6
Êsai Hnoq Chuaq ta Hnem Cùh Waiq
1 Wop Hanam bùa Ôxia cachìt, au hnoq Chuaq ha'ngui ta gèq bùa ha'nhèq dìq wa rahù, cadrai eo Haq bình halùih ta hnem cùh waiq. 2 'Bài Sê-ra-phim yòng enh 'nhèq dudan ca gèq bùa; mòiq Sê-ra-phim i tadràu toq panan; baiq toq panan bàng hadrò, baiq toq panan bàng jènh; baiq toq panan đòiq pan. 3 'Bài Sê-ra-phim pajùm ca dabau creo bàu:
“Hadròih, Hadròih, Hadròih, Chuaq ma wèq dìq ca 'bình plình!
Jàp crŏng taneh bình halùih can 'ngah 'ngai Haq!”
4 Bàu creo aih broq ca 'bài xèm radua 'mang tadroq, wa nhòi bình ta hnem cùh waiq.
5 Jò aih au doi: “Nan xa ca au! Au cô èh cachìt! Ma jah 'màng aih au cô mangai i hacùng bàu 'mèq, ŏi ta'ne jàn i hacùng bàu 'mèq taiq mat au khoi hnoq Chuaq ma wèq dìq ca 'bình plình!”
6 Jò aih i mòiq toq Sê-ra-phim pan trùh ta au tì wê ngia ùnh ti long hakep yŏc ti nòi ca'bŏng cùh waiq. 7 Haq lam chùq ti hacùng au, rai doi: “Cleq cô khoi achùq ti hacùng ìh; Lôi ìh khoi jah hreo wa tôiq ìh khoi jah baxŏng.”
Boc Plình Creo Ca Êsai Broq Mangai Capoch Thai Boc Plình
8 Èh au tàng bàu Chuaq doi: “Au jah thê bô lam? Cabô ma lam am ca Bèn?”
Au doi: “I au cô, xìn thê au lam beq!”
9 Chuaq doi: “Lam beq, lam doi ca jàn cô:
“ ‘Pì tamàng mahaq ùh 'nì tàng,
pì ngan mahaq ùh canao loq.’
10 Broq ca jàn cô loh ca manoh cadoq cadang,
trap don,
ca'nhip mat,
yùq mat wì canao loq,
don wì loq tàng,
manoh jah loq 'nì,
tawìh hlài wì jah brêh!”
11 Au bòch hòm: “Waiq Chuaq, dùnh dàng leq?”
Chuaq tèo:
“Trùh jò 'bài phôq 'bìq raliang ralàc,
pi i ca mangai ŏi,
hnem pi i ca mangai ŏi,
đùng tamang loh catù.
12 Trùh jò Chuaq 'nong jàn lam hangai,
bàc nòi ta gùng aih loh ca wang wê.
13 'Nhac ca ŏi i mòiq phàn mòiq jàt ta
aih xôq 'bìq bùh hnhung,
tìah ca long crech loq long rayai
jò 'bìq cau đòiq hlài toq xèm haq.
Èh hadai 'màng aih, adrech hadròih aih xèm da haq.”