19
Can Rìh Wa Caq Ŏi 'Màng Leq
1 Tha broq mangai pa mahaq caq ŏi lem jang,
yi hnao ca mangai i hacùng bàu tawech tawoch wa blùng.
2 Manoh dêh nhang mahaq thìuq bìac loq 'nì hadai ùh lem,
wa dahôiq broq bìac, èh broq lìq.
3 Bìac blùng da mangai broq raliang dèh ca trong cla,
wa manoh haq trech Chuaq.
4 Padrŏng can jah tam bàc ngai bua; mahaq mangai pa,
'nhac ca i bua, xôq bua cađac.
5 Mangai anoi hlài ùh troq, ùh claih ca 'bìq baxa,
wa mangai hloh bàu amòng hadai ùh jah claih.
6 I bàc ngai chaq bìac hanò da mangai loq tabàih;
wa rìm ngai dìq broq bua ca mangai loq tabàih am.
7 Mangai hi pa 'nhac ca oh daq cla xôq git;
ùh dùh dèh ca 'bài bua ma ùh lam hangai ca haq! Haq hnan tiaq xìn xo, mahaq wì xôq lam hangai ca haq.
8 Cabô jah nhàn can khôn rabiaq, loq waq dèh ca mahua yiang;
cabô wèq can loq 'nì chaq jah bìac lem.
9 Mangai anoi hlài ùh troq, ùh claih ca 'bìq baxa;
wa mangai hloh bàu amòng 'bìq jêh đac.
10 Caq ŏi xùang ùh tajì ca mangai blùng;
ùh dùh dèh ca mangai broq hapŏng jah wèq cwìang 'bài con bùa 'mòh.
11 Mangai i manoh khôn rabiaq xòi ca loq nòih, 'bang tìang da haq,
aih ùh dayo bìac broq ùh troq da mangai 'noiq.
12 Bùa loh nòih ùh crài cleq ca baco hlari grenh;
mahaq bìac loq hanò da bùa tìah ca diac ngom top ta đùng nhat.
13 Con calô blùng aih can ranàc ca baq haq;
mai loq rahen tìah ca hnem 'bìq hatôh diac yôt yôt.
14 Hnem wa cùng hang aih xôxech da boc yaq am;
mahaq mangai mai khôn rabiaq aih trùh enh Chuaq.
15 Bìac aroh broq ca wì cùi panoc;
wa mangai aroh ùh abroq jah pangot.
16 Cabô wèq bàu thê Chuaq, wèq dèh mahua yiang;
mahaq cabô khìn bàu Haq, jah cachìt.
17 Cabô xa-ŏch ca mangai pa, aih am ca Chuaq wai,
Haq jah am hlài xôq ramŏt wa bìac lem da mangai aih.
18 Pariaq baxa con calô ìh jò ŏi jah ngèh gòm oq;
tàng ùh, can rìh haq jah 'bìq raliang.
19 Mangai nòih xrông, ep chìuq dèh bìac baxa;
tàng ìh dŏih haq, ìh ep dŏih hlài haq hòm.
20 Tamàng bàu hnài beq, wa nhàn yŏc pariaq hnài beq,
đòiq jah khôn rabiaq dìq ca 'nhòng.
21 Ta manoh mangai i bàc trong tình;
mahaq manoh da Chuaq ma jah wìa.
22 Bìac lem ta manoh mangai, aih can xa-ŏch xam manoh loq waq;
mangai pa lem yi hnao ca mangai capoch amòng.
23 Bìac crè yùq ca Chuaq 'ràng trùh can rìh,
đòiq jah cùi hnia catèm, ùh hìaq i bìac ranàc trùh.
24 Mangai aroh hnhu dèh tì ta dòt,
khoi èh ùh dèch tŏc dèh jang hacùng.
25 Blai mangai loq jù lê, èh mangai blùng jah loq wèq dèh manoh hèm,
mahaq tagàih lech mangai loq 'nì, èh haq jah tam can 'nì loq.
26 Mangai tajêh dèh ca baq wa drùh đac dèh miq,
aih mangai con broq 'mèq wa camaih.
27 Ô con, jò pi tamàng hòm bàu pariaq hnài,
con jah lam lac hangai ca bàu can loq 'nì.
28 Mangai anoi hlài ùh troq, haq halê bìac hadrah lem jang,
wa hacùng mangai dù pa'noh loh tôiq lôi.
29 Bìac hadrah đòiq am ca mangai loq halê,
wa long roi đòiq blai crŏng mangai blùng.