19
Bàu doi adroi ca Aicàp
1 Bàu doi adroi ca Aicàp:
Ngan cô,
Chuaq còi yùc renh lam trùh ta Aicàp;
'bài dua 'mù da Aicàp dìq tarìt tariang jang ngìa Haq;
manoh mangai Aicàp loh ca hech wiac taiq yùq crè.
2 “Au broq ca mangai Aicàp tajêh ca mangai Aicàp;
oh daq tajraq hlài dèh ca oh daq,
mangai haten hatìa tajraq hlài ca mangai haten hatìa,
phôq tajraq hlài ca phôq,
Diac tajraq hlài ca Diac.
3 Mangai Aicàp loh hŏnh manoh,
Au raliang đac trong tình da wì haq.
Wì loh ca creo bòch dua 'mù wa 'bài pajàu creo ca mahua mangai cachìt,
wa 'bài pajàu can kiac.
4 Yi hnao ca aih,
Au 'mùt jàn Aicàp ta tì mòiq craq wèq hùng hang,
wa bùa i cwìang càn ngang dù jah wèq cwìang wì haq.”
Chuaq ma wèq dìq ca 'bình plình doi 'màng aih.
5 Diac raxìq xŏt croh,
diac cròng xŏt wa croh.
6 'Bài hŏc diac loh ca xua om;
'bài cròng diac 'yoh loh ca xŏt croh;
blùm wa ca'bŏng dìq croh cachìt.
7 'Bài blùm ti 'bùc cròng diac Ninh wa dìq ca đùng taneh ma khoi rai adrech da wì haq,
dìq hŏnh croh, 'bìq hlôi đac, pi ŏi i.
8 'Bài mangai ranang ca jah mamùc,
rìm mangai axai ca ta cròng diac Ninh dìq hmoi,
wa mangai tang hlàm dìq mango.
9 'Bài mangai broq bai habùac
wa dìq mangai tenh bai taboc loh ca camaih.
10 'Bài jrang da Aicàp dìq 'bìq tùq đac,
dìq dŏng ca mangai patìh achap i manoh jìq xa.
11 'Bài cwan ŏi ta Xôan dìq jaq blùng;
mangai tah bàu ma dìq jaq rabiaq da Pha-ra-ôn anoi toq bàu ma blùng.
Broq 'màng leq pì ma jah doi ca Pha-ra-ôn:
“Au con calô da mangai rabiaq,
con da 'bài bùa calah nèh?”
12 'Màng aih 'bài mangai rabiaq da ìh ŏi ta leq?
'Bài mangai aih am ca ìh loq beq;
'bài mangai aih khòh loq Chuaq
ma wèq dìq ca 'bình plình khoi pajaq ca Aicàp 'màng leq.
13 'Bài cwan ta Xôan loh ca blùng,
'bài cwan ta Memphit 'bìq padô 'nùt,
'bài mangai 'nong gàu ma ragài da 'bài hadròng hadrech da Aicàp
khoi broq ca Aicàp lam lac.
14 Chuaq khoi 'mùt bìac blàq blènh ta Aicàp,
dài wì broq ca Aicàp lam lac ta rìm bìac,
'màng ca mangai bù rai hac rai lam loh
ca tinh tong jènh.
15 Pi i mangai cleq jah dèch Aicàp hòm,
'nhac ca gàu loq tenh, long acòng rêq loq cabŏng.
16 Ta hì aih, mangai Aicàp tìah ca gu cadrì; jò hnoq tì Chuaq ma wèq dìq ca 'bình plình hnhè ca wì haq, èh wì tarìt crè yùq. 17 Jò aih taneh Juđa wìa bìac broq ca Aicàp crè yùq. Hi ràu hiniq taneh aih jang ngìa mangai leq èh mangai aih ji crè, ma jah 'màng aih manoh Chuaq ma wèq dìq ca 'bình plình khoi pajaq adroi đòiq tajraq hlài ca Aicàp.
18 Ta hì aih, ta gùng Aicàp jah i padam phôq capoch bàu Ca-na-an, wa wì haq pa'noh bàu pachac ca Chuaq. Ta aih i mòiq phôq jah creo, Phôq da Bìac Raliang.
19 Ta hì aih, jah i mòiq toq ca'bŏng cùh waiq Boc Plình ŏi ta'ne gùng Aicàp, wa mòiq toq jrang ca Boc Plình ti nòi acang Taneh Diac aih. 20 Aih teo patò wa nen đòiq jah loq Chuaq ma wèq dìq ca 'bình plình ŏi ta Aicàp; wì jah creo dang ca Chuaq jò i mangai padit padiang wì, hi khoi Haq thê mòiq Ngai Dèch Claih Càn trùh dèch wa wiang dŏih wì jah claih. 21 'Màng aih, Chuaq jah am ca Aicàp canao loq ca Haq; Ta hì aih mangai Aicàp jah loq ca Chuaq. Wì jah dèch am ngè tadreo đòiq cùh waiq Haq; wì jah waiq dang, wa broq gêh dèh bàu pachac aih. 22 Chuaq jêh Aicàp, jêh hi khoi èh broq brêh; 'màng aih wì jah wìh hlài ta Chuaq; Haq hi tamàng bàu wì waiq khàn, Haq broq brêh ca wì.
23 Ta hì aih i trong lam enh Aicàp trùh A-si-ri; mangai A-si-ri lam ta Aicàp; mangai Aicàp lam ta A-si-ri; mangai Aicàp wa mangai A-si-ri dìq pajùm ca dabau cùh waiq Chuaq. 24 Ta hì aih, Is-ra-ên jah wìa mòiq phàn piq pajùm ca Aicàp wa A-si-ri, đòiq 'ràng xôq ramŏt jàp ca crŏng taneh; 25 Ma jah 'màng aih Chuaq ma wèq dìq ca 'bình plình khoi waiq xôq ramŏt ca wì 'màng cô: “Xôq ramŏt ca Aicàp jàn Au, A-si-ri bìac tì Au broq loh, wa Is-ra-ên xôxech Au.”