8
Tôiq Lôi Wa Bìac Blàq Hlài Da Juđa
1 “ ‘Chuaq doi: Jò aih èh, caxènh da 'bài bùa Juđa, 'bài cwan, 'bài pajàu Boc Plình, 'bài mangai capoch thai Boc Plình 'bìq wì 'noh đac khoi ca ralùng cla wì haq, 2 tènh đac ta mat mahì, mat khê, mat halŏng aih dìq bìac ma wì loq waq, wì patìh bìac, wì lam tiaq, wì waiq bòch, wì cùh waiq. Caxènh wì pi jah acom hlài đòiq hi catùh, mahaq jah wìa phàn ta crŏng taneh. 3 Jò aih 'bài mangai ŏi xrong hlài da jàn broq tôiq 'mèq 'mac aih, dìq ngèh enh ca jah cachìt yi hnao ca rìh ta nòi Au hnan wì haq trùh, Chuaq ma wèq dìq ca 'bình plình doi 'màng aih.’
4 “Ìh doi ca wì haq: “Chuaq doi 'màng cô:
“ ‘Jò cro pì ùh yòng 'mòh?
Jò khoi cađac trong troq,
èh ùh cađac dèh manoh broq tôiq 'mòh?
5 Mahaq gleq jàn cô ma ùh tawìh hlài?
Gleq Jê-ru-sa-lem ma hloi hloi lac trong?
Wì haq toq enh lam tiaq bìac 'nùt alùan.
6 Au khoi halang don đòiq tamàng.
Mahaq wì ùh capoch joq 'nàng;
ùh mangai leq cađac dèh manoh broq tôiq,
hèm ta manoh doi: “Au khoi broq cleq cô?”
Mahaq wì xôq lam tiaq dèh trong wì enh,
tìah ca axêh tùh mùt nòi tajêh poh.
7 'Bài clicoc xôq loq ca jò leq wì haq ep lam,
chìm trù, chìm plahaiq, chìm bu yai dìq loq dèh ca jò
đòiq wì haq pan hlài.
Mahaq jàn Au ùh loq ca bàu hnài da Au.
8 “ ‘ 'Màng leq pì ma hùa doi: “Nhèn cô khôn rabiaq,
ma jah 'màng aih i ranenh da Boc Plình ŏi ti nhèn?”
Mahaq ngoi long achìh da 'bài thài hnài ranenh khoi broq ca ranenh loh ca tawech,
loh ca amòng.
9 Mangai khôn rabiaq jah loh ca camaih,
yùq crè wa hlòp manet,
taiq wì haq khoi hangai ca bàu Chuaq,
ŏi i can khôn rabiaq ta leq?
10 Taiq 'màng aih Au am mai wì haq ca mangai 'noiq;
tamang wì haq ca mangai 'noiq.
Ma jah 'màng aih enh mangai hamoq trùh mangai can,
dìq chaq toq bìac lòiq ca dađeh.
Enh mangai capoch thai Boc Plình
trùh 'bài pajàu dìq loq 'nùt amòng.
11 Wì ha'naoq habau ca con jàn Au wa ca con cadrì Au dìq jaq glòih glaih,
hi khoi wì doi:
“Catèm! Catèm!”
Mahaq ùh i catèm cleq!
12 Chuaq doi: Wì haq camaih
taiq wì haq khoi broq tôiq dìq jaq ramòt ùh?
Joq 'nàng wì ùh loq camaih,
hadai ùh gòh hadrò ca bìac broq.
Taiq 'màng aih wì haq tacro
tìah ca 'bài mangai ma khoi tacro ta hì Au baxa wì ta ngìa cô èh.
13 “ ‘Chuaq doi: Au acom dìq dŏng 'bài ngè tamìt da wì haq:
Pi i ca plì nho ta long nho, pi i ca plì pŏc ta long pŏc,
hla haq hadai om hadrùih.
Rìm bìac Au khoi am
Au jah yŏc hlài enh wì haq.’ ”
14 Gleq bèn ma ha'ngui hatenh 'màng cô! Creo ca dabau,
beq bèn cadàu mot ta nòi phôq ma gao gình!
Èh hadai cachìt ta aih, ma jah 'màng aih Chuaq,
Boc Plình da bèn, khoi pajaq ca bèn ep cachìt!
Haq am ca nhèn ôq diac đùc,
taiq bèn khoi broq tôiq ca Haq.
15 Bèn ngèh enh hnoq bìac catèm,
mahaq ùh jah hnoq bìac catèm leq;
bèn jah enh hnoq bìac broq brêh
mahaq toq bìac ranàc trùh ca bèn!
16 Enh phôq Đan
khoi tàng atêh hi hèm da axêh wì haq,
axêh calô wì cachech,
taneh loh ca tadroq.
Wì haq lam trùh lŏn taneh wa dahwèq da taneh;
phôq wa 'bài jàn ŏi ta aih.
17 Chuaq doi: “Au thê bìh wa bìh plŏng trùh ta pì cap pì,
ùh i mangai leq jah tàt wì haq.”
18 Bìac mango au ùh jah broq brêh;
au khoi 'bìq hŏnh manoh.
19 Ngan cô! Tamàng! Aih bàu creo dang da jàn Au, da con cadrì Au,
enh taneh Diac nòi hangai wì doi:
“ Ta Siôn i ca Chuaq ùh??
I ca bùa da Siôn ta aih ùh?
“Gleq wì hùa leoq Au xam dua 'mù wì haq,
xam dua 'mù da jàn 'noiq?”
20 “Jò gat khoi gêh;
jò padrang khoi dìq,
mahaq bèn xôq 'nhòq jah dèch claih.”
21 Manoh au dìq jaq mango
taiq bìac raliang ralàc cachìt da con cadrì da jàn au.
Au crò hmoi; au mango,
crè crep jìq jaq.
22 Ta gùng Ga-la-at ùh i ca dàu
đòiq broq brêh ca habau ùh?
Ùh i ca 'bacsi ŏi ta aih ùh?
'Màng aih gleq padren
hiwa da con cadrì da jàn au 'nhòq ha'naoq hlài?