12
Achùa Bìac Ta-atoq Wa Can Ngang Dù
1 Cabô loq enh ca bìac baxa hnài, hadai loq enh ca can loq 'nì;
mangai git ca bìac lech tagàih aih mangai blùng.
2 Mangai lem manoh jah nhàn bìac lem enh Chuaq;
mahaq Chuaq ta'mòq tôiq ca mangai ma tình ca broq bìac dù.
3 Con mangai ùh xài nhò ngang dù jah cajap;
mahaq riah da mangai rìh ta-atoq ùh hìaq tadroq.
4 Mangai mai lem manoh aih cadoh i 'bang ca ŏng haq;
mahaq mangai mai broq camaih, ùh crài cleq ca bùc ta caxènh haq.
5 Manoh hèm da mangai ta-atoq aih ta-atoq;
mahaq trong hèm da mangai dù dìq loq 'nùt.
6 'Bài bàu mangai ngang dù rap gòm broq ta-ùc mahem;
mahaq hacùng mangai lem jang dŏih claih dađeh.
7 Mangai ngang dù 'bìq jêh tacro, wì haq pi ŏi i;
mahaq hnem da mangai ta-atoq jah ŏi cajap.
8 Mangai jah manè nhò bìac rabiaq cla haq;
mahaq mangai i manoh 'mèq 'mac jah 'bìq khìn đac.
9 Tàng mangai ùh i wì padèch toq leq mahaq i hapŏng,
aih lem yi hnao ca mangai padèch dađeh mahaq thìuq ca dahwèq caq.
10 Mangai ta-atoq loq wèq ngan dèh 'bài ngè aban;
mahaq manoh xa-ŏch da mangai ngang dù aih bìac dù.
11 Cabô abèq dèh taneh jah dahwèq caq i rah;
mahaq mangai lam broq bìac ùh i lòiq cleq, aih mangai thìuq manoh hèm troq.
12 Mangai ngang dù ham ca cùng hang da mangai dù;
mahaq riah da mangai ta-atoq loh riang plì.
13 Mangai dù hlech gùi taiq 'bài tôiq lôi da blìa hacùng;
mahaq mangai ta-atoq claih khoi ca bìac nan xa.
14 Mangai jah bình halùih xôq ramŏt nhò riang plì da hacùng cla;
wa rìm ngai jah ca'naih hlài taiq bìac tì cla wì khoi broq.
15 Mangai blùng xoh trong lam dađeh troq,
mahaq mangai khôn rabiaq tamàng bàu pariaq hnài.
16 Mangai blùng renh nòih,
mahaq mangai rabiaq bàng dèh can camaih.
17 Mangai leq capoch bàu joq 'nàng, anoi 'noh bìac troq;
mangai anoi hlài 'nùt, pa'noh bìac amòng.
18 I mangai capoch bàu ùh hèm ta manoh, aih tìah ca chang gùm pàc hlùh;
mahaq rapet da mangai khôn rabiaq tìah ca jreo jah broq brêh.
19 Blìa hacùng capoch bàu joq 'nàng jah cajap hloi hloi;
mahaq rapet amòng jah mòiq rahyàc hêq.
20 Bìac 'nùt ŏi ta manoh mangai tình ca broq bìac dù;
mahaq 'bài mangai pariaq hnài bìac catèm, wì jah bùi.
21 Ùh i ca mòiq nan xa leq loh troq ca mangai ta-atoq;
mahaq mangai ngang dù jah bình bìac nan xa.
22 Blìa hacùng capoch amòng broq ramòt ca Chuaq;
mahaq mangai broq bìac wèq dèh manoh jah lem manoh Haq.
23 Mangai wèq dèh manoh hèm cadoc bìac cla loq;
mahaq mangai blùng anoi 'noh dèh bìac ranhùa.
24 Tì mangai panim jah wèq cwìang;
mahaq tì mangai aroh ep broq hapŏng dìch.
25 Bìac hlè lèt ta manoh mangai broq loh xalep;
mahaq mòiq nà bàu lem broq ca manoh lem bùi.
26 Mangai ta-atoq 'nong trong dèh ca bua ma ŏi haten ca haq;
mahaq trong da mangai dù broq ca wì lam lac.
27 Mangai aroh ùh bùh jam khoi jah axan;
mahaq manoh panim da mangai, aih cùng hang lem canaq da haq.
28 Ta trong ta-atoq i can rìh;
lam ta trong aih ùh i can cachìt.