13
Jop Doi Bàu Capoch Da Bua Haq Tìah ca Blo Tanùh
1 “Cô, mat au khoi hnoq dìq bìac aih,
don au khoi tàng wa au khoi 'nì loq.
2 Bìac leq pì loq, au hadai khoi loq;
Au ùh thùa pì.
3 Mahaq au enh bòch Boc Plình ma I Cwìang Itai Dìq Dŏng,
ngèh enh ca jah palem dađeh ca Haq.
4 Mahaq phàn pì mangai 'bài mangai amòng 'nùt;
Dìq dŏng thài jreo ùh loh cleq.
5 Ngèh enh pì ŏi hatenh.
Aih can khôn rabiaq pì jah broq!
6 Tamàng bàu au palem dađeh beq,
wa ha'miang ngan trong hacùng au tarahen.
7 I joq pì hùa capoch bàu ùh ta-atoq ca Boc Plình?
Pì hùa capoch 'nùt ca Haq 'mòh?
8 Pì enh gen can enh ngìa ca Boc Plình?
Pì tarahen am ca Haq 'mòh?
9 Pì jah bùi manoh jò Haq hadrah pì ùh?
Loq pì enh 'nùt Haq 'màng ca pì 'nùt con mangai 'mòh?
10 Haq baxa pì joq 'nàng,
tàng pì broq gen can tiaq trong hlèp.
11 Can 'ngah 'ngai Haq ma ùh broq ca pì crè
wa can cwìang itai da Haq ma ùh broq ca pì yùq 'mòh?
12 Bàu capoch khôn rabiaq da pì bu dàng blo tanùh;
Bàu palem dađeh da pì xùang padah bu dàng cabi xam taneh nhin.
13 “ 'Màng aih hatenh beq, wia khoi ca au beq,
đòiq au jah capoch, èh đòiq bìac cleq trùh ca au, au jah chìuq dìq.
14 Gleq au ma cap dèh xech
wa tamùa dèh can rìh 'mòh?
15 'Nhac ca Chuaq jêh đac au,
au xôq canòm ca Chuaq;
Mahaq au xôq palem can rìh dađeh ŏi jang ngìa Chuaq.
16 Bìac aih raq bìac jah dèch au;
Ma jah 'màng aih mangai ùh lùi i Boc Plình, ùh hùa trùh yòng jang ngìa Chuaq.
17 Tamàng ma geo bàu au beq,
don pì tamàng bàu anoi paro beq.
18 Au khoi anoi pa'noh dìq bìac au ma 'bìq kìan;
au loq au ùh 'bìq hadrah i tôiq.
19 Ŏi i ca cabô tarahen ca au ùh?
Manàiq cô au ŏi hatenh gòm cachìt.
20 “Waiq xìn Chuaq broq ca au baiq bìac,
èh au pi hìaq ti mot ca hadrò Chuaq.
21 Xìn Chuaq dŏih tì Chuaq khoi ca chac au,
wa dŏih can yùq crè khoi ca au đòiq au pi hìaq yùq crè ca Ìh hòm.
22 Khoi èh creo ca au beq, au tèo;
Loq đòiq au capoch ca Ìh adroi, èh Chuaq padreo hlài bàu ca au.
23 Bìac ngang dù wa tôiq lôi au bàc toq leq?
Xìn Chuaq am ca au loq dèh bìac broq tôiq wa tôiq lôi au.”
24 Gleq Chuaq ma cadoc dèh hadrò,
èh ngan au tìah ca mangai tagit ca Ìh?
25 'Màng leq Chuaq enh pa'nhùq mòiq hadrang hla 'nang 'bìq cayeo broq tarìt
wa hnan rùp tacònh hri croh 'mòh?
26 Ma jah 'màng aih Chuaq ta'mòq ca au bìac pagau pagùa;
au ep pòq dèh tôiq au broq jò ŏi radam.
27 Ìh clang jènh au, ha'miang ngan rìm trong au lam,
wa loq rìm teo da jènh au khoi lam.
28 “Chac au loh ca bùc bach 'màng ca long khoi bùc,
'màng ca mòiq blah eo 'mài damang khoi cap hyah.