24
Bàu Thê wa Bàu Pa'yèp
Bàu 20
1 Apaq tarènh ca mangai dù,
hadai apaq ngèh ca ŏi ti wì haq.
2 Taiq manoh wì haq tình bìac dù dang
wa blìa hacùng wì haq capoch bàu broq xa.
Bàu 21
3 Nhò bìac khôn rabiaq, jah broq loh hnem,
wa jah cajap nhò bìac loq 'nì;
4 Nhò bìac 'nì loq,
'bài adùq dìq jah tôm taih 'bài dahwèq canaq 'bac wa lem.
Bàu 22
5 Mangai khôn rabiaq i padren dêh,
mangai 'nì loq jah tam padren.
6 Ma jah 'màng aih jò tajêh poh ep nhò khôn rabiaq;
ŏi ta leq i bàc mangai tình am, ta aih èh jah 'blêq.
Bàu 23
7 Bìac khôn rabiaq ha'nhèq dìq jaq ca mangai blùng;
haq ùh tapèh bàu ti nòi 'mang phôq.
Bàu 24
8 Mangai leq tình trong broq dù,
wì jah doi haq mangai loq padô alùan.
9 Manoh hèm broq blùng, aih tôiq lôi;
mangai ma loq halê, aih loh ramòt ca mangai.
Bàu 25
10 Tàng ìh hŏnh manoh ta hì mango chàu,
èh padren ìh loh ca 'yoh.
11 Dŏih claih mangai 'nang 'bìq 'ràng nòi cachìt beq,
wa dèch wì haq jò wì 'nang lam trùh ta nòi jêh đac.
12 Tàng ìh doi: “Joq 'nàng, nhèn ùh loq bìac cô;”
Èh Boc Plình ma ha'mrìh manoh mangai, Haq ùh ngan hnoq bìac aih 'mòh?
Haq ma wèq ban mahua yiang, Haq ùh canao loq 'mòh?
Èh Haq ùh ca'naih hlài ca mangai hi mac ca bìac haq khoi broq 'mòh?
Bàu 26
13 Ô con, phai caq diac xùt taiq aih lem;
joq 'nàng, diac xùt mòn nhim.
14 Ìh phai loq, khôn rabiaq aih hadai nhim ca mahua yiang.
Tàng ìh chaq jah haq, ìh jah i bìac ngèh gòm bla èh,
wa bìac ngèh gòm da ìh ùh hìaq loh ca 'ngwan.
Bàu 27
15 Ô mangai dù, paq achop tabroq ca hnem mangai rìh ta-atoq;
paq raliang đac da haq nòi ŏi.
16 Ma jah 'màng aih mangai ta-atoq 'nhac ca tapèh yàng tacro, xôq yòng hlài;
mahaq mangai ngang dù 'bìq tacro jò can ranàc.
Bàu 28
17 Paq lem bùi jò mangai tagit ca ìh tacro,
wa paq yŏc manoh lem bùi jò haq 'bìq catŏih,
18 Chuaq ùh lem manoh ca bìac aih,
wa dŏih đac can nòih Haq khoi ca mangai dù aih.
Bàu 29
19 Paq git 'bŏn ca mangai broq dù,
hadai paq ta'bì ca 'bài mangai ngang dù;
20 Ma jah 'màng aih mangai ngang dù ùh i ca bìac ngèh gòm,
wa đen da mangai ngang dù jah pat đac.
Bàu
21 Ô con, crè yùq ca Chuaq wa bùa beq;
paq alùh ti mangai blàq blènh;
22 Ma jah 'màng aih bìac ranàc da'ngàc trùh ta wì haq,
cabô loq bìac broq raliang jah trùh enh leq.
Hadai Bàu Da Mangai Khôn Rabiaq
23 Cô hadai bàu capoch da mangai khôn rabiaq;
ta bìac hadrah hiniq, gen can aih bìac ùh lem.
24 Mangai leq doi ca mangai ngang dù: “Ìh mangai ta-atoq”,
mangai aih jah 'bìq jàn hanip, wa 'bài diac ramòt ca haq;
25 Mahaq 'bài mangai leq tagàih lech mangai dù,
bìac aih broq mangai lem manoh, xôq ramŏt jah 'noh ta wì haq.
26 Cabô tèo bàu troq,
aih tìah ca hìp ti blìa hacùng.
27 Palaoq đòiq bìac ŏi enh gùng wa padon đòiq bìac ta đùng tamang da ìh beq;
khoi èh broq hnem da ìh beq.
28 Apaq anoi hlài ùh troq bìac tajraq hlài dèh ca mangai haten hatìa;
paq yŏc dèh blìa hacùng capoch 'nùt.
29 Apaq doi: “Au jah broq ca haq troi haq khoi broq ca au;
au jah ca'naih hlài ca haq troi bìac haq khoi broq.”
30 Au i lam cwa đùng tamang da mangai aroh,
wa haten ca wùan da mangai blùng,
31 hnoq brech breo hon jàp jìa;
brech breo glàp hlèp ca taneh, wa panàt broq xam hmu khoi raliang.
32 Jò au ngan, au hèm ca bìac aih;
au ngan hnoq wa nhàn jah bìac hnài.
33 Cùi mòiq rahyàc, ca'nhip mat mòiq rahyàc,
cwat bao ca'nùng mòiq rahyàc,
34 èh bìac pa jah trùh ta ìh bu dàng mangai atùng,
wa bìac thìuq da ìh glàm trùh tìah ca mangai wê ranac tajêh.