18
Achùa Bìac Ta-atoq Wa Can Ngang Dù
1 Mangai leq lah crài dađeh chaq bìac haq ngèh enh,
haq tarahen hlài dìq ca bìac khôn rabiaq.
2 Mangai blùng ùh lem bùi ca bìac loq 'nì,
mahaq toq enh pa'noh dèh manoh hèm da haq 'màng leq.
3 Jò mangai ngang dù trùh, bìac khìn hadai trùh;
bìac ùh loq iu trùh, bìac jù lê hadai trùh.
4 Bàu capoch da hacùng mangai tìah ca diac jrùq;
diac tamŏc da can khôn rabiaq, aih diac hŏc hìu loh.
5 Gen can mangai dù aih ùh lem;
khèa đac mangai ta-atoq jò tình hiniq aih ùh troq.
6 Blìa hacùng mangai blùng broq loh bìac tarahen,
wa hacùng haq toq akhen ca bìac jêh blai.
7 Hacùng mangai blùng broq ca cla haq tacro;
blìa hacùng haq, aih rahoch ca mahua yiang cla haq.
8 Bàu da mangai loq capoch bàc bàu tìah ca dahwèq caq jìang,
ngè aih mùt hloi ta cliac.
9 Mangai alah dèh bìac broq,
haq hadai oh daq ca mangai broq raliang.
10 Hiniq Chuaq aih hnem hin bôi cajap cajình;
mangai ta-atoq jah cadàu trùh èh jah hanình.
11 Cùng hang da mangai padrŏng can, aih phôq cajap da haq,
ta gàu ngoc haq hèm aih panàt ha'nhèq;
12 Manoh catèh lam adroi ca bìac raliang piang;
mahaq bìac paha'neq dađeh lam adroi ca bìac padèch.
13 Cabô tèo bàu adroi ca dađeh tamàng,
aih bìac ranhùa wa camaih ca cabô broq 'màng aih.
14 Yiang da mangai broq ca cla haq jah ta'blêq ca can ùh hrŏc dađeh;
mahaq jò yiang haq loh ca hŏnh, haq ùh nui chìuq.
15 Mangai wèq dèh manoh hèm jah nhàn can loq 'nì,
wa don mangai rabiaq chaq can loq 'nì.
16 Bìac tabàih da mangai leq don trong am ca mangai aih,
wa 'nong haq trùh jang ngìa mangai rahù.
17 Mangai yòng adroi anoi 'noh, bàu aih xoh troq;
trùh jò i mangai crài trùh ngan thù haq.
18 Bìac pàih panàih padìq bìac takìan,
wa hatình bìac ta'ne 'bài mangai i cwìang.
19 Yŏc hlài manoh oh daq 'bìq catŏih, aih yi xa ca blah yŏc phôq càn cajap;
bìac ta'miaq, aih ùh crài cleq ca calêh 'mang hnem hanình khoi clenh.
20 Nhò hacùng bàu khôn rabiaq, cliac mangai jah panàc;
bìac da blìa hacùng broq ca haq jah caq tàu tìa.
21 Bìac cachìt wa bìac rìh ŏi nòi cwìang da rapet;
nhò bàu capoch 'màng leq, jah loh plì 'màng aih.
22 Cabô chaq jah mòiq toq mai, aih chaq jah bìac xôq ramŏt;
haq khoi nhàn bìac am dech da Chuaq.
23 Mangai pa waiq xìn can xa-ŏch;
mahaq mangai padrŏng can tèo hlài bàu grèh.
24 I bàc ngai bua jah glàm ranàc,
mahaq hadai i mòiq ngai bua lem joq 'nàng yi hnao ca oh daq mòiq cliac.