4
Boc Plình Ta'miaq Ca Diac Is-ra-ên
1 Ô con jàn Is-ra-ên, tamàng bàu da Chuaq beq
ma jah 'màng aih Chuaq ta'mòq tôiq ca jàn gùng cô;
“Taiq ta gùng cô ùh i ca bìac wèq dèh bàu, ùh i ca manoh loq xa-ŏch,
hadai ùh canao loq ca Boc Plình.
2 Ta aih toq hnoq bìac hanip, bìac tacwàiq amòng,
bìac jêh đac mangai, bìac atùng, wa tango anang.
Wì haq broq bìac ngang dù,
mahem ta-ùc enh 'nhèq ca mahem.
3 Taiq 'màng aih, taneh cô jah mango;
mangai jàn ma ŏi ta aih hŏnh manoh,
'bài ngè ta rôm wa chìm ta plình hadai 'màng aih;
ca ta diac raxìq hadai pi i.
4 “ 'Nhac ca 'màng aih, paq i cabô ta'mòq tôiq, paq i cabô lech
taiq jàn ìh tìah ca mangai
rahen ca pajàu Boc Plình.
5 Ìh catŏih tacro jò dahì;
'bài mangai capoch thai Boc Plình hadai catŏih tacro ti ìh jò damang,
wa Au jêh đac miq ìh.
6 Jàn Au 'bìq jêh đac taiq thìuq can 'nì loq ro rang.
“Taiq ìh khoi ùh nhàn yŏc bìac 'nì loq Au,
Au hadai cađac ìh ùh đòiq ìh broq pajàu ca Au hòm;
taiq ìh khoi hèt ca ranenh Boc Plình cla ìh,
Au hadai jah hèt ca con caiq ìh.
7 Wì haq xa-ông loh bàc dàng leq,
èh broq tôiq tablàq hlài ca Au bàc dàng aih;
Au jah halìh bìac 'ngah 'ngai da wì haq loh bìac camaih.
8 Jò jàn 'ràng ngè tadreo ca tôiq lôi, pajàu i dahwèq caq;
'màng aih pajàu bùi.
9 Cô èh, jàn 'màng leq pajàu hadai 'màng aih;
èh Au baxa wì haq taiq bìac broq wì haq,
jêh chao wì haq taiq bìac wì haq broq.
10 “Wì haq caq mahaq ùh panàc,
tango anang mahaq ùh i ca con,
taiq wì haq khoi cađac Chuaq wa pi hèm trùh ca Haq hòm.
11 Bìac tango anang,
bìac ôq alac nho wa alac nho neo,
khoi broq ca jàn Au loh ca blùng.
12 Jàn Au waiq bòch dua 'mù broq xam long,
wa xìn long canhra da pajàu ngan plình anoi 'noh ca wì haq.
Taiq bìac tango anang broq ca wì haq lac trong,
wì haq tango anang wa blàq hlài Boc Plình.
13 Wì haq dèch am ngè tadreo ta bôi wang,
bùh hòi xua thùm ta 'bài go,
ti xèm long rayai, long yùang lìu, long crech,
ma jah 'màng aih i yàp hangèp.
Taiq 'màng aih 'bài con cadrì ìh broq tango anang,
wa 'bài mai da con ìh loh ca tango anang.
14 “Au ùh baxa 'bài con cadrì pì
taiq wì haq broq tôiq tango anang,
hadai ùh baxa mangai cadrì padon ta'nèp pì
taiq tôiq tango anang;
ma jah 'màng aih 'bài mangai calô pì lam ti 'bài gu cadrì tango anang,
wa dèch am ngè tadreo ti gu cadrì tango anang ta hnem cùh waiq.
Taiq 'màng aih jàn leq ùh 'nì loq, èh 'bìq raliang piang.
15 “Ô Is-ra-ên, 'nhac ca ìh khoi broq tôiq tango anang,
mahaq paq đòiq Juđa broq tôiq!
“Paq mùt ta Gingan.
Hadai paq tŏc Bêt Awen,
nòi dua 'mù đòiq yŏc hiniq Chuaq pachac, doi: ‘Nhò hiniq Chuaq ma rìh hloi.’
16 Taiq Is-ra-ên cadoq manoh
tìah ca 'bo adrùh cadoq manoh,
'màng aih Chuaq ma wèq ban wì haq,
ajènh wì haq mùt ta đùng nhat rùng rai tìah ca ban trìu 'mòh?
17 Ep-ra-im cùh waiq dua 'mù,
hi mac da haq beq!
18 Wì ôq bù bia khoi dìq,
èh hi lam tango anang hloi;
mangai wèq wì enh ca bìac 'mèq yi hnao enh waq bìac lem.
19 Cayeo hlôi wì haq tarŏng dìq,
wì haq jah camaih dèh ca ngè tadreo 'ngwan.”