22
Bàu Alìah Bìac Ban Ŏng Mai
(Luc 14:15–24)
1 Chuaq Jêxu hnài hòm wì xam bàu alìah, Haq doi: 2 “Diac Plình tìah ca mòiq ngai bùa ma broq hiniang ta'nèp am con calô haq. 3 Bùa thê dèh hapŏng lam doi ca 'bài mangai haq khoi akhen, thê wì trùh caq hiniang, mahaq wì ùh waq trùh.
4 “Bùa thê hapŏng ma 'noiq hòm lam, haq tanap: ‘Doi ca 'bài mangai Au ma khoi akhen ca wì caq hiniang, 'màng cô: Hiniang khoi padon gêh. Khoi broq jam 'bo wa jam 'bo con bech. Hiniang khoi padon gêh. Xìn pì lam caq oq.’
5 “Mahaq wì ùh tamàng. Mòiq ngai lam mòiq trong, mangai cô lam ta đùng, mangai tau lam atech. 6 I 'bài mangai 'noiq rùp hapŏng bùa, blai wì, khoi èh jêh đac. 7 Bùa loh nòih dìq jaq, thê lình haq lam jêh đac wì mangai dù aih wa bùh cađac phôq wì.
8 “Khoi ca aih bùa doi dèh ca 'bài hapŏng: ‘Hiniang khoi padon, mahaq 'bài mangai ma khoi akhen ùh đang ca caq hiniang cô. 9 'Màng cô, thê pì loh lam ŏi ti trong càn ta phôq, ùh kè ca glàm mangai leq, akhen wì lam trùh ta cô caq hiniang ta'nèp.’ 10 Hapŏng haq lam jàp trong phôq, ti gop dìq ca 'bài mangai wì ma glàm, ùh kè ca mangai 'màng leq, mangai lem loq mangai dù. Wì ha'ngui bình ca hnem caq hiniang ta'nèp.
11 “Bùa mùt ngan mangai caq hiniang, hnoq mòiq ngai ùh caxùnh eo hiniang ta'nèp. 12 Haq doi ca mangai aih: ‘Ê ôi, gleq ìh mùt ta cô ùh caxùnh eo hiniang ta'nèp?’ Mangai aih ùh tèo.
13 “Bùa thê dèh 'bài hapŏng: ‘Rùp càt jènh tì haq beq, cađac haq enh gùng nòi clam clôiq, aih nòi hmoi crò wa cadrit hanenh.’
14 “Ma jah 'màng aih i bàc mangai khoi jah creo, mahaq toq 'biaq ngai ma jah ràih.”
Bìac Am Thèq ca Sêsa
(Mŏc 12:13–17; Luc 20:20–26)
15 Khoi èh 'bài mangai Pha-ri-si pađim ca dabau, chaq trong đòiq bahlac Chuaq Jêxu ta bàu capoch da Haq. 16 Wì thê dèh mangai hŏc tiaq, wa toq 'biaq ngai, mangai tiaq bùa Hêrôt, lam bòch Chuaq: “Thài ôi, nhèn loq Ìh Mangai da bìac joq 'nàng, hnài wì trong Boc Plình joq 'nàng, ùh gen can mangai leq. 17 'Màng aih, xìn Ìh am nhèn loq: Khòh am thèq ca bùa Sêsa loq ùh?”
18 Chuaq loq ca manoh 'mèq da wì Haq, doi: “Ôi 'bài mangai bàu lem, manoh dù, gleq pì ma thù Au? 19 Am ca Au ngan mòiq hliac 'bac.” Wì am ca Haq mòiq hliac 'bac. 20 Haq doi ca wì: “ 'Mù cô 'mù cabô? Hiniq cô hiniq cabô?”
21 Wì doi: “Hiniq wa 'mù Sêsa.”
Chuaq Jêxu doi ca wì: “Thê pì am ca Sêsa bìac leq da Sêsa, am ca Boc Plình bìac leq da Boc Plình.”
22 Jò tàng bàu aih, wì hamàih ta manoh loh lam.
Bìac Rìh Hlài
(Mŏc 12:18–27; Luc 20:27–40)
23 Trom hì aih, i mangai Sa-đu-sê, aih mangai ma doi, ùh i ca can rìh hlài, lam haten ca Chuaq Jêxu bòch: 24 “Thài ôi, Môise i doi: Tàng i mangai cachìt, mahaq ùh i ca con, 'màng cô oh mangai aih, phai yŏc mai daq haq đòiq jah i con, hi wèq xinoi wì haq. 25 'Màng cô, i tapèh ngai oh daq. Mangai daq yŏc mai, khoi èh haq cachìt, mahaq ùh i ca con. Haq đòiq hlài dèh mai dèh ca oh. 26 Oh haq hadai cachìt, dìq ca wì oh daq, tapèh ngai cachìt dŏng. 27 Khoi èh, mangai cadrì aih hadai cachìt. 28 'Màng aih, jò rìh hlài, mangai cadrì cô broq mai cabô ŏi ta wì tapèh ngai oh daq, ma jah 'màng aih dìq ca wì khoi broq ŏng haq?”
29 Chuaq Jêxu tèo haq: “Pì khoi lac trong, taiq pì ùh loq ca Sech Hadròih, hadai ùh 'nì ca cwìang itai Boc Plình 'màng leq? 30 Ma jah 'màng aih jò wì rìh hlài, pi i ban ŏng mai, mahaq 'bài mangai ma jah rìh hlài, tìah ca 'bình plình ŏi ta plình. 31 Pì ùh lah đŏc bàu Boc Plình khoi anoi bìac rìh hlài enh mangai cachìt 'mòh? 32 ‘Au Boc Plình da Ap-ra-ham, Boc Plình da Isac, Boc Plình da Jacôp.’✡ 22:32 LEA 3:6. Boc Plình, ùh xài Boc Plình da mangai cachìt, mahaq da mangai rìh.”
33 Wì mangai bàc tàng bàu aih, wì hamàih ta manoh bìac hnài da Haq.
Ranenh ma Yi Nhet
(Mŏc 12:28–34; Luc 10:25–28)
34 Mangai Pha-ri-si tàng doi Chuaq Jêxu broq ca 'bài Sa-đu-sê pi i ca trong jah tèo Haq. Wì tagop dabau. 35 I mòiq ngai thài ranenh ŏi ta wì bòch bàu cô đòiq thù Chuaq:
36 “Thài ôi, ŏi ta Ranenh, bàu thê leq ma yi nhet?” 37 Chuaq Jêxu tèo Haq: “ ‘Ìh phai dìq ca manoh, dìq ca mahua yiang, dìq ca manoh hèm, loq waq ca Boc Plình, aih Boc Plình ìh.’✡ 22:37 RAH 6:5. 38 Aih bàu thê baxèm adroi wa yi nhet dŏng dìq. 39 Hadai 'màng aih, bàu thê baiq 'màng cô: ‘Thê ìh loq waq ca mangai haten hatìa tìah ca ìh loq waq ca dađeh.’✡ 22:39 Lêwi 19:1. 40 Dìq ca Sech Ranenh, wa Bàu Mangai Capoch Thai Boc Plình, hadai loh enh baiq bàu thê aih.”
Chuaq Jêxu Con Xau Bùa Đawit
(Mŏc 12:35–37; Luc 20:41–44)
41 Jò wì mangai Pha-ri-si tagop ti dabau, Chuaq Jêxu bòch wì: 42 “Chuaq Crich, pì hèm 'màng leq? Haq Con cabô?” Wì tèo: “Haq Con Xau bùa Đawit.”
43 Chuaq Jêxu doi ca wì haq: “Tàng 'màng aih, gleq bùa Đawit nhò Yiang Hadròih creo Crich, Chuaq. Haq doi:
44 “ ‘Chuaq doi ca Chuaq au:
“Ìh ha'ngui ti pah 'ma Au beq,
trùh jò Au đòiq wì ma git ca Ìh
enh 'neq ca jènh Ìh.” ’✡ 22:44 BCP 110:1.
45 'Màng aih, tàng Đawit creo Haq Chuaq, 'màng leq Haq jah Con Xau bùa Đawit?” 46 Ùh mangai leq jah tèo Haq. Pàng hì aih, pi i mangai leq hùa bòch Haq hòm.