15
Achùa Bìac Ta-atoq Wa Can Ngang Dù
1 Bàu tèo èm ai broq baxùai ca can nòih;
bàu brùaq broq loh ca nòih tam.
2 Rapet mangai khôn rabiaq anoi 'noh can loq 'nì;
mahaq hacùng mangai blùng hloh toq bàu blùng.
3 Mat Chuaq ŏi jàp rìm nòi,
hamòt ngan bìac ngang dù wa bìac lem.
4 Rapet khôn tìah ca mòiq toq long can rìh;
mahaq rapet ngang dù broq raliang ca manoh.
5 Mangai blùng khìn đac bàu pariaq baxa da baq;
mahaq cabô wèq tiaq bàu tagàih lech jah wìa mangai khôn rabiaq.
6 Ta hnem mangai ta-atoq i bàc hang canaq;
mahaq dahwèq da mangai ngang dù i bìac manhài.
7 Blìa hacùng mangai khôn rabiaq anoi 'noh can loq 'nì;
mahaq manoh mangai blùng ùh 'màng aih.
8 Ngè tadreo da mangai ngang dù broq ramòt ca Chuaq;
mahaq bàu waiq khàn da mangai lem jang jah bùi manoh Haq.
9 Trong da mangai ngang dù, aih broq ramòt ca Chuaq;
mahaq Haq loq waq ca mangai leq tiaq bìac ta-atoq.
10 Baxa hlàc jah 'noh ca mangai leq cađac trong lem jang;
cabô tagit ca bàu tagàih lech jah cachìt.
11 Ralùng Hanang wa Nòi Ùnh Baxa Chuaq xôq hnoq ro rang,
ùh dùh dèh manoh con mangai!
12 Mangai capoch jù lê ùh enh ca wì tagàih lech ca dađeh;
haq ùh enh trùh ta mangai khôn rabiaq.
13 Manoh bùi broq ca hadrò lem bùi;
mahaq jò manoh mango, manoh loh ca hŏnh.
14 Manoh mangai rabiaq ti chaq can loq 'nì;
mahaq hacùng mangai blùng ban dađeh xam bìac ranhùa.
15 Manoh mangai mango glàm bìac nan xa rìm hì;
mahaq manoh lem bùi caq hiniang yôt yôt.
16 Tha 'biaq cùng hang mahaq iu crè ca Chuaq,
yi hnao ca bàc cùng hang mahaq bìac lèt yôt.
17 Tha mòiq cadop cachiq mahaq i can loq waq,
yi hnao ca caq 'bo bech mahaq i bìac tagit.
18 Mangai loq nòih broq loh talech tacai;
mahaq mangai ùh hìaq renh nòih broq brêh ca bìac tarahen.
19 Trong da mangai aroh tìah ca pagia hila;
mahaq trong da mangai lem jang jah tamang.
20 Mangai con khôn rabiaq broq dèh baq bùi manoh;
mahaq mangai con blùng khìn đac dèh miq.
21 Mangai ùh i manoh hèm ngan, lem bùi ca bìac blùng;
mahaq mangai khôn rabiaq cadiang lam tiaq trong jang.
22 Tàng ùh i ca bàu hatình adroi, bìac broq aih jah 'bìq raliang;
nhò i bàc ngai tah bàu, bìac aih jah gêh.
23 Bàu tèo hlài troq aih bìac lem bùi,
wa bàu capoch troq jò, jah broq lem dìq jaq!
24 Trong lam da mangai khôn rabiaq 'nong trùh nòi can rìh,
đòiq wia khoi ca ralùng hanang ti ha'neq.
25 Chuaq raliang đac hnem mangai loq catèh;
mahaq broq cajap 'bài acang da mangai hadrô.
26 'Bài trong dù broq ramòt ca Chuaq;
mahaq bàu capoch lem aih hadròih.
27 Mangai ham ca cùng hang wì, broq manhài dèh ca hnem cla;
mahaq mangai leq git ca ngè rŏt manoh èh jah rìh.
28 Manoh mangai ta-atoq hèm ta manoh adroi ca tèo;
mahaq hacùng da mangai ngang dù hloh bàu dù.
29 Chuaq ŏi hangai ca mangai ngang dù;
mahaq Haq tamàng bàu waiq khàn da mangai ta-atoq.
30 Can 'ngah da mat broq ca manoh lem bùi;
wa mòiq nà bàu lem broq ca caxènh dêh gang.
31 Mangai leq tamàng bàu tagàih lech broq loh can rìh,
jah ŏi ta 'bài mangai khôn rabiaq.
32 Cabô ùh tamàng bàu hnài pariaq aih khìn đac ca dađeh,
mahaq cabô tamàng bàu hnài pariaq haq jah can khôn rabiaq.
33 Bìac yùq crè ca Chuaq hnài aih trong khôn rabiaq;
bìac loq paha'neq dađeh lam adroi, bìac jah padèch tiaq atìq.