17
Achùa Bìac Ta-atoq Wa Can Ngang Dù
1 Tha mòiq ca'net 'benh croh, caq ŏi trah hatroq,
yi hnao ca hnem i hiniang càn mahaq tarahen ca dabau.
2 Mangai hapŏng khôn rabiaq jah wèq cwìang enh 'nhèq con calô ma broq 'mèq 'mac,
wa jah hùang xôxech ti 'bài oh daq ta hnem aih.
3 Gŏc đòiq pai 'bac, wa tanùh đòiq bùh wang;
mahaq Chuaq thù manoh da mangai.
4 Mangai broq dù panim ca tamàng hacùng bàu ngang dù;
mangai capoch amòng halang don tamàng bàu rapet đùc đac.
5 Cabô palèu mangai pa, haq broq camaih ca Boc Plình ma broq loh haq;
cabô lem bùi ca bìac ranàc haq ùh jah claih ca bìac baxa.
6 Con xau aih cadoh i 'bang da mangai khoi craq;
bìac 'ngah 'ngai da con caiq, aih mangai baq.
7 Bàu lem ùh 'nang lem ca mangai blùng,
ùh dùh dèh bàu amòng ma 'nang lem ca 'bài mangai broq con bùa.
8 Ngè rŏt manoh broq bùi manoh ca mangai ma am haq;
'nhac ca lam pah leq, haq xôq jah i lòiq.
9 Mangai leq bahlèp tôiq lôi, haq chaq bìac xa-ŏch,
mahaq cabô ràu lam ràu hlài bìac broq aih, èh talah dèh bua.
10 Bàu tagàih lech mùt jrùq ta mangai ma i can loq 'nì,
yi hnao ca bình hrinh 'mang blai mùt ta mangai blùng.
11 Mangai blàq blènh chaq toq trong ngang dù,
taiq 'màng aih jah thê bìac dù trùh ta haq.
12 Tha wì glàm higàu hnhung ca con,
yi hnao ca glàm mangai blùng ta bìac ranhùa da haq.
13 Mangai leq yŏc bìac dù đòiq ca'naih hlài bìac lem,
èh bìac ranàc ùh wia khoi enh hnem haq.
14 Baxèm bìac ta'miaq tìah ca achoh haboh diac;
'màng aih phai hêq ca tarahen adroi ca jò haq padah.
15 Hadrah doi mangai dù ta-atoq, wa ta'mòq tôiq mangai ta-atoq,
dìq baiq aih ramòt ŏi jang ngìa Chuaq.
16 Gleq mangai blùng wê 'bac ta tì đòiq rŏt khôn rabiaq
taiq haq ùh jah hèm troq?
17 Cabô xa-ŏch ca mangai pa, aih am wai ca Chuaq,
Haq jah am hlài xôq ramŏt wa bìac lem da mangai aih.
18 Joq 'nàng blùng tàng yòng pagàu
đòiq ca'naih dòih ca mangai ŏi haten hatìa.
19 Cabô loq enh ca bìac ta'miaq, loq waq tôiq lôi;
cabô padèch dađeh wa broq panàt ha'nhèq, aih đìh yŏc bìac ranàc.
20 Mangai leq i manoh hèm tawech, ùh chaq jah xôq ramŏt;
cabô capoch bàu 'mèq 'mac jah mùt ta bìac ranàc.
21 Cabô xa-ông con blùng jah mango;
baq da mangai blùng ùh jah lem bùi.
22 Manoh lem bùi aih raq jreo lem xìt;
manoh hŏnh broq ca caxènh croh hŏnh.
23 Mangai ngang dù nhàn hlèp ngè rŏt manoh
đòiq broq ùh troq 'bài trong hadrah.
24 Bìac khôn rabiaq ŏi jang ngìa mangai 'nì loq;
mahaq mat mangai blùng ha'miang ngan nòi pulùch da crŏng taneh.
25 Gu radam blùng broq mango dèh baq;
wa broq pagau pagùa ca miq ma xa-ông ca haq.
26 Baxa mangai ùh broq tôiq, aih bìac ùh troq;
hadai ùh troq tàng jêh mangai ma broq bìac troq jang.
27 Mangai leq capoch caq loq amàn dèh bàu, haq i can loq 'nì,
wa mangai leq àt dèh manoh, aih mangai loq 'nì.
28 Jò àt haten, 'nhac ca mangai blùng, hadai jah doi haq mangai khôn;
jò haq bàt dèh hacùng, jah doi haq loq wèq dèh manoh hèm.