25
Bàu Pariaq Hnài Rabiaq
1 Cô hadai bàu rabiaq da Sa-lô-môn, ma 'bài mangai da Ê-xê-chia, bùa Juđa, achìh hlài.
2 'Ngah 'ngai da Boc Plình aih cadoc mòiq bìac hlèp,
mahaq 'ngah 'ngai da 'bài bùa aih chaq loh mòiq bìac hlèp.
3 Tìah ca lòp plình ha'nhèq wa plì crŏng taneh jrùq dàng leq,
manoh da 'bài bùa hadai 'màng aih dìq.
4 Yŏc cràc crac loh khoi ca 'bac,
èh thòq 'bac jah i mòiq toq cabi lem;
5 'Noh đac mangai dù khoi jang ngìa bùa,
èh gèq bùa jah broq cajap ta bìac ta-atoq.
6 Paq pa'noh dađeh ŏi jang ngìa bùa,
wa paq yòng ti nòi mangai rahù.
7 Ma jah 'màng aih tha wì doi ca ìh: “Tŏc jang cô beq”,
yi hnao ca thê ìh loh ti ha'neq ŏi jang ngìa con bùa, ma mat ìh khoi hnoq.
8 Paq renh loh đòiq tarahen bìac dađeh,
yùq jò mangai haten hatìa ìh broq ca ìh camaih taiq ìh 'bìq thùa,
èh ìh ùh 'nì broq 'màng leq.
9 Tarahen dèh bìac ca mangai haten hatìa ìh beq,
paq pa'noh bìac hlèp da mangai 'noiq;
10 Yùq jò mangai tàng bìac aih haq lech ca ìh,
èh bàu anoi 'mèq ca ìh ùh jò leq jah xùt đac.
11 Bàu capoch troq jò,
ùh crài cleq ca plì taoq xam wang đòiq ta diah xam 'bac.
12 Mangai khôn rabiaq tagàih lech ca don ma loq tamàng,
ùh crài cleq ca mòiq toq canhàng wang, ngè anì xam wang.
13 Mangai 'ràng bàu dìq dèh ca manoh,
tìah ca twiac hangèp ta hì gat ca craq thê haq lam;
ma jah 'màng aih haq lem manoh dèh ca craq haq.
14 Mangai leq khoi pachac ca tabàih mahaq ùh wèq dèh bàu,
tìah ca i yùc i cayeo mahaq ùh i ca mè.
15 Manoh chìuq àt jah 'blêq manoh cwan;
rapet tabat goh 'bài caxènh.
16 Tàng ìh chaq jah diac xùt, ìh caq bu tôm raq,
yùq caq bàc dìq jaq, èh ìh hac loh đac.
17 Apaq lam yôt ta hnem mangai haten ca ìh,
yùq haq mech ca ìh, wa blàq manoh git ca ìh.
18 Mangai leq amòng anoi tajraq hlài ca mangai haten ca haq,
ùh crài ca mòiq toq tamoh, chang gùm, wa mòiq toq rang panenh hin.
19 Lùi mangai loq blàq ta hì glàm nan xa,
tìah hanenh tagoh wa tìah ca jènh tablŏch.
20 Cabô calêu am ca manoh mango tamàng,
ùh crài ca mangai lêh eo ta hì hangeo,
wa tìah ca diac jòq pùc ta habau.
21 Tàng mangai ma git ca ìh loq pangot, am haq caq beq;
tàng haq croh ranŏng, am haq ôq beq;
22 'Màng aih bu dàng ìh tah ngia ùnh ta gàu haq,
wa Chuaq am baha hlài ca ìh.
23 Cayeo pah 'ngeo ca 'mat mahì loh 'ràng mè;
rapet capoch jù atùng broq ca hadrò nòih.
24 Tha ŏi ta mùm nòi crŏng hnem,
yi hnao ca ŏi pajùm ca gu cadrì loq tarahen.
25 Bàu lem enh nòi hangai trùh,
'màng ca diac hangèp ca mangai croh ranŏng.
26 Mangai ta-atoq mahaq iu tiaq mangai ngang dù,
ùh crài ca gŏi diac loh ca raliang, diac broq ca blùc.
27 Caq diac xùt bàc hrìn èh ùh lem;
wa chaq can 'ngah 'ngai ca dađeh, hadai 'màng aih.
28 Mangai leq ùh jah pagàt dèh manoh,
ùh crài cleq ca mòiq toq phôq raliang, ùh i ca panàt bàng.