12
Jop Lech ca 'Bài Bua Haq
1 Èh Jop tèo hlài hòm:
2 “Joq 'nàng pì mangai can khôn rabiaq,
jò pì cachìt pì 'ràng hloi can khôn rabiaq aih!
3 Mahaq au hadai i can khôn rabiaq troi pì,
au ùh thùa cleq pì;
cabô ma ùh loq bàu pì khoi doi aih?
4 “Au khoi wìa mangai đòiq ca bua au do;
'nhac ca au khoi waiq dang Boc Plình, èh Boc Plình khoi tèo au!
Mangai ta-atoq, mangai gêh tôm khoi wìa bàu do wa bàu jù lê.
5 Mangai catèm khìn đac mangai glàm bìac ranàc;
can ranàc loh ca mangai leq khoi lia tacro!
6 Hnem traiq da mangai atùng jah can padrŏng,
'bài mangai taleoq Boc Plình jah ŏi catèm,
mahaq Boc Plình xôq am ca wì haq bàc dahwèq.
7 “Mahaq ìh bòch ngè rôm beq, wì haq jah patô ca ìh,
bòch 'bài chìm beq, wì haq ta'mon ca ìh.
8 Loq ìh anoi ca taneh, haq jah hnài ìh;
anoi ca 'bài ca ta diac raxìq, wì haq jah ta'mon ca ìh loq.
9 Dìq ca 'bài ngè cô,
ngè leq ma ùh loq Chuaq khoi broq loh dìq bìac cô?
10 Haq cadop wê ta tì can rìh da rìm ngè rìh
wa hihèm da con mangai hadai ŏi ta tì Haq.
11 Don ma ùh loq hadro bàu capoch,
hacùng ma ùh loq mòn ca dahwèq caq 'mòh?
12 Mangai craq jah i can khôn rabiaq,
mangai halình jah i can 'nì loq.
13 “Mahaq toq Boc Plình i can khôn rabiaq wa cwìang itai,
can loq 'nì wa bàu rabiaq dìq ŏi ta Haq.
14 Haq raliang đac, mangai ùh jah broq hlài;
Haq clêh mangai leq, ùh i ca cabô i cwìang lêh ca'naih.
15 Haq tàt diac mè, taneh croh crenh;
Haq ca'naih mè, diac bình halùih ta crŏng taneh.
16 Haq i cwìang itai wa i khôn rabiaq;
Haq wèq cwìang mangai lac trong wa mangai ma broq ca wì lac trong.
17 Haq 'nong 'bài mangai tah bàu lam ùh tŏc jai;
broq ca 'bài cwan hadrah loh ca blùng.
18 Haq lêh đac caxi wèq cwìang da 'bài bùa,
wa yŏc caxi nìt càt ca'nam wì haq.
19 Haq rùp 'nong 'bài pajàu tah ta hnem tù,
khèa đac 'bài mangai khoi wèq cwìang bàc hanam.
20 Haq bahnhung đac bàu capoch da mangai ma đang ca bèn lùi canòm,
broq ca mangai craq loh ca hnhung ca can rabiaq.
21 Haq ta'mòq can camaih ca mangai ma gù craq,
dŏih caxi ca'nam enh mangai i can dêh.
22 Haq pa'noh bìac jrùq hlèp ta nòi clam clôiq,
broq ca can clam loh ca 'ngah.
23 Haq broq ca 'bài Diac ta crŏng taneh padrŏng can,
hi khoi raliang đac;
Haq parùng aniang ca 'bài Diac ta crŏng taneh, hi khoi wì 'bìq 'nong 'noh khoi ca Diac cla.
24 Haq bahnhung đac can khôn rabiaq loh khoi enh 'bài mangai broq gàu ta crŏng taneh,
broq ca wì lam lac ta đùng wang wê, nòi ùh i trong lam.
25 Wì rawò lam ta clam clôiq, ùh i ca can 'ngah,
Haq broq ca wì cro yòng tìah ca mangai bù.