3
Dìq Ca Diac Èh 'Bìq Hadrah
1 “Cô, ta 'bài hì aih, wa 'nhòng aih,
jò Au ha'naoq hlài gùng Juđa wa Jê-ru-sa-lem,
2 èh Au gop hlài dìq dŏng 'bài jàn 'bài Diac
wa 'ràng wì haq loh trùh ta thòng tamang Jê-hô-sa-phat.
Ŏi ta aih, Au hadrah wì haq
taiq bìac wì haq khoi broq ca jàn Au, wa xinoi Au aih Is-ra-ên,
'bìq haprah hapriang ta rìm Diac;
wa lah axong taneh Au.
3 Wì pàih panàih axong jàn Au;
halìh con calô yŏc gu cadrì tango anang
wa tech con cadrì yŏc alac nho ôq.
4 “Ô Tirò wa Siđôn, wa dìq dŏng 'bài jàn da Phi-li-tin, pì i pajùm cleq ca Au? Pì enh tabroq chao ca Au 'mòh? Tàng pì enh tabroq chao ca Au, Au broq ca bìac tabroq chao ta-ùc hlài ta gàu pì renh wa tajòi 'mòi. 5 Taiq pì khoi tablah yŏc 'bac, wang da Au, wa 'ràng 'bài hang canaq 'bac da Au 'mùt ta hnem cùh waiq da pì. 6 Pì tech con calô Juđa wa Jê-ru-sa-lem ca mangai Hilap, broq ca wì haq hangai dèh ca gùng cla.
7 “Cô, Au padrìu wì haq yòng enh nòi pì ma tech wì haq, Au ùc hlài tôiq pì ta gàu cla pì. 8 Au tech con calô wa con cadrì pì mùt ta tì jàn Juđa; jàn Juđa tech wì haq ca mangai Sabê, ca mòiq Diac dìq jaq hangai.” Chuaq khoi doi 'màng aih.
9 Anoi 'noh bìac cô ca rìm jàn rìm Diac oq:
phai padon ca bìac tajêh poh,
padrìu 'bài mangai dêh padren.
Dìq ca 'bài lình tajêh glàm trùh,
wa mùt ta nòi tajêh beq!
10 Yŏc pla cai atèm broq chang,
yŏc pla haiq broq jaoq.
Mangai ìuq phai doi:
“Au cô mangai dêh!”
11 Rìm jàn, rìm Diac ŏi dudan,
renh trùh tagop ŏi ta aih.
Ôi Chuaq, xìn thê 'bài mangai dêh da Ìh loh ta aih beq!
12 “ 'Bài jàn 'bài Diac, yòng beq,
lam tŏc ta thòng tamang Jê-hô-sa-phat,
taiq nòi aih Au ha'ngui
đòiq hadrah dìq dŏng 'bài jàn 'bài Diac ma ŏi dudan.
13 Padon haiq beq đòiq hi gat,
ma jah 'màng aih 'mau khoi dùm.
Lam trùh len nho beq,
taiq hàm len nho khoi bình plì nho;
'bài thùng khoi halùih,
taiq tôiq ngang dù da wì haq bàc hrìn.”
14 Lù mangai bàc,
mangai dìq jaq bàc ta thòng tamang hadrah!
Ma jah 'màng aih hì da Chuaq khoi haten
ta thòng tamang hadrah.
15 Mahì wa khê loh ca clam,
'bài halŏng pi 'ngah.
16 Chuaq grenh bàu enh Siôn;
bàu Haq atêh loh enh Jê-ru-sa-lem;
'bài lòp plình wa jàp crŏng taneh dìq tadroq ra'nhùn.
Mahaq Chuaq, Haq nòi hanình da jàn Haq,
đôn cajap cajình ca con caiq Is-ra-ên.
17 “Jò aih pì jah loq Au cô Chuaq Boc Plình da pì;
Au ŏi ta Siôn, aih wang hadròih Au.
Jê-ru-sa-lem aih phôq hadròih,
mangai Diac 'noiq pi lam cwa haq hòm.
Juđa Jah Xôq Ramŏt
18 “Ta hì aih, 'bài bôi wang catôh loh alac nho nhim;
sùa hìu loh enh 'bài go,
dìq dŏng ca 'bài thòng diac ta Juđa jah i diac hìu loh dêh.
Mòiq xèm diac loh enh hnem Chuaq
pùc hajàh ca thòng tamang Sitim.
19 Aicàp loh ca wang wê,
Êđôm loh ca croh crenh,
taiq wì haq yŏc bìac ngang dù tabroq ca con jàn Juđa,
wa broq ta-ùc mahem mangai ùh broq tôiq ta taneh cla wì haq.
20 Mahaq Juđa jah ŏi trùh hloi hloi;
Jê-ru-sa-lem jah ŏi enh 'nhòng cô trùh 'nhòng 'noiq.
21 Au jah tabroq chao ca dòih mahem
ca wì haq ma Au 'nhòq tabroq.”
Taiq Chuaq ŏi ta Siôn.