10
Cùh Waiq Dua 'Mù Aih Khoi Ranhùa
1 Ô 'bài mangai Is-ra-ên, tamàng bàu Chuaq doi ca pì cô. 2 Bàu Chuaq doi:
“Apaq hŏc tiaq dua 'nhòng rìh da 'bài jàn 'noiq,
apaq yùq crè ca bìac patò ŏi ta plình,
'nhac ca jàn enh gùng dìq jaq yùq crè ca teo patò aih.
3 Bìac broq da mangai jàn joq 'nàng dech 'ngwan,
taiq aih bìac mangai thòq coh long ta rôm,
yŏc chòng trah, yŏc panùng pùng padì.
4 Wì 'bìt xam wang wa 'bac đòiq broq lem,
yŏc đình tiang đòiq haq ùh cro.
5 Dua 'mù da wì haq
tìah ca ranom ma atua ta tamang pìt cachiq;
dua 'mù aih ùh loq capoch,
ep i mangai tòng,
ma jah 'màng aih haq ùh 'nì cadiang lam.
Apaq crè ca dua 'mù aih, taiq haq ùh jah broq raliang cleq ca pì,
hadai ùh i ca cwìang jah am xôq ramŏt ca pì.”
6 Waiq Chuaq, joq 'nàng ùh i cabô dàng Ìh,
Ìh joq càn caiq, Ìh joq 'nàng i cwìang itai;
hiniq Ìh enh 'nhèq dŏng dìq.
7 Ìh joq 'nàng Bùa dìq ca crŏng taneh,
cabô ùh yùq crè ca Ìh?
Ma jah 'màng aih Ìh joq đang ca jah padèch,
taiq ta dìq dŏng ca 'bài ma khôn rabiaq ta rìm jàn ta rìm Diac,
ùh i mangai leq tìah ca Ìh.
8 Dìq ca jàn aih loh ca blùng,
loh ca ranhùa,
mòiq apŏt long broq loh dua 'mù,
aih bìac 'ngwan, ùh i ca lòiq cleq.
9 'Bac tùq ratang yŏc enh Ta-rê-si,
wang enh Upha,
wì haq toq broq,
aih bìac tì cŏng da mangai thòq 'bac geo broq loh;
Caxùnh eo cwàn ca 'bài dua 'mù aih xam bai gòh drinh
wa gòh ngùi wì aih dìq bìac broq da 'bài thòq ragài tì.
10 Mahaq Chuaq, Haq joq 'nàng Boc Plình,
Haq Boc Plình ma rìh yôt, Haq Bùa hloi hloi.
Taneh tadroq jò Haq loh nòih,
rìm Diac ùh chìuq nui can nòih da Haq.
11 “ 'Màng aih, ìh phai doi ca phù cròng bàu cô: ‘ 'Bài can kiac ma ùh broq loh plình crŏng taneh, èh jah 'bìq jêh đac ta crŏng taneh enh ca'nàm plình.’ ”
12 Mahaq Boc Plình khoi broq loh plình wa crŏng taneh cô xam cwìang itai da Haq;
Haq broq loh rìm ngè tiaq can khôn rabiaq da Haq
wa dèch plình ha'nhèq tiaq bìac 'nì loq Haq.
13 Jò Haq broq bàu, èh i atêh dêh ta 'bài diac ta plình ta-ùc 'noh;
Haq broq ca hòi diac pan tŏc wìa yùc pan jàp crŏng taneh;
Haq broq ca camlet lam tiaq mè;
broq ca cayeo loh enh nòi 'bài hapom da Haq.
14 Mangai leq cùh waiq dua 'mù dìq ranhùa wa ùh loh cleq;
'bài thòq ma tùh dua 'mù camaih dèh ca dua 'mù wì khoi broq loh,
ma jah 'màng aih dua 'mù haq broq loh,
aih dua 'mù toq padô 'nùt, ùh i ca hòi hihèm.
15 'Bài dua 'mù aih dìq ùh loh cleq, aih toq bìac đòiq padô 'nùt,
trùh hì baxa, wì haq 'bìq raliang dŏng dìq.
16 Mahaq phàn xôxech da Jacôp ùh xài 'màng aih,
ma jah 'màng aih Boc Plình raq ma khoi broq loh rìm ngè bìac,
Is-ra-ên aih hadròng hadrech da xôxech Haq,
hiniq Haq aih Chuaq ma wèq dìq ca 'bình plình.
17 Ô phôq ma khoi 'bìq dudan,
acom dìq ca cùng hang èh loh khoi ca phôq beq.
18 Ma jah 'màng aih Chuaq doi 'màng cô:
“Yàng cô Au hwenh đac dŏng dìq jàn ma ŏi ta Diac,
Au broq ca wì haq nan xa waq ca wì haq cadrat don,
đòiq ùh i mangai leq jah claih.”
19 Nan xa ca au taiq habau au jìq dìq jaq,
teo habau càn caiq xa ca brêh,
mahaq au hèm cô raq can jìq au ep pòq.
20 Traiq da au khoi raliang,
'bài caxi haq khoi catech,
con calô au khoi lam đac,
pi i ca mangai leq broq hlài traiq hadai
pi i ca mangai leq prình hlài da au traiq.
21 'Bài mangai ban trìu loh ca blùng dŏng,
taiq ùh chaq bòch manoh Chuaq.
Taiq 'màng aih cla wì haq loh ca raliang piang,
wa 'bài trìu loh ca tac mac.
22 Ngan tau atêh tagrùang tagràt trùh
enh pah 'ngeo ca mat mahì
loh broq ca 'bài phôq da Juđa loh ca wang wê,
loh còp coq yiang ŏi.
23 Ôi Chuaq! Au loq joq 'nàng con mangai ùh jah broq craq dèh 'nhòng rìh cla.
Con mangai hadai ùh jah pajaq dèh ca cadiang jènh lam.
24 Chuaq ôi! Xìn Ìh hnài au,
mahaq paq tiaq jò can nòih taiq yùq Ìh loq jêh đac au.
25 Xìn Ìh ùc 'noh can nòih Ìh ca 'bài Diac ùh canao loq ca Ìh,
'bài tamoi ùh creo dang Ìh,
ma jah 'màng wì khoi lŏn Jacôp;
wì caq èh jêh đac haq
wa raliang dŏng dìq hnem phôq wa taneh tamang haq.