3
Boc Plình 'Noh Đac Mangai Wèq Cwìang
1 Ma jah 'màng aih Chuaq,
Haq Chuaq ma wèq dìq ca 'bình plình,
jah tàt đac dìq ca 'benh
wa diac khoi ca Jê-ru-sa-lem wa Juđa;
2 Mangai tadêh, mangai lình tanuq,
cwan hadrah, mangai capoch thai Boc Plình,
'bài pajàu ngan plình anoi 'noh bìac adroi wa gu craq,
3 Cwan wèq 50 lình, gu craq i 'bang tìang lem,
mangai wiang tah bàu, mangai ragài, wa 'bài pajàu caxoiq.
4 “Au jah am 'bài mangai calô 'yoh hanam tŏc broq cwan wì haq,
wa con 'yoh tŏc wèq cwìang enh 'nhèq ca wì haq.”
5 Jàn racù padit padiang dabau,
mangai cô tajraq hlài ca mangai tau,
mangai haten hatìa tajraq hlài dèh ca mangai haten hatìa;
gu radam rataoq ca mangai craq,
mangai ùh nèn tajraq hlài ca mangai rahù.
6 Jò aih i mangai thê dèh
daq ta hnem baq haq, haq doi:
“Daq i eo cabac enh crŏng, daq pagàu ca bèn beq,
wèq ha'ngùc khoi raliang cô beq.”
7 Ta hì aih, mangai aih tèo hlài doi:
“Ùh, au ùh xài mangai broq brêh,
ma jah 'màng aih ta hnem au ùh i ca 'benh hadai ùh i ca eo;
apaq yŏc au tŏc broq cwan đòiq wèq mangai jàn.”
8 Taiq 'màng aih, Jê-ru-sa-lem hacùp,
Juđa tacro;
taiq bàu capoch wa bìac broq wì haq tajraq hlài ca Chuaq,
wa tablàq ca can 'ngah 'ngai enh ngìa ca Haq.
9 Hadrò wì pa'noh hlài dèh bìac tajraq hlài ca cla wì haq;
Wì haq pa'noh dèh tôiq lôi tìah ca phôq Sôđôm;
wì ùh cadoc toq xìt leq.
Nan xa ca mahua yiang wì haq!
Taiq wì haq khoi 'ràng bìac raliang dèh ca cla wì haq.
10 Doi ca mangai ta-atoq loq, wì haq èh jah xôq ramŏt;
Ma jah 'màng aih wì haq jah caq dèh plì wì haq abroq.
11 Nan xa am ca mangai ngang dù
taiq ùh claih ca baxa!
Ma jah 'màng aih wì haq jah pòq hlài dèh
bìac tì wì haq broq loh!
12 Jàn au 'bìq con 'yoh padit padiang,
wa gu cadrì wèq cwìang wì haq.
Ôi jàn Au! Mangai ma 'nong pì broq ca pì lam lac,
broq ca pì lac ca trong.
13 Chuaq yòng goh bàu,
Haq yòng hadrah con jàn.
14 Chuaq hadrah 'bài gu craq da jàn Haq wa 'bài cwan doi:
“Pì raq mangai khoi ta'miaq caq wia nho,
tablah caq cùng hang atùng da mangai pa ŏi ta hnem pì.
15 Gleq pì ma hùa jôiq nunit đac jàn Au,
jôiq bahech đac mangai pa?”
Chuaq doi 'màng aih.
16 Chuaq doi hòm:
“Taiq 'bài con cadrì Jê-ru-sa-lem loq catèh,
'ngoc ranŏng, cachìac mat kenh ngan wì,
rai lam rai wech woch dađeh,
acŏng maih ta jènh
đòiq broq atêh.
17 Taiq 'màng aih Au broq ca gàu wì con cadrì Jê-ru-sa-lem loh ca i rahenh pachòng
wa broq ca gàu wì loh ca ngùn.”
18 Ta hì aih, Chuaq yŏc dŏng da wì haq 'bài maih ti jènh, mù côi ti gàu wa 'nhùc; 19 'bài hatai, 'bài maih wa bai bàng hadrò; 20 calôp côi, caxi wang ti grit pŏih, caxi 'nam, cabi xua thùm, pagiang bac; 21 Canhàng, rawiang xrình mùh. 22 Eo lè, eo cabac, eo yôh, 'balet wê ca tì. 23 Gùang ngan, eo, mù côi, bai bàng hadrò.
24 Loh ca xua om thai ca xua thùm;
xi nùng thai ca caxi 'nam,
gàu tangùn thai ca i xàc;
bai briang thai ca eo lem rahù;
xìt padŏc thai ca akia lem.
25 Lình da pì jah cachìt ca chang gùm pàc,
'bài mangai lình tanuq da pì jah cachìt ta nòi tajêh poh.
26 'Bài 'mang ngo da Siôn hmoi rayoih
wa wì gu cadrì ha'ngui ta taneh raliang ralàc.