20
Can Rìh Wa Caq Ŏi 'Màng Leq
1 Alac nho broq ca mangai hloh bàu halê, cadroh broq mangai loh ca tajêh;
cabô loq bù, ùh xài rabiaq.
2 Bìac nòih da bùa tìah ca baco hlari hùng gam grenh;
cabô leoq haq nòih, aih broq raliang dèh can rìh cla.
3 Mangai leq wèq dađeh claih ca ta'miaq, aih bìac padèch da haq;
toq mangai ranhùa raq enh waq ta'miaq.
4 Mangai aroh ùh abèq đùng tamang troq jò;
trùh jò gat haq lam xìn caq, mahaq ùh jah cleq.
5 Trong tình ta manoh mangai tìah ca diac jrùq;
mahaq mangai loq 'nì jah gôch yŏc diac aih.
6 Bàc ngai pa'noh dađeh wì loq wèq dèh manoh;
mahaq cabô chaq jah mòiq ngai mangai 'màng aih.
7 Mangai ta-atoq caq ŏi lem;
'bài con caiq haq jah xôq ramŏt!
8 Bùa ha'ngui ta gèq hadrah ta-atoq,
mat haq ngan ha'mrìh rìm bìac dù.
9 Cabô jah doi dađeh: “Au khoi broq hreo dèh manoh,
au khoi hreo tôiq lôi?”
10 Plì kìq wa ang tŏng 'nùt,
baiq hiniq aih dìq Chuaq ramòt.
11 Bìac con 'yoh broq,
dìq pa'noh tàng haq caq ŏi lem xriu wa broq troq.
12 Don đòiq tamàng, mat đòiq ngan hnoq,
Chuaq khoi broq loh wa.
13 Apaq toq loq enh cùi, èh ìh loh ca pa;
blèch mat beq, èh jah dahwèq caq panàc.
14 Mangai rŏt doi: “Ùh lem, ùh lem!”
Mahaq jò khoi lam, haq catèh.
15 I wang wa i bàc ngŏc; mahaq hacùng i tam can loq 'nì,
aih bìac canaq yi hnao.
16 Phai dùng eo da mangai ma yòng pagàu thai;
yi hnao hòm, taiq haq yòng pagàu thai am ca mangai cadrì tamoi broi.
17 'Benh khoi yŏc tiaq trong 'nùt broq nhim ca mangai,
mahaq pulùch èh, hacùng haq bình ca hmu raga.
18 Bìac tình jah troq nhò i mangai wiang tah bàu, wa bìac tajêh poh ep i mangai patô rabiaq.
19 Mangai ha-ìa lam wawenh anoi 'noh bìac hlèp;
'màng aih, paq alùh ca mangai bàc bàu.
20 Đen da mangai hanip dèh miq baq
jah 'bìq pat ta nòi gùng clam clôiq blo bloih.
21 Tàng dahôiq chaq yŏc xôxech jò baxèm,
èh jò lùch ùh jah xôq ramŏt cleq.
22 Apaq doi: “Au ca'naih hlài bìac dù.”
Phai gòm Chuaq beq, Haq jah dèch ìh.
23 Plì kìq baiq toq broq ramòt ca Chuaq,
wa kìq jŏng ùh xài ngè lem.
24 'Bài cadiang da con mangai, aih Chuaq pajaq am,
'màng aih, mangai broq 'màng leq ma loq dèh ca trong lam?
25 Apaq 'bìq bahlac xam trong rùp bàu am dahôiq bìac pachac ca Boc Plình,
atìq ca khoi pachac, men hèm hlài.
26 Bùa rabiaq ràih đòiq mangai dù enh mangai lem,
hi khoi am blênh xê len enh 'nhèq ca wì haq.
27 Yiang ma ŏi ta chac mangai aih đen da Chuaq,
haq loq dìq nòi jrùq hlèp da manoh haq.
28 Bìac lem jang wa anoi bàu joq 'nàng wèq ban bùa;
wa nhò bìac ta-atoq haq payòng dèh gèq bùa wa Taneh Diac.
29 Can 'ngah 'ngai da mangai radam, aih padren dêh da haq;
xàc gàu co aih bìac jah padèch da mangai craq.
30 'Bài teo habau, aih 'nheo hreo ca bìac dù,
wa blai xam long roi mùt jrùq wa broq hreo nòi hlèp da manoh.