31
Jop Anoi Dađeh Ta-atoq
“Au khoi broq wêh jao ca mat au,
au ùh jò leq ngan gu adrùh xam mat manoh ham enh.
Boc Plình ŏi enh 'nhèq am cleq ca au tàng au ham 'màng aih?
Au jah cùng hang leq enh Chuaq I Cwìang Itai Dìq Dŏng?
Bìac ranàc ma ùh xài đòiq am toq ca mangai ngang dù,
wa bìac raliang piang đòiq am ca mangai broq tôiq 'mòh?
Boc Plình ma ùh hnoq rìm bìac au broq,
wa rèn tang cadiang au lam 'mòh?
 
“Tàng au khoi rìh caq loq amòng,
wa tàng jènh au enh lam tiaq trong loq 'nùt,
xìn Boc Plình tah au ta kìq ta-atoq,
èh Haq jah hnoq bìac lem hreo da au.
Tàng jènh au cađac trong jang da Haq,
tàng manoh au lam tiaq trong mat au ham enh,
tàng i bìac 'mèq leq ŏi ta tì au,
đòiq au rai, èh mangai 'noiq gat caq;
wa cleq au pìt 'bìq tabùiq đac!
 
“Tàng manoh au khoi 'bìq padô 'nùt taiq gu cadrì alùan;
tàng au khoi chop rinh nòi 'mang hnem da mangai haten hatìa,
10 èh đòiq mai au lam xai apao am ca mangai 'noiq,
wa mangai 'noiq jah cùi ti mai au.
11 Tango anang aih tôiq càn ramòt;
tôiq aih đang ca cwan tình hadrah baxa:
12 Tôiq aih broq ca ùnh khàng tam trùh ta A-ba-đôn nòi 'Bau Ùnh,
chôh đac dìq cùng hang au trùh nòi lùch.
 
13 “Tàng au i khìn đac cwìang jah i lòiq da hapŏng calô hapŏng cadrì au,
jò wì haq achìh jàiq i bìac kìan au,
14 èh au broq 'màng leq trùh jò Boc Plình hadrah?
Jò Haq bòch au, au tèo 'màng leq?
15 Chuaq ma broq loh au ta cliac miq au, ma ùh broq loh wì haq 'mòh?
Ma ùh joq mòiq ngai Boc Plình raq broq loh bèn ta cliac miq bèn 'mòh?
 
16 “Tàng au ùh rùp bàu trong ngèh enh da mangai pa,
loq broq ca mangai hadrô ngèh enh trùh tagoh 'mòi mat;
17 Tàng au caq dèh 'benh mòiq ngai,
wa ùh axong ca mangai lac caq dìq,
18 mahaq enh jò au ŏi 'yoh, au hadai khoi ban 'yoh lac tìah ca con wa baq;
Enh jò ŏi 'yoh, au khoi loq jùp đò mangai hadrô;
19 Tàng au i hnoq mangai leq ten cachìt taiq ùh i ca eo cwàn caxùnh,
wa mangai pabônh ùh i ca mèn clùm;
20 Tàng haq ùh manè bùi au,
wa haq ùh nhò xàc trìu au đòiq jah hatôq;
21 Tàng au hnhè tì pa'nhùq mangai lac,
ma jah 'mang aih au loq i mangai wiang ti au ta nòi 'mang phôq;
22 Xìn plêh au èh taclìh đac nòi 'noiq,
cŏng au tagoh đac nòi cukinh!
23 Taiq bìac ranàc enh Boc Plình trùh broq ca au crè ramòt,
ŏi jang ngìa rahù da Haq, au ùh hùa broq cleq.
 
24 “Tàng manoh au lùi 'bac wang,
wa au doi ca wang: ‘Gè bìac au canòm nhò;’
25 Tàng au lem bùi ca cùng hang au bàc,
wa taiq tì au khoi jah bàc cùng hang;
26 Tàng au ngan mat mahì xreo 'ngah,
wa mat khê 'ngah xiang,
27 Tàng manoh au 'bìq padô 'nùt cùh waiq atùng baiq toq mat aih,
28 èh bìac aih hadai tôiq đang ca 'bìq hadrah;
tàng au broq 'màng aih, au khoi cađac Boc Plình ma enh 'nhèq.
 
29 “Au khoi lah yŏc manoh lem bùi jò bìac ranàc trùh ca mangai ma git ca au,
wa yŏc manoh lem bùi jò wì haq glàm bìac ranàc ùh?
30 Ùh. Blòq hlài.
Au ùh đòiq hacùng au i tôiq hloh bàu waiq hanip ngèh ca wì cachìt;
31 Mangai ta hnem au ma ùh xài lah doi:
‘Cabô ta cô ma ùh jah caq jam panàc 'mòh?’
32 Tamoi enh Diac 'noiq trùh ùh lah cùi ti trong,
taiq au pèh 'mang ca tamoi trùh enh nòi hangai;
33 Au ùh cadoc dèh tôiq troi Ađam,
đòiq dèh can ngang dù ŏi ta manoh,
34 taiq au crè ca mangai bàc,
wa crè ca 'bài oh daq loq jù lê;
hi khoi au ŏi hatenh, ùh hùa cadiang loh khoi ca 'mang?
 
35 “Ôi! Waq i mangai tamàng au! Cô teo au kìq.
Xìn Chuaq I Cwìang Itai Dìq Dŏng rùp bàu tèo au; waiq ca bàu jàiq mangai tagit ca au khoi achìh,
36 joq 'nàng au bac bìac ta'mòq tôiq au aih ti plêh au,
côi ti gàu tìah ca côi cadoh bùa.
37 Au xìn anoi hlài ca Chuaq rìm bìac au broq;
tìah ca con bùa au lam trùh yòng jang ngìa Haq.
 
38 “Tàng taneh creo kìan au,
'bài lai cai pajùm ca dabau hmoi;
39 Tàng au khoi caq dahwèq haq, mahaq ùh ca'naih 'bac,
loq broq ca cla craq haq cachìt,
40 èh xìn brech breo hon thai ca 'mau mì,
wa nhat èh hon thai ca 'mau mat!”
Trùh pàng cô dìq ca bàu Jop.