11
Achùa Bìac Ta-atoq Wa Can Ngang Dù
1 Chuaq ramòt ca kìq ùh troq;
mahaq kìq troq broq ca Haq lem bùi.
2 Jò can catèh trùh, bìac camaih hadai trùh;
mahaq bìac khôn rabiaq ŏi ti mangai loq paha'neq dađeh.
3 Manoh broq lem jang da 'bài mangai lem jang ajènh trong ca wì haq;
mahaq bìac loq blàq da mangai ngang dù raliang đac wì haq.
4 Ta hì xrông, cùng hang ùh i ca lòiq cleq;
mahaq bìac ta-atoq jah dŏih claih khoi ca can cachìt.
5 Bìac ta-atoq da mangai gêh tôm broq tamang ca trong haq;
mahaq bìac ngang dù da mangai ngang dù broq ca cla haq tacro.
6 Bìac ta-atoq da 'bài mangai lem jang jah dŏih claih wì haq;
mahaq mangai loq blàq 'bìq hlac dèh ta bìac loq ham cla.
7 Jò mangai dù cachìt, bìac ngèh enh da haq hadai hnhung;
wa bìac ngèh gòm da mangai i can dêh hadai hnhung.
8 Mangai rìh ta-atoq jah dèch claih khoi ca can ranàc;
khoi èh mangai ngang dù clìh ta aih thai ca haq.
9 Mangai dù yŏc hacùng bàu capoch broq raliang dèh ca bùa haten;
mahaq mangai rìh ta-atoq nhò can loq 'nì jah dèch claih.
10 Jò rìm bìac jah broq loh lem ca mangai rìh ta-atoq, dìq ca phôq lem bùi,
wa jò mangai dù 'bìq hù hnhung, wì breo bàu dêh lem bùi.
11 Nhò xôq ramŏt da mangai lem jang, phôq jah padèch;
mahaq taiq hacùng mangai dù, phôq 'bìq tacro.
12 Cabô khìn dèh bua ŏi haten, aih mangai ùh i manoh hèm troq,
mahaq mangai i manoh loq 'nì ŏi hatenh.
13 Mangai ùh hlèp bàu pa'noh bìac hlèp;
mahaq mangai i manoh đang ca lùi canòm, wèq hlèp bìac hlèp.
14 Mangai jàn tacro taiq ùh i ca mangai wèq cwìang 'nong wì haq,
mahaq nhò bàc mangai tah bàu, jah ta'blêq.
15 Mangai leq yòng pagàu thai ca mangai ùh canao èh jah pòq can nan xa;
mangai leq git ca bìac yòng pagàu thai jah catèm, ùh hìaq i hiniq cleq.
16 Gu cadrì i manoh khôn khaoq jah nhàn tìang 'bang;
gu calô dù dang jah i toq cùng hang.
17 Mangai i manoh loq xa-ŏch broq lem ca dađeh;
mangai dù dang broq baxa ca dađeh.
18 Mangai broq dù jah yŏc cùng abroq 'nùt;
mahaq mangai leq rai bìac ta-atoq jah cùng joq 'nàng.
19 Mangai leq cajap manoh caq ŏi ta-atoq jah nhàn can rìh,
mahaq mangai leq tiaq trong dù broq ca dađeh cachìt.
20 Chuaq ramòt ca mangai i manoh amòng 'nùt,
mahaq Haq lem bùi ca mangai leq lam trong ùh i ca bìac leq trech.
21 Joq 'nàng mangai ngang dù ùh claih ca bìac baxa;
mahaq xinoi mangai rìh ta-atoq jah dèch claih.
22 Mangai gu cadrì lem hadrò mahaq ùh rabiaq,
tìah ca canhàng wang axràng ti mùh chùa.
23 Bìac ngèh enh da mangai rìh ta-atoq aih bìac lem;
mahaq ngèh gòm da mangai dù, aih can nòih.
24 Mangai leq loq rai 'noh dèh cùng hang, èh jah hlài yi bàc;
hadai i mangai ùh 'noh am cleq ma khòh am, èh jah 'bìq thìuq.
25 Manoh loq tabàih rùng rai jah padrŏng can;
cabô am ca wì ôq diac, haq jah i diac ôq.
26 Mangai leq tŏng đòiq dèh 'mau, èh 'bìq jàn waiq hanip,
mahaq mangai leq tech 'noh 'mau jah xôq ramŏt.
27 Cabô yŏc manoh panim chaq trong broq troq, jah bìac am dech,
mahaq cabô chaq trong dù, èh bìac dù trùh ca haq.
28 Mangai leq lùi canòm dèh cùng hang, èh tacro,
mahaq mangai rìh ta-atoq jah rìh tìah ca hla xenh.
29 Cabô broq xa dèh ca hnem cla, ùh jah nhàn yŏc cleq,
mahaq mangai ranhùa ep broq hapŏng ca mangai i manoh khôn rabiaq.
30 Plì da mangai rìh ta-atoq aih plì can rìh;
mangai khôn rabiaq jah ahlài bàc mahua yiang.
31 Tàng mangai rìh ta-atoq jah hùang bìac am dech jò ŏi ta crŏng taneh,
èh i bìac 'màng leq loh ca mangai tôiq ngang dù?