27
Jop Doi Dađeh Ta-Atoq
1 Èh Jop capoch hòm:
2 “Patô Boc Plình au pachac joq 'nàng Haq khoi yŏc 'noh đac bìac manoh au ma enh;
Chuaq I Cwìang Itai Dìq Dŏng khoi broq ca mahua yiang au chìuq pagau pagùa,
3 jò au ŏi i can rìh ŏi ta chac au,
wa hihèm da Boc Plình ŏi ŏi ta mùh au,
4 blìa hacùng au cô ùh capoch bàu ùh ta-atoq,
rapet au ùh anoi 'noh bìac loq 'nùt.
5 Joq 'nàng au ùh jò leq doi pì doi troq!
Trùh jò cachìt, au xôq palem dađeh au broq troq gêh tôm.
6 Au wèq cajap dèh bìac ta-atoq, au ùh cađac bìac ta-atoq aih; lùch ca 'nhòng au, manoh hèm da au ùh takìan hlài cla au.
7 “Au ngèh ca mangai ma tagit ca au 'bìq baxa troi mangai dù,
wa mangai ma tajraq hlài ca au 'bìq hadrah troi mangai broq bìac ùh ta-atoq.
8 Bìac ngèh gòm da mangai ùh lùi Boc Plình 'màng leq jò haq cachìt,
jò Boc Plình yŏc hlài 'nhòng rìh haq?
9 Jò bìac ranàc trùh ca haq,
Boc Plình joq 'nàng ùh tamàng bàu dang creo da haq.
10 I joq haq chaq jah dèh can lem bùi nòi Chuaq I Cwìang Itai Dìq Dŏng,
wa jah waiq dang yôt Boc Plình 'mòh?
11 “Au patô hnài pì bìac Boc Plình broq,
ùh cadoc ca pì bìac manoh enh da Chuaq I Cwìang Itai Dìq Dŏng.
12 Mahaq pì raq khoi hnoq bìac aih,
'màng aih hagleq pì ma ŏi doi ca au bàu capoch blùng aih?
13 “Cô phàn ma Boc Plình khoi pajaq đòiq ca mangai dù,
wa cùng hang da mangai ngang dù nhàn yŏc enh nòi Chuaq I Cwìang Itai Dìq Dŏng.
14 Tàng wì haq i bàc con caiq, aih đòiq chang gùm jêh đac;
xinoi haq acaq ùh lah panàc.
15 Mangai ma ŏi xrong èh 'bìq cachìt ca can hinìq ramòt,
mai hadrô da wì haq ùh toq xit crò hmoi.
16 'Nhac ca mangai dù gop đòiq 'bac tìah ca blo,
wa padon đòiq eo cwàn bàc tìah ca tràp,
17 mahaq mangai ta-atoq jah caxùnh, phàn 'bac haq,
mangai ùh i ca tôiq jah axong ca dabau.
18 Mangai dù broq hnem ùh cajap tìah ca pù pang pènh,
tìah ca hapom mangai gòm wùan broq xam hamenh long.
19 Jò mangai dù ca'nùng cùi bìac can padrŏng haq ŏi tôm,
mahaq jò haq rìu hnoq pi ŏi i cah cleq.
20 Bìac ramòt da'ngàc glàm haq 'màng ca diac càn glàm;
bahùt dùng yŏc haq jò damang.
21 Cayeo pah mat mahì loh 'nong haq lam, haq hnhung;
cayeo dŏt haq lam khoi dèh ca nòi haq.
22 Cayeo aih hlôi dêh wawenh ca haq, ùh rangàt;
haq dìq jaq enh cadàu mot khoi ca cayeo dêh aih.
23 Wì jah tep tì jò hnoq haq 'bìq jêh chao,
wì do lem bùi hnan haq loh lam khoi dèh ca nòi.