23
Tirò Taclìh
1 Bàu doi adroi ca Tirò!
Ô 'bài bong Ta-rê-si, hmoi beq,
ma jah 'màng aih wì haq khoi loh ca raliang piang,
pi i ca hnem, pi i ca chua bong!
Aih bìac khoi pa'noh ca wì haq
enh gùng Kittim.
2 Ô 'bài jàn ŏi ti 'bò diac raxìq,
nòi 'bài mangai padro da Siđôn,
'bài mangai cwa diac raxìq, ŏi hatenh beq!
3 Mangai padro lam cwa diac raxìq càn,
'ràng pliang adrech 'mau mì enh cròng diac Ninh,
aih phàn cùng hang da haq;
Tirò wìa nòi padro baxen da bàc Diac ta crŏng taneh.
4 Ô Siđôn, phai loq camaih,
ma jah 'màng aih diac raxìq nòi đôn da diac raxìq doi 'màng cô:
“Au 'nhòq lah jìq xa-ông, hadai 'nhòq lah xa-ông con,
'nhòq lah ban con calô, hadai 'nhòq ban con cadrì.”
5 Jò bàu cô hìa trùh ta Aicàp,
wì mango dìq jaq jò tàng bìac da Tirò.
6 Phai lam cwa ta Ta-rê-si beq.
Ô jàn ŏi haten ca diac raxìq, hmoi rayoih beq!
7 Cô i joq phôq bùi da pì ùh?
Aih phôq i enh 'nhòng calah nèh,
phôq khoi am mangai lam hangai
ŏi patìh caq ta 'bài Diac 'noiq.
8 Cabô ma pajaq bìac tajraq hlài ca Tirò,
aih phôq khoi am 'bài cadoh bùa,
phôq i mangai padro, aih 'bài con bùa,
i mangai atech, aih 'bài mangai i 'bang tìang ta jàp crŏng taneh.
9 Boc Plình ma wèq dìq ca 'bình plình khoi pajaq bìac cô,
đòiq broq amùa ca rìm bìac ma loq padèch dađeh
wa broq camaih ca rìm ngai mangai rahù ta crŏng taneh.
10 Ô con cadrì Ta-rê-si,
ìh pi hìaq 'bìq padràng hòm,
lam cwa jàp ca gùng troi cròng diac Ninh beq!
11 Chuaq khoi hnhè tì Haq ta diac raxìq,
broq tadroq ca 'bài Taneh Diac.
Haq am bàu thê raliang
đac dìq đôn da Ca-na-an.
12 Haq doi: “Ô con cadrì ŏi xriu Siđôn ma 'bìq padit padiang,
ìh ùh padèch dađeh hòm.
Cadàu cwa gùng Kittim beq,
ŏi ta aih ìh hadai ùh jah catèm.”
13 Ngan gùng da mangai Canđê,
jàn aih pi i hòm;
mangai A-si-ri khoi broq ca haq
wìa nòi ŏi ca 'bài ngè rôm;
wì broq hapom gŏc tap dudan đòiq tajêh ca phôq,
raliang đac hnem bùa loh ca hech hoch.
14 Ô bong Ta-rê-si, hmoi rayoih beq,
ma jah 'màng aih đôn pì khoi raliang.
15 Jò aih phôq Tirò wì jah hèt ca haq trom 70 hanam, dàng mòiq 'nhòng bùa, khoi ca 70 hanam, phôq Tirò jah tìah ca 'bŏi calêu da gù cadrì đì calêu:
16 “Ô gu cadrì đì wì khoi hèt tau,
wê broc lam jàp ca phôq beq.
Đêh ma rangot, ca ma rangot beq,
đòiq wì hmàng trùh ca gè!”
17 Khoi ca 70 hanam, Chuaq lam hmàih ca phôq Tirò. Tirò broq hlài dèh bìac dùnh, haq broq đì tango ca rìm diac 'noiq ta crŏng taneh. 18 Mahaq cùng hang wa 'bac jèn haq jah đòiq crài am ca Chuaq, ùh hanìuq đòiq, ùh cadoc đòiq. 'Bài cùng hang aih jah am ca 'bài mangai ŏi jang ngìa Boc Plình đòiq wì jah caq panàc caxùnh hatôq.