17
Bàu Doi Adroi ca Đamat
1 Cô, bàu doi adroi ca Đamat:
“Cô èh, phôq Đamat 'bìq cađac,
pi i hòm, loh ca raliang ralàc.
2 'Bài phôq da A-rô-e loh ca wang wot,
aih wìa nòi 'bài trìu cùi padài ma ùh yùq crè cleq,
3 Đôn hanình phôq da Ep-ra-im
wa cwìang wèq da Taneh Diac Đamat pi ŏi i.
Jàn ŏi xrong da Siri
tìah ca Diac Is-ra-ên ma pi i can 'ngah 'ngiang hòm;”
Chuaq ma wèq dìq ca 'bình plình doi 'màng aih.
4 Ta hì aih, can 'ngah 'ngai da Jacôp loh ca xùch,
chac pôq bech loh ca ragìq ragôm.
5 Aih 'màng ca mangai gat 'mau cadop yŏc tacòng 'mau,
hi khoi pŏt yŏc toq hadròc 'mau;
'màng ca wì mot 'mau ta thòng Rê-pha-im.
6 Ŏi xrong hlài 'bài hadròc 'mau ha'monh ma tŏch jah,
'màng ca wì ma ra'nhùn long ôliu
ŏi xrong baiq piq pliang ta hamenh ha'nhèq,
loq pôn padam pliang ta 'bài hamenh plì ma top.
Chuaq Boc Plình da Is-ra-ên doi 'màng aih.
7 Ta hì aih, wì hèm trùh ca Boc Plình ma broq loh wì,
mat ngan jang trùh ta Chuaq Hadròih da Is-ra-ên.
8 Wì pi blèch ngan 'bài ca'bŏng tadreo,
aih bìac da tì cla wì;
wì ùh ngan 'bài dahwèq nhò hadrang tì cla wì broq loh,
aih 'bài dua 'mù At-tac-tê, loq 'bài jrang mat mahì.
9 Ta hì aih, 'bài phôq ma hagao da wì haq jah
tìah ca 'bài nòi catù khoi cađac,
ta rôm loq ta bôi wang,
aih 'bài nòi khoi 'bìq cađac ŏi jang ngìa con jàn Is-ra-ên.
10 Taiq pì khoi hèt ca Boc Plình da bìac dèch claih pì,
khoi hèt ca hmu xèm da pì.
Taiq 'màng aih, pì pìt long lem,
long yŏc xam adrech loh hmong enh Diac 'noiq.
11 Hì pì pìt long aih wa broq pagia wawenh,
bu daxroq khoi loh riang;
mahaq ta hì gat plì, pì ùh gat jah cleq,
bìac ranàc trùh ca long,
pì ùh jah broq brêh ca haq.
12 'Bài jàn broq tagrùang tagràt tìah ca atêh diac raxìq lai laq dêh!
'Bài jàn 'noiq glàm trùh tìah ca atêh còi diac dêh!
13 Joq 'nàng 'bài jàn 'noiq glàm trùh bàc tìah ca diac càn tagrùang;
mahaq Chuaq tagàih lech ca wì, dìq ca wì mot hangai,
wì 'bìq đùa đac 'màng ca cayeo hlôi aròm ta bôi wang,
'màng ca bahùt hlôi blo taneh.
14 Bu xèq khoi i bìac crè yùq;
adroi ca daxroq wì loh ca hnhung.
Aih phàn da mangai ma tablah bèn
wa mangai ma atùng bèn.