41
Cwìang Boc Plình Jah Patô Ŏi Ta Lê-wia-than
1 “Ìh i jah axai Lê-wia-than xam pla axai?
Loq jah yŏc caxi càt hacùng haq ùh?
2 Ìh i Jah yŏc mòiq hadrang caxi nùng xràng mùh haq?
Loq pùng kiang haq xam pla axai?
3 Haq waiq xìn ìh am can xa-ŏch ca haq ùh?
Loq capoch ca ìh bàu habùat 'mòh?
4 Loq haq xìn broq mòiq manoh ca ìh,
đòiq ìh rùp haq broq hapŏng hloi hloi ùh?
5 Ìh hùa baxùh ca haq tìah ca baxùh ca chìm,
càt haq èh am dèh ca 'bài con cadrì dùi haq 'mòh?
6 Mangai padro baxen loq enh rŏt haq đòiq tech haq ca mangai tech jam ùh?
7 Ìh jah yŏc long hin bìt jàp ta akia haq,
loq yŏc jaoq bìt padom jàp ta gàu haq ùh?
8 Đòiq tì ìh troq chac haq beq;
èh ìh jah hmàng yôt ca bìac tajêh poh aih oq, ìh ùh jò leq hùa broq hòm!
9 Cô bìac ma tình ca rùp haq khoi hnhung dŏng; hnoq toq wòch haq,
wì ji khoi crè crep.
10 Ùh i cabô tanuq manoh hùa leoq haq;
'màng aih, cabô jah yòng ŏi jang ngìa Au?
11 Cabô khoi am ca au adroi bìac cleq ma au ep am hlài?
Rìm ngè ŏi enh ca'nàm plình dìq bìac aih da Au.
12 “Au enh anoi bìac 'bài jènh haq, can dêh dìq jaq da haq,
wa bìac lem da dua chac hamac haq.
13 I cabô jah lêh đac da haq eo yôh ùh? I cabô nui bìt hlùh ca eo xam mem da haq ùh?
14 Cabô jah pèh kiang haq?
Hanenh haq broq loh can ramòt.
15 Cachep ŏi enh crŏng haq tìah ca khìan ŏi ta jang,
da-adàng ta-atoq dabau.
16 'Bài cachep aih raclep ca dabau xìa dìq jaq,
cayeo ùh jah 'mùt ta'ne.
17 Cachep cô hatop ca cachep tau,
hatop ca dabau, ùh jah talah.
18 Jò haq cachêh, loh 'ngah camlet,
baiq toq mat haq tìah ca mat mahì jò daxroq.
19 'Bài pla ùnh loh enh hacùng haq,
wa 'bài cato ùnh caprôh loh pôn pah.
20 Nhòi plôh loh enh mùh haq,
tìah ca gŏc tro wa ùnh baxù enh 'neq.
21 Hihèm haq cheo loh cachah
wa pla ùnh loh enh hacùng haq.
22 Ta ranŏng haq i can dêh,
can ramòt loh jang ngìa haq.
23 Dìq ca lòp xech haq cadoq wa hatop ca dabau,
cajap dìq jaq ùh jah daxìch.
24 Plì nòih haq cadoq tìah ca hmu,
cadoq ùh crài cleq ca apŏt ma 'neq da apao xai xam hmu.
25 Jò haq yòng, 'bài mangai tanuq xôq crè tarìt wì cadàu mot taiq yùq crè.
26 Jò wì yŏc chang gùm pàc haq, chang gùm ùh clech ca akia haq,
jaoq loq long hin hadai ùh broq cleq ca haq.
27 Haq ngan mem bu dàng hri,
ngan đùng bu dàng long bùc.
28 Rang panenh ùh broq ca haq cadàu mot;
hmu panenh troq haq bu dàng manùh 'mau.
29 Haq ngan long dùi bu dàng hri;
haq do pagôq ca atêh jaoq 'yoh.
30 Cliac pah enh 'neq haq i cachep caiq hin bu dàng ha'nah cabi;
chot loh teo ta taneh ròc jò haq moq lam, ùh crài cleq ca teo đình dŏng mùt ta long i 'bo dùng ta xàn len 'mau.
31 Jò haq glài ta diac, haq broq ca nòi jrùq tro tìah ca gŏc diac tôq;
broq ca diac raxìq loh tìah ca dàu tro ta abôq jò wì pai.
32 Enh cloh haq đòiq hlài teo camùh tabŏc;
Bèn jah xoh diac raxìq nhum tìah ca xàc co.
33 Ŏi ta crŏng taneh ùh i ca ngè leq ma tìah ca haq;
haq ùh loq crè.
34 Haq padèch dađeh yi hnao dìq ca ngè rôm;
haq broq bùa dìq dŏng ca 'bài ngè rôm.”