42
Hapŏng Da Chuaq. Pariaq Thê lùi Boc Plình.
1 “Cô hapŏng au, mangai au ma payòng,
mangai au khoi ràih khoi troq manoh ca mahua yiang au.
Au khoi đòiq Yiang au ta haq,
haq jah pa'noh bìac ta-atoq ca 'bài jàn rìm diac.
2 Haq ùh cachech ùh capoch dêh bàu,
ùh dôq wì tàng bàu haq ti trong.
3 Haq ùh goh đac long blùm khoi pàh,
ùh pupat đac đen ten pat.
Haq yŏc bìac joq 'nàng pa'noh loh bìac ta-atoq.
4 Haq ùh lep, ùh tacro manoh,
trùh jò broq gêh bìac ta-atoq ta crŏng taneh;
'bài pleo diac raxìq dìq ngèh gòm ranenh haq.”
5 Chuaq Boc Plình, ma khoi broq loh wa hlìa 'noh 'bài lòp plình,
khoi hlèch crŏng taneh wa 'bài ngè ma loh enh taneh am hihèm ca 'bài jàn ma ŏi ta crŏng taneh,
wa am yiang ca 'bài ngè ma ŏi ta crŏng taneh,
doi 'mang cô:
6 “Au cô Chuaq, khoi creo ca ìh ta bìac ta-atoq;
Au carùp tì ìh wa wèq ìh.
Au 'mùt ìh broq wêh jao ca jàn cô,
broq can 'ngah ca 'bài jàn diac 'noiq,
7 đòiq pèh mat mangai ùh xao,
broq ca mangai ŏi tù loh khoi enh hnem tù,
mangai ha'ngui ta nòi clam clôiq jah loh khoi ca nòi clam clôiq.
8 “Au cô Chuaq: aih hiniq au.
Au ùh am can 'ngah 'ngai au ca yiang ma 'noiq,
hadai ùh am bìac jah padèch Au ca 'bài dua 'mù!
9 Cô, 'bài bìac ma adroi khoi trùh,
au anoi 'noh hòm ca pì bìac ma neo;
au am ca pì loq adroi ca jò haq trùh.”
10 Pì mangai lam ta diac raxìq, 'bài ngè ma ŏi ta diac raxìq,
'bài pleo diac raxìq wa 'bài jàn ma ŏi ta aih,
calêu 'bŏi ca neo padèch Chuaq beq,
enh nòi pulùch da crŏng taneh calêu padèch Haq beq.
11 Đùng wang wê wa 'bài phôq haq dêh bàu beq;
'bài phôq Kêđa ŏi hadai 'màng aih;
jàn Sêla calêu beq,
cachech enh bôi wang beq!
12 Dèch am 'ngah 'ngai ca Chuaq beq,
wa anoi 'noh bìac calêu padèch Chuaq ta 'bài pleo diac raxìq beq!
13 Chuaq loh lam 'mang ca mangai tanuq;
manoh ròng 'mang ca mangai lình tajêh;
cachech bàu dêh;
jêh 'blêq 'bài mangai ma ta'blêq.
Mangai I Manoh Tìah ca Ùh Xao wa Clìch Don
14 “Au ŏi hatenh khoi dùnh,
Au khoi àt, Au khoi pagàt dađeh.
Mahaq manàiq Au hràng cachech, hihèm renh,
'mang ca gu cadrì xa-ông.
15 Au jah raliang đac rôm wang,
long nhat dìq croh dŏng.
Au broq ca 'bài diac cròng loh pleo diac,
'bài 'bau diac càn loh ca xŏt croh.
16 Au tìch mangai ùh xao lam ta trong haq 'nhòq lah lam,
yong wì lam ta trong wì 'nhòq lah 'nì;
Au halìh can clam ŏi jang ngìa wì loh 'ngah,
nòi tagùt loh hnhuh.
Joq 'nàng Au jah broq 'bài bìac aih,
Au ùh cađac wì haq.
17 Phàn 'bài mangai ma lùi 'bài dua 'mù can kiac dù,
doi ca 'bài dua 'mù: ‘Pì Chuaq da nhèn;’
Èh wì dìq talùi wa camaih!
18 “Ô 'bài mangai clìch, tàng beq;
phàn 'bài mangai ùh xao, blèch mat wa xao hnoq beq!
19 Cabô mangai ma ùh xao, tàng ùh xài hapŏng au?
Cabô ma clìch don 'mang ca mangai 'ràng bàu Au thê lam?
Cabô ùh xao 'mang ca mangai ma dìq ca manoh ca au,
loq ùh xao 'mang ca hapŏng da Chuaq?
20 Ìh hnoq bàc bìac mahaq ùh đòiq bìac leq ŏi ta manoh;
ìh i don mahaq ùh i tàng ca cleq.”
21 Chuaq bùi manoh dìh ca bìac ta-atoq,
broq ca ranenh jah padèch wa 'ngah 'ngai.
22 Mahaq aih jàn 'bìq wì tablah yŏc;
dìq dŏng 'bìq hlech hlàm ta còp,
'bìq clêh ta hnem tù;
wì haq loh ca wìa cùa wì ma tablah yŏc
mahaq ùh i ca cabô dŏih 'biaq;
loh ca wìa hanùm
mahaq ùh i ca cabô doi rameh: “Am hlài cô beq!”
23 Ta 'bài pì cabô ma halang don tamàng bìac cô,
cabô ma cachang ca tamàng bìac trùh 'nah ta hì atìq?
24 Cabô khoi 'mùt Jacôp ca mangai tablah
wa 'mùt Is-ra-ên ca mangai atùng?
Ma ùh xài Chuaq
ma bèn khoi broq tôiq ta'blêq ca Haq 'mòh?
Trong Haq wì ùh lam tiaq,
ranenh Haq wì ùh wèq.
25 Taiq 'màng aih Chuaq khoi ùc can nòih
wa bìac tajêh poh càn ta wì haq;
ùnh bùh tap pah mahaq haq ùh loq;
ùnh bùh cheo haq, mahaq haq xôq ùh 'nì lo.