50
Boc Plình Jùp Đò Hapŏng Haq
1 Chuaq doi 'màng cô:
“Ta leq jàiq Au ma cađac miq pì?
Loq Au khoi tech pì ca cabô?
Cô, pì 'bìq tech taiq tôiq lôi cla pì;
miq pì 'bìq cađac taiq pì blàq blènh.
2 Jò Au trùh, gleq ùh hnoq mangai leq?
Jò Au creo ùh i ca mangai leq tèo hlài?
Tì Au đêq hrìn ùh jah dèch 'mòh?
Padren Au ùh tàu đòiq jah dèch 'mòh?
Cô, Au lech mòiq nà raq, diac raxìq loh ca croh;
Au broq ca 'bài cròng diac loh nòi wang wê;
Ca ta diac cachìt loh ca xua om
taiq ùh i ca diac.
3 Au yŏc can clam clôiq caxùnh am ca 'bài lòp plình,
wa ta'màn xam bai briang.”
4 Chuaq Boc Plình khoi am ca Au rapet da mangai hnài,
đòiq Au capoch bàu payòng mangai lep tagah.
Haq padrìu Au rìm daxroq,
padrìu don Au đòiq tamàng bàu Haq hnài,
'màng ca mangai hŏc tiaq.
5 Chuaq Boc Plình khoi pèh don Au,
Au ùh blàq hlài,
ùh talùi.
6 Au khoi hnhu crŏng ca wì blai Au,
hnhu hadrò ca wì bùiq xàc mùm Au;
cabô cachôh ca Au,
Au ùh bàng dèh hadrò.
7 Chuaq Boc Plình jah jùp đò Au,
Au ùh hìaq camaih;
'màng aih Au broq ca hadrò Au cadoq tìah ca hmu,
ma jah 'màng aih Au loq ca dađeh
ùh i ca bìac cleq ma ep camaih.
8 Yiang ma palem Au khoi trùh haten,
Haq yòng ti Au.
Cabô hùa takìan ca Au?
Cabô mangai tajraq hlài ca Au?
Haq phai thia haten ca Au beq!
9 Joq 'nàng, Chuaq Boc Plình jah jùp đò Au:
Cabô jah ta'mòq tôiq ca Au?
Cô, dìq dŏng ca wì haq loh ca radàm 'màng ca eo dùnh,
'bìq 'mài cap hyah.
10 Cabô ŏi ta pì loq crè yùq ca Chuaq,
wa tamàng bàu da Hapŏng Haq?
Mangai leq lam ta clam clôiq wa ùh i ca can 'ngah èh ngèh gòm Chuaq beq,
canòm nhò ca Boc Plình beq.
11 Manàiq, dìq dŏng ca pì mangai patep ùnh bùh hadreo xreo trong lam ca dađeh,
èh lam ta'ne pla ùnh wa ta'ne 'bài hadreo cla ma khoi bùh aih beq!
Cô bìac ma pì jah nhàn enh tì Au hi broq ca pì:
Pì jah ca'nùng ta bìac mango wa 'bìq padit padiang!