30
Jop Anoi Bìac Nan Xa Dađeh
1 “Mahaq manàiq, mangai yi 'yoh hanam ca au do lê au;
baq wì haq calah nèh aih mangai ma au khoi khìn đac, ùh am ŏi pajùm ti coq ma ngan trìu au.
2 Padren wì haq khoi hnhung,
'màng aih padren tì wì haq broq lòiq cleq ca au?
3 Wì haq ragìq ragôm taiq pangot hrah thìuq dahwèq caq;
Wì haq nhinh mùh mat cadàu mot ta đùng wang wê ùh i cah cleq.
4 Wì haq kech cachìq ta'ne ramù hila,
wa cŏch riah long chôi broq dahwèq caq.
5 Wì haq 'bìq drùh hnan đac lam khoi ca mangai jàn;
i mangai lech ca wì haq tìah lech ca mangai atùng.
6 Wì haq ep ŏi ta nòi thòng diac,
ta trom còp jrùq loq ta còp hmu 'yoh.
7 Wì haq brêu ŏi ta'ne ramù,
cùi pachit ca dabau enh 'neq ca hila brech.
8 Wì haq mangai blùng, 'bang tìang da hiniq wì haq ùh loh cleq;
wì haq 'bìq blai drùh đac loh khoi ca gùng.
9 “Manàiq wì haq yŏc bàu calêu 'mèq 'mac lê au;
wì haq do ca au!
10 Wì haq cadròt ca au, wia hangai ca au,
ùh yùq ca cachôh ta hadrò au.
11 Taiq Boc Plình khoi patùa caxi panenh au, wa broq ca au camaih;
dài bìac aih wì ngan au pi loh cleq.
12 'Bài mangai 'mèq 'mac cô yòng broq manhài pah 'ma au; wì haq lùt đac jènh au,
palaoq am ca au trong ngang dù da wì haq.
13 Wì haq raliang đac trong da au, enh bìac raliang đac au wì haq jah i lòiq;
mahaq ùh i ca cabô trùh padràng wì haq.
14 Wì haq trùh ti au mùt ti nòi hlùh càn,
glàm mùt jò panàt raliang dudan ca au.
15 Bìac crè ramòt padit au, can rahù au 'bìq cayeo dêh hlôi đac,
can padrŏng au khoi hech tiaq cayeo yùc.
16 “Manàiq mahua yiang au hech ta chac au;
'bài hì nan xa khoi hnan rùp au;
17 Damang ca caxènh au jìq hiang, can jìq cap caq au, ùh hêq.
18 Xam can dêh càn Boc Plình cadop eo au,
yinh yŏc au 'màng ca yinh ranŏng eo.
19 Boc Plình hwenh au clìh ta tràp,
au loh tìah ca blo wa blo tanùh.
20 “Au creo dang ca Chuaq, mahaq Ìh ùh tèo au;
au yòng ti aih, Ìh toq ha'miang ngan au.
21 Chuaq broq loh ramòt ca au,
Ìh yŏc can dêh càn baxa au.
22 Ìh broq cayeo wawenh yinh atŏc au,
cayeo 'nong au lam, èh jêh đac au ta bahùt.
23 Au loq Chuaq 'ràng au trùh nòi cachìt,
aih nòi lùch da 'bài mangai rìh.
24 “Mahaq jò mangai leq 'bìq ranàc, wì haq ma ùh hnhè tì 'mòh? Loq 'nang jò 'bìq ranàc, wì haq ùh hloh bàu cachech creo 'mòh?
25 Au ma ùh khoi lah hmoi ca mangai glàm bìac xa 'mòh?
Manoh au ma ùh mango ca mangai pa 'mòh?
26 Jò au ngèh gòm xôq ramŏt, can ranàc trùh;
au ngèh gòm can 'ngah, mahaq can clam trùh.
27 Manoh au hèm manhài, ùh jah padài;
'bài hì ranàc glàm mùt ta au.
28 Au caxùnh eo gam rai hmoi crò, ùh i mangai alòng;
Au yòng ta'ne 'bài mangai jàn wa creo dang dèch au.
29 Au khoi wìa tìah ca coq brì enh ngìa ca oh daq,
wa broq bua ca chìm đađìu.
30 Akia au loh ca gam,
caxènh au loh ca tôq tanget.
31 Taiq nen aih, atêh broc au loh ca bàu ha-on,
atêh taliaq au loh ca bàu hràng rayoih.