47
Bàu Ta-oih ca Ba-bi-lôn
1 “Ô con adrùh xriu Ba-bi-lôn,
loh ha'ngui ta blo taneh beq!
Ô con cadrì mangai Canđê,
ha'ngui ta taneh beq,
pì pi i ca gèq bùa hòm,
ma jah 'màng aih pàng cô ta èh pi jah creo ìh lem khôn hòm.
2 Yŏc apao xai, lam xai dàc beq;
lêh mù bàng hadrò,
lêh đac hatù beq,
lam jènh dech cwa cròng diac.
3 Bìac rahòng da ìh jah pa'noh loh,
bìac camaih ìh 'bìq ngan hnoq!
Au tabroq hlài,
ùh rong đòiq mòiq ngai leq.”
4 Chuaq Ma Dèch Rŏt Hlài da bèn, hiniq Haq Chuaq ma wèq dìq ca 'bình plình,
Haq Chuaq Hadròih da Is-ra-ên.
5 “Ô con cadrì da mangai Canđê,
ha'ngui hatenh, mot ta nòi clam beq!
Ma jah 'màng aih pàng cô ta èh,
pi jah creo hòm ca ìh bùa cadrì da 'bài Taneh Diac.
6 Au khoi nòih dèh ca jàn,
baxa wì haq tiaq trong 'mùt wì haq ta tì ìh.
Mahaq ìh ùh pa'noh manoh xa-ŏch ca wì haq,
mahaq khoi ta'mac long ech trap ca mangai craq.
7 Mahaq ìh doi:
‘Au broq bùa cadrì hloi hloi.’
Ìh ùh hèm trùh ca bìac aih,
ùh hèm trùh ca jò pulùch da bìac aih.
8 “Ô mangai baxùang ŏi catèm wa hèm ta manoh doi:
‘Au cô, enh gùng ca au pi i ca cabô!
Au ùh jò leq ha'ngui tiaq mangai hadrô,
ùh 'bìq hnhung ca con caiq.’
9 Mahaq, mòiq 'mang ta mòiq hì,
baiq bìac ranàc aih,
bìac hnhung ca con wa bìac hadrô, jah trùh ca ìh.
Baiq bìac ranàc aih dìq trùh tôm ca ìh,
'nhac ca ìh i bàc trong nhò kiac broq bìac halac wa bàc bàu caxoiq ca kiac!
10 Ìh canòm dèh bìac ngang dù wa doi:
‘Ùh i ca cabô hnoq au.’
Bìac khôn rabiaq cla ìh khoi 'nùt cla ìh,
wa ìh doi ta manoh:
‘Au cô raq, enh gùng ca au pi i ca cabô!’
11 Bìac ngang dù jah trùh ta ìh,
mahaq pajàu ùh jah caxoiq dŏih đac;
can ranàc trùh ca ìh,
mahaq ìh ùh jah dŏih dađeh đòiq jah khoi ca bìac aih;
èh bìac raliang đac da'ngàc trùh ca ìh
mahaq ìh ùh 'nì loq.
12 “Ìh yòng cajap ca broq bìac caxoiq nhò can kiac broq halac
ma ìh khoi axràm enh jò ŏi 'yoh!
'Mang aih ìh jah lòiq;
taiq nen aih, ìh broq ca wì crè ca ìh 'mòh?
13 Ìh khoi lep padren taiq nen tình bàc bàu hnài.
'Màng aih 'bài mangai loq 'nì bìac mat mahì, mat khê, mat halŏng,
wì ma nhò halŏng jah anoi 'noh bìac adroi,
wì ma ngan khê neo ùac bìac hì atìq,
manàiq wì phai yòng
wa dèch dŏih ìh claih ca bìac ma trùh ta ìh beq.
14 Cô, wì khoi wìa tìah ca hri 'bìq ùnh cheo;
wì ùh jah dŏih dađeh claih ca cwìang da ùnh;
ùnh aih ùh xài ngia đòiq 'nhìa,
loq nòi tanùh đòiq ha'ngui haten.
15 Dìq ca wì bua aih,
'bài mangai padro ti ìh enh jò ŏi 'yoh,
èh hlài tiaq trong lam dađeh;
ùh i cabô dèch dŏih ìh!”