5
Boc Plình Lech Jàn Is-ra-ên Taiq Wì Cađac Tiaq Trong Haq
1 “Ô 'bài pajàu, tamàng bìac cô beq!
Ô mangai wèq cwìang da Is-ra-ên khòh hamang oq!
Ô mangai ta hnem bùa halang don tamàng beq!
Bìac hadrah khoi trùh tajraq hlài ca pì,
taiq pì khoi 'nong jàn 'bìq hlech hlàm taiq bìac
cùh waiq dua 'mù ta Mitba wa Tabô.
2 Wì haq khoi tablàq ca Au wa khoi mùt can rìh ùh hruah,
taiq 'màng aih Au baxa dìq dŏng wì haq.
3 Au loq ca Ep-ra-im,
Is-ra-ên hadai ùh jah cadoc ca Au.
Ep-ra-im khoi broq tôiq tango anang!
Is-ra-ên loh ca amùa!
4 “Bìac broq da wì haq tàt khech cla wì haq wìh
hlài ta Boc Plình;
taiq manoh enh toq tango anang da wì haq,
'màng aih wì haq ùh canao ca Chuaq.
5 Bìac loq catèh da Is-ra-ên khoi takìan hlài cla haq,
Is-ra-ên wa Ep-ra-im tacro dèh ta tôiq lôi;
Juđa hadai tacro ti wì haq.
6 Wì haq lam dèh ti 'bài calùh trìu calùh 'bo,
đòiq chaq Chuaq;
mahaq chaq ùh hnoq,
ma jah 'màng aih Chuaq khoi talùi dađeh ca wì haq.
7 Wì haq khoi blàq blènh Chuaq
taiq wì haq khoi xa-ông loh 'bài con caiq tango anang.
Manàiq cô hì khê neo jah lŏn wì haq
wa cùng hang wì haq dìq 'bìq raliang đac!
8 “Hlôi ken ta Ghi-bê-a beq,
hlôi ken ta Rama beq!
Cachech bàu dêh ta Bêt Awen beq!
Ô Bên-ja-min, lình wì ŏi enh crŏng ìh 'mat!”
9 Ta hì baxa,
Ep-ra-im jah loh ca wang wê;
Au khoi anoi 'noh ca hadròng hadrech Is-ra-ên
loq bìac aih jah trùh.
10 'Bài cwan Juđa tìah ca mangai 'nhac acang;
Au jah ùc can nòih au ca wì haq tìah ca ùc diac.
11 Ep-ra-im 'bìq padit padiang,
'bìq bahech đac ta bìac hadrah,
taiq haq khoi cadàu tiaq trong hnài con mangai.
12 Taiq 'màng aih Au broq tìah ca con un ca Ep-ra-im,
wa ca xinoi Juđa au tìah ca ngè bùc hech.
13 “Jò Ep-ra-im khoi loq ca dađeh i 'bình,
wa Juđa khoi loq ca dađeh i habau,
èh Ep-ra-im lam trùh ta mangai A-si-ri,
thê trùh ta bùa Jarep.
Mahaq haq ùh jah broq brêh ca pì,
hadai ùh càt habau pì.
14 Ma jah 'màng aih au tìah ca baco hlari ca Ep-ra-im,
tìah ca baco hlari ŏi thì ca Juđa.
Joq 'nàng Au cap hich hi khoi lam hloi;
Au rùp 'nong ùh i ca cabô jah dŏih.
15 Au lam mùt ta nòi Au ŏi,
trùh jò wì haq canao ca dađeh broq tôiq
wa ti chaq Au.
Ta jò ranàc,
wì haq dìq ca manoh ti chaq Au.”