16
Achùa Bìac Ta-atoq Wa Can Ngang Dù
1 Tình ta manoh aih bìac da con mangai;
mahaq Chuaq am bàu tèo troq.
2 'Bài trong da mangai dìq lem hadròih ta mat cla;
mahaq Chuaq loq ma ro manoh enh cleq 'nong haq.
3 Anoi 'noh dèh bìac broq ca Chuaq beq,
èh 'bài trong tình da con jah gêh lem.
4 Chuaq broq loh rìm bìac dìq i tiaq trong pachì da Haq;
mahaq mangai dù đòiq 'noh ca hì ranàc.
5 Cabô i manoh catèh, aih broq ramòt ca Chuaq,
joq 'nàng haq ùh claih ca 'bìq baxa.
6 Nhò can xa-ŏch xam manoh loq waq wa bàu joq 'nàng tôiq lôi jah rŏt dèch hlài;
wa nhò bìac iu crè ca Chuaq mangai jah wia enh bìac dù.
7 Jò trong lam da con mangai lem manoh Chuaq,
Haq broq ca 'bài mangai ma tagit ca mangai aih jah trah hatroq ca haq.
8 Tha 'biaq cùng hang mahaq rìh ta-atoq,
yi hnao ca bàc cùng hang mahaq rìh ùh ta-atoq.
9 Manoh mangai tình dèh trong lam da cla;
mahaq Chuaq ma 'nong 'bài cadiang da haq.
10 Bàu da Chuaq ŏi ti blìa hacùng bùa;
hacùng haq ùh khòh hadrah ùh troq jò haq hadrah.
11 Kìq wa maiq kìq troq aih da Chuaq;
rìm toq plì kìq ta 'bao aih bìac da Haq.
12 Broq ngang dù aih bìac ramòt ca 'bài bùa,
taiq nhò bìac ta-atoq Taneh Diac jah cajap.
13 Hacùng pa'noh bàu ta-atoq, aih bìac lem bùi ca bùa;
haq loq waq mangai capoch lem jang.
14 Can nòih da bùa ùh crài cleq ca mangai 'ràng trùh bìac cachìt;
mahaq mangai khôn rabiaq broq ca haq ngach.
15 Jò hadrò bùa 'ngah, aih rìh;
bìac am dech da haq ùh crài cleq ca yùc 'ràng trùh mè jò denh.
16 Jah khôn rabiaq, yi hnao ca jah wang,
wa jah yŏc can 'nì loq yi hnao ca jah 'bac jèn.
17 Trong da mangai lem jang, aih cađac bìac dù;
cabô wèq dèh trong, aih wèq dèh mahua yiang.
18 Bìac catèh lam adroi ca bìac raliang
wa manoh catèh lam adroi ca bìac tacro.
19 Tha paha'neq manoh dađeh ŏi ti mangai paha'neq dađeh,
yi hnao ca axong cùng hang atùng ti mangai catèh.
20 Cabô wèq tiaq bàu Chuaq chaq jah bìac lem;
wa cabô canòm ca Chuaq jah xôq ramŏt.
21 Cabô i manoh khôn rabiaq jah doi aih mangai loq 'nì,
wa mangai capoch bàu jìang aih broq tam bìac panhet.
22 Mangai jah i can khôn rabiaq, aih mangai i xèm can rìh;
mahaq pariaq hnài mangai blùng, aih 'ngwan.
23 Manoh mangai khôn rabiaq hnài dèh hacùng cla,
wa jah tam bìac panhet ca blìa hacùng cla.
24 Bàu capoch èm ai tìah ca diac xùt broq nhim ca mahua yiang,
wa broq dêh ca caxènh.
25 I mòiq toq trong ngan tìah ca troq am ca con mangai;
mahaq trùh pulùch haq loh trong cachìt.
26 Cliac pangot broq ca wì loq enh abroq,
taiq hacùng haq parông haq broq.
27 Mangai 'mèq manoh tình ca broq trong dù;
ta hacùng haq tìah ca i ùnh cheo dêh.
28 Mangai loq 'nùt broq loh bìac tagìq,
wa mangai capoch jù atùng broq talah đac 'bài bua ma trah troq.
29 Mangai dù padô dèh bua cla
wa ajèn haq mùt ta trong ùh lem.
30 Mangai ca'nhip mat
wa mangai bàng dèh hacùng aih khoi tình ca broq trong dù.
31 Xàc co aih cadoh i 'bang 'ngah 'ngai
am ca mangai lam trong ta-atoq.
32 Mangai ùh hìaq renh nòih lem yi hnao ca mangai i padren dêh;
wa cabô nui wèq dèh manoh cla, aih lem yi hnao ca mangai tablah yŏc phôq.
33 Wì pàih panàih enh trom ca eo;
mahaq rìm bìac pajaq, aih enh Chuaq.