14
Achùa Bìac Ta-atoq Wa Can Ngang Dù
1 Mangai gu cadrì khôn rabiaq wèq dèh hnem cla;
mahaq mangai gu cadrì blùng 'noh tì raliang đac dèh hnem cla.
2 Mangai rìh lem jang crè yùq ca Chuaq;
mahaq mangai tiaq trong tawech khìn đac Haq.
3 Ta hacùng mangai blùng i long roi đòiq blai bìac loq catèh;
mahaq blìa hacùng mangai khôn rabiaq wèq gagè haq.
4 Ŏi ta leq ùh i ca 'bo, ta aih cadrong ŏi dech,
mahaq nhò padren 'bo jah i lòiq bàc.
5 Mangai anoi hlài wèq dèh bàu, ùh capoch amòng;
mahaq mangai anoi hlài 'nùt hloh bàu amòng.
6 Mangai capoch bàu halê chaq khôn rabiaq,
mahaq ùh glàm; mahaq mangai i can loq 'nì, haq xùang ca glàm.
7 Wia hangai ca mangai blùng,
taiq ìh ùh hŏc jah can loq 'nì nòi hacùng haq.
8 Khôn rabiaq da mangai rabiaq, aih đòiq 'nì loq dèh ca trong cla;
mahaq bìac blùng da mangai blùng, aih bìac 'nùt.
9 Mangai blùng palèu do ca bìac tôiq lôi;
mahaq mangai lem jang jah xôq ramŏt da Chuaq.
10 Manoh cla canao loq bìac jìq xa da manoh;
mangai tamoi broi ùh jah axong bìac lem bùi da haq.
11 Hnem da mangai ngang dù jah raliang đac,
mahaq traiq da mangai lem jang jah i lòiq.
12 I mòiq toq trong ngan haq tìah ca troq tajì am ca mangai;
mahaq trùh pulùch aih trong cachìt.
13 'Nhac ca hacùng do, manoh xôq mango;
wa pulùch bìac bùi i bìac mango càn.
14 Mangai i manoh loq enh cađac manoh lùi nòi Boc Plình, haq jah panàc dèh ca bìac cla haq;
mahaq mangai lem jah bùi nhò dèh bìac cla haq.
15 Mangai blùng lùi rìm bàu wì capoch;
mahaq mangai khôn rabiaq wèq dèh manoh hèm ca 'bài cadiang cla.
16 Mangai khôn rabiaq crè wa wia khoi ca bìac yat;
mahaq mangai blùng loq calèuq wa loq tamùa pùa.
17 Mangai renh nòih broq loh bìac ranhùa,
wa mangai tình trong pađim jah 'bìq wì git.
18 Mangai blùng jah nhàn bìac blùng;
mahaq mangai khôn rabiaq jah côi cadoh i 'bang xam can 'nì loq.
19 Mangai ngang dù jah hacùn cràng jang ngìa mangai lem,
wa mangai dù cùp gàu enh ngìa ca 'mang mangai ta-atoq.
20 Mangai pa 'nhac ca mangai haten hatìa xôq git ca haq;
mahaq mangai padrŏng can i bàc ngai broq bua.
21 Cabô khìn đac dèh mangai haten hatìa, aih khoi broq tôiq;
mahaq mangai loq xa-ŏch ca mangai pa jah i manoh bùi.
22 Mangai tình ca broq trong ngang dù ma ùh lam lac 'mòh?
Mahaq manoh lem wa bàu joq 'nàng ŏi pah mangai broq lem.
23 Ta bìac abroq dìq i lòiq;
mahaq bàu dech toq 'ràng trùh bìac pa.
24 Can padrŏng aih cadoh i 'bang ca mangai khôn rabiaq,
mahaq bìac ranhùa da mangai blùng aih bìac ranhùa.
25 Mangai anoi hlài bàu joq 'nàng jah dèch claih can rìh ca bàc ngai,
mahaq mangai leq capoch amòng toq broq blàq blènh.
26 Mangai leq loq crè ca Chuaq jah i nòi canòm nhò hagao;
con caiq Haq jah i nòi hanình canòm.
27 Bìac loq crè ca Chuaq aih xèm diac plôh can rìh,
đòiq broq ca wì claih ca ralŏc can cachìt.
28 Mangai jàn bàc, aih can 'ngah 'ngai da bùa; mangai jàn 'biaq,
aih broq ca mangai wèq cwìang raliang.
29 Mangai leq ùh hìaq renh nòih aih can rabiaq càn;
mahaq cabô loq renh nòih aih padèch bìac ranhùa.
30 Manoh catèm aih broq can rìh da chac hamac,
mahaq bìac tagit broq ca caxènh bùc bach.
31 Mangai leq padit padiang mangai pa, aih broq camaih ca Boc Plình ma broq loh haq;
mahaq cabô xa-ŏch ca mangai pa aih padèch Haq ma broq loh haq.
32 Mangai dù 'bìq tacro dèh ta bìac ngang dù cla;
mahaq mangai ta-atoq ta jò cachìt xôq i nòi hanình canòm.
33 Bìac khôn rabiaq ŏi ta manoh mangai loq 'nì;
mahaq ta manoh mangai blùng chaq ùh hnoq bìac aih.
34 Bìac ta-atoq broq ca Taneh Diac jah padèch; mahaq tôiq lôi aih bìac camaih ùh kè ca jàn leq.
35 Bùa am bìac lem ca hapŏng leq caq ŏi khôn rabiaq;
mahaq can nòih bùa tajraq hlài ca mangai broq loh bìac camaih.