13
Achùa Bìac Ta-atoq Wa Can Ngang Dù
1 Con calô khôn rabiaq tamàng bàu hnài baxa da baq;
mahaq mangai jù lê ùh enh tamàng bàu tagàih lech.
2 Nhò riang plì da hacùng cla, haq jah hùang bìac lem;
mahaq mahua yiang mangai dù caq bìac dù.
3 Mangai padràng dèh hacùng bàu, jah wèq dèh can rìh;
mahaq mangai bàc bàu, èh 'bìq raliang piang.
4 Manoh mangai aroh ngèh enh, mahaq ùh jah cleq;
mahaq manoh mangai panim aih jah panàc.
5 Mangai ta-atoq git bàu amòng;
mahaq mangai ngang dù broq bìac ramòt wa bìac camaih.
6 Bìac ta-atoq wèq ban mangai caq ŏi lem jang;
mahaq tôiq lôi pacro mangai ngang dù.
7 I mangai broq tìah ca mangai padrŏng can, mahaq ùh i ca cah cleq;
hadai i mangai broq tìah ca mangai pa, mahaq i cùng hang bàc.
8 Jaq rŏt hlài 'nhòng rìh mangai, aih cùng hang da mangai aih;
mahaq mangai pa ùh crè ca tamàng bàu hacam.
9 Can rìh da mangai ta-atoq xreo 'ngah;
mahaq đen da mangai dù pat đac.
10 Manoh padèch dađeh toq loh bìac tarahen;
mahaq bìac khôn rabiaq ŏi ti mangai chìuq tamàng bàu hnài pariaq.
11 Cùng hang jah yŏc tiaq broq jŏng, aih renh hnhung đac;
mahaq cabô 'noh tì abroq, jah tagop bàc tam cùng hang.
12 Bìac ngèh gòm 'bìq tàt khech broq ca manoh jìq;
mahaq jò bìac ngèh gòm jah wìa, aih tìah ca long can rìh.
13 Mangai leq khìn đac bàu hnài, mangai aih jah 'bìq hadrah;
mahaq cabô iu crè ca bàu thê, mangai aih jah cùng baha.
14 Bàu hnài da mangai khôn rabiaq, aih xèm can rìh;
mangai tamàng tiaq jah tawìh claih ca hlàp can cachìt.
15 Bìac loq 'nì joq 'nàng, aih bìac am dech;
mahaq trong da mangai i manoh ùh lùi jah glàm xalep.
16 Dìq mangai wèq dèh manoh hèm broq tiaq trong loq 'nì;
mahaq mangai blùng pa'noh dèh bìac ranhùa.
17 Mangai ngang dù 'ràng bàu dù jah glàm bìac ranàc;
mahaq mangai 'ràng bàu wèq dèh manoh, haq 'ràng bìac broq brêh.
18 Cabô ùh tamàng bìac hnài pariaq, èh 'bìq pa wa camaih;
mahaq mangai leq tamàng bàu tagàih lech jah padèch.
19 Bìac ngèh enh jah wìa bìac nhim ca mahua yiang;
mahaq ramòt ca mangai blùng đòiq cađac bìac ngang dù.
20 Cabô lam pajùm ca mangai khôn rabiaq jah wìa mangai khôn rabiaq;
mahaq mangai broq bua ca mangai blùng jah 'bìq raliang piang;
21 Bìac jìq xa hnan tiaq mangai i tôiq;
mahaq mangai ta-atoq jah i cùng baha padrŏng can.
22 Mangai lem đòiq hlài cùng hang dèh ca con xau;
mahaq cùng hang da mangai i tôiq jah tagop đòiq am ca mangai ta-atoq.
23 Ta taneh đòiq clôi da mangai pa i bàc dahwèq caq;
mahaq bìac ùh lem jang hwit đac dahwèq aih.
24 Mangai leq loq ùh 'mèm ca wê long roi, aih git dèh ca con;
mahaq cabô loq waq dèh ca con, haq panim baxa hnài dèh con.
25 Mangai ta-atoq i tôm tàu đòiq jah caq panàc;
mahaq cliac mangai ngang dù jah pangot.