59
'Bài tôiq càn da Is-ra-ên
1 Cô, ùh xài tì Chuaq khoi đêq ùh pàih dèch;
ùh xài don Haq clìch đòiq ùh jah tàng.
2 Mahaq taiq bìac ngang dù pì khoi hagan
pì wa Boc Plình;
tôiq lôi pì khoi tàt Haq khoi ca pì,
trùh 'mòi Haq pi tamàng bàu pì hòm.
3 Taiq tì pì khoi amùa ta mahem,
hadrang tì pì khoi amùa taiq tôiq lôi;
blìa hacùng pì capoch amòng,
rapet pì khoi hatùang bìac ngang dù.
4 Ùh i cabô tiaq trong ta-atoq đòiq kìan,
loq tiaq trong joq 'nàng đòiq rahen.
Wì lùi bàu capoch amòng wa bìac hù hnhung;
wì pòq wê bìac dù wa xa-ông loh tôiq càn.
5 Wì àm catap bìh tùa wa atenh pù pupènh;
cabô caq catap aih èh cachìt,
tàng catap aih padah,
èh loh bìh đùc.
6 Bai pupènh da wì haq ùh wìa broq eo,
hang wì haq broq loh ùh wìa caxùnh;
bìac broq da wì haq aih bìac broq ngang dù,
tì wì haq broq bìac ngang dù.
7 Jènh wì haq cadàu trùh ta bìac dù,
nhet broq ta-ùc mahem;
manoh hèm da wì haq aih manoh hèm dù,
bìac raliang piang ŏi ta trong wì haq lam.
8 Wì haq ùh loq ca trong catèm,
trong da wì haq ùh i ca bìac ta-atoq.
Wì haq broq dèh ca trong tagùt,
cabô lam ta trong aih èh ùh 'nì ca bìac catèm!
Pa'noh Bìac Ngang Dù
9 Taiq 'màng aih bìac lem jang khoi hangai ca bèn,
bìac ta-atoq tiaq bèn ùh tem.
Bèn ngèh ca can 'ngah, mahaq hnoq toq can clam;
ngèh ca can 'ngah ca-ah mahaq lam ta trong clam clôiq.
10 Bèn rawò lam roc tiaq panàt tìah ca mangai ùh xao;
hamòt tìah ca mangai ùh i ca mat;
jò 'ne hì lam catŏih tìah ca jò daxèq;
ŏi ta'ne 'bài mangai dêh, bèn tìah ca mangai cachìt.
11 Dìq ca bèn grenh tìah ca higàu grenh,
hràng tìah ca chìm trù hnem catô;
ngèh bìac lem jang, mahaq ùh i,
gòm bìac dèch claih, mahaq haq khoi hangai!
12 Joq 'nàng, bìac nhèn broq tôiq rai èh rai bàc ŏi jang ngìa Ìh;
tôiq lôi nhèn anoi bàu tajraq hlài ca cla nhèn.
Taiq bìac broq tôiq da nhèn,
cla nhèn loq dèh ca bìac ngang dù cla nhèn:
13 Nhèn khoi broq tôiq wa tajraq hlài ca Chuaq,
wìh crŏng pi tiaq dèh Boc Plình.
Nhèn capoch bàu dù wa blàq blènh,
hèm bàu amòng ta manoh wa capoch bàu 'nùt.
14 Taiq 'màng aih, bìac ta-atoq talùi,
bìac lem jang yòng đac hangai;
bìac joq 'nàng tacro 'ne trong phôq,
wa bìac lem jang ùh jah mùt.
15 Bàu joq 'nàng khoi pi i,
mangai leq wia hangai ca bìac dù èh 'bìq padit padiang.
Chuaq hnoq pi i ca bìac ta-atoq,
Haq ùh lem manoh.
16 Haq ùh hnoq mòiq ngai leq,
èh hamàih taiq ùh i ca cabô waiq dang.
Èh Haq 'noh dèh tì 'ràng trùh bìac dèch claih;
bìac ta-atoq dađeh payòng Haq.
17 Haq caxùnh eo mem da bìac ta-atoq,
côi bìac dèch claih ti gàu broq cadoh;
yŏc bìac tabroq hlài broq eo caxùnh,
yŏc bìac dêh nhang broq eo cabàn dađeh.
18 Haq ca'naih hlài ca wì tiaq bìac wì ma broq:
can nòih Haq tajraq hlài ca mangai ma tajraq ca Haq,
Haq ca'naih hlài can git ca mangai ma tagit ca Haq,
Haq tabroq hlài ca 'bài jàn ta pleo diac raxìq.
19 Enh pah mahì mùt, wì crè ca hiniq Chuaq,
enh pah mahì loh wì crè ca can 'ngah 'ngai Haq;
taiq Haq trùh tìah
ca diac rayaq dêh taiq cayeo da Chuaq hlôi haq.
20 “Chuaq Rŏt Dèch Hlài jah trùh ta Jê-ru-sa-lem,
trùh ti 'bài mangai ŏi pah Jacôp, aih mangai cađac tôiq lôi,”
Chuaq doi 'màng aih.
21 Chuaq doi: “Phàn Au, cô wêh jao Au broq ca wì haq: Yiang Au ma ŏi ti pì, wa bàu Au khoi 'nac đòiq ti hacùng pì, wa hacùng da xinoi pì ùh wia khoi ca pì, enh hì cô trùh hloi hloi!” Chuaq doi 'màng aih.