boc Plình yi hnao ca ngè tadreo bùh.
7 Mahaq 'màng ca Ađam, wì haq khoi broq tôiq ca bàu wêh jao,
ŏi ta aih wì haq khoi blàq Au.
8 Ga-la-at aih phôq da 'bài mangai dù,
ti trong bình ca teo mahem.
9 'Bài pajàu tìah ca mangai atùng gòm rap jêh mangai lam cwa ti trong,
wì haq jêh đac mangai lam ta Sichem;
wì haq broq bàc tôiq dù!
10 Ta hnem Is-ra-ên, Au khoi hnoq bìac ramòt,
ta aih Ep-ra-im khoi broq tôiq tango anang,
Is-ra-ên loh ca amùa.
11 “Ìh hadai ô Juđa,
Au khoi padon jò gat ca ìh,
jò Au ha'naoq hlài bìac xôq ramŏt ca jàn Au.”