46
Achùa Boc Plình wa Dua 'Mù Da Ba-bi-lôn
1 Bên cùp gàu, Nêbô cùp crŏng,
dua 'mù wì haq 'nong 'ràng ta xê 'bo,
broq ca 'bài 'bo catŏih cro
taiq padit trap.
2 Wì haq cùp gàu, cùp crŏng;
ùh jah dèch đac dèh can pòq trap,
mahaq 'bìq rùp broq hapŏng.
3 “Ô hnem Jacôp, wa dìq dŏng ca jàn ma ŏi xrong da Is-ra-ên,
tamàng Au beq,
Au khoi pòq pì enh jò neo xa-ông,
ca'mình pì enh cliac miq pì.
4 Trùh hloi jò pì craq, co xàc gàu co xàc mum,
Au xôq ca'mình pì.
Au khoi broq pì, èh Au ŏi ca'mình pì.
Au pòq pì wa dèch claih pì.
5 “Pì achùa Au wa cabô? Pì ngan Au dàng cabô?
Pì yŏc cabô achùa ca Au đòiq jah hnoq da-adàng ca dabau?
6 Wì 'noh dèh wang enh hông,
yŏc maiq kìq 'bac,
wì bòch baha thòq wang tùh ca wì mòiq toq dua 'mù,
hi khoi wì cùp gàu cùh waiq.
7 Wì xùi dua 'mù aih ti plêh,
'ràng đòiq ti nòi haq, haq yòng ti aih,
ùh daxìch khoi ca nòi haq.
'Nhac ca i cabô creo dang,
èh dua 'mù aih ùh tèo bàu,
ùh jah dèch wì claih ca can ranàc.
8 “Hmàng bìac cô beq, haboq beq,
ô 'bài mangai i tôiq, hèm hlài beq.
9 Hmàng hlài bìac calah nèh beq,
taiq Au Boc Plình ùh i ca Boc Plình ma 'noiq;
Au Boc Plình ùh i ca cabô tìah ca Au.
10 Toq Au jah anoi 'noh bìac dang ngìa
èh adroi bìac aih loh.
Au doi: ‘Bìac hatình da Au jah broq gêh,
Au jah broq rìm bìac đòiq lem manoh Au.’
11 Au creo ca chìm cliang trùh enh pah mat mahì loh,
creo ca mangai broq trong da Au trùh enh gùng hangai.
Bìac Au khoi anoi 'noh, Au jah broq gêh,
bìac Au khoi pajaq, Au jah broq joq 'nàng.
12 Ô 'bài mangai cadoq manoh hangai ca bìac ta-atoq,
tamàng Au doi beq.
13 Au 'ràng bìac ta-atoq Au trùh haten,
haq ùh ŏi hangai,
wa bìac dèch claih da Au ùh trò ca trùh.
Au đòiq bìac dèch claih ta Jê-ru-sa-lem,
ca Is-ra-ên aih can 'ngah 'ngai da Au.”