5
Waiq Khàn Bìac Wèq Ban Enh Mangai Dù
Đawit Achìh
1 Chuaq ôi, xìn cachình don tamàng bàu au,
xìn ngan hnoq manoh hràng rayoih da au.
2 Ôi Bùa da au wa Boc Plình da au ôi,
xìn tamàng bàu hmoi da au dang xìn Ìh jùp đò,
ma jah 'màng aih au waiq dang ca Ìh.
3 Chuaq ôi, rìm xroq Ìh jah tàng bàu au,
rìm xroq au 'ràng enh ngìa ca Ìh bìac au canòm nhò Ìh,
èh gòm rai ngèh.
4 Ma jah 'màng aih Ìh ùh xài Boc Plình lem bùi ca bìac dù;
bìac dù ùh jah ŏi pajùm ta Ìh.
5 Mangai loq catèh ùh jah yòng enh ngìa ca Ìh.
Ìh joq 'nàng git ca rìm ngai broq bìac dù.
6 Ìh raliang đac wì mangai amòng,
ramòt ca mangai loq 'nùt wa
mangai broq ta-ùc mahem mangai 'noiq.
7 Phàn da au, nhò can xa-ŏch xam manoh loq waq càn caiq da Chuaq,
au jah mùt hnem Chuaq,
yŏc manoh dìq jaq loq yùq crè ca Chuaq,
au tangìa 'nah ta hnem cùh waiq hadròih đòiq cùh waiq Ìh.
8 Ôi Chuaq da au, taiq wì ma tagit ca au dudan ca au pôn pah,
xìn Ìh 'nong trong ca au xam bìac ta-atoq da Ìh.
Xìn broq jang trong da Ìh enh ngìa ca au.
9 Ma jah 'màng aih enh hacùng wì haq ùh i bàu leq joq 'nàng,
manoh wì haq bình bìac dù,
trom hŏng wì haq tìah ca ralùng hanang khoi pèh calàp,
rapet wì haq toq capoch bàu pajìang alùan.
10 Boc Plình ôi, xìn Ìh baxa wì haq,
broq wì haq lech dèh manet cla broq,
xìn hnan đac wì taiq tôiq wì bàc hrìn ma jah 'màng aih
wì haq hloi blàq hlài ca Ìh.
11 Mahaq dìq ca mangai leq ma hanình ca Ìh jah lem bùi,
hloi hloi jah calêu,
ma jah 'màng aih wì haq jah Ìh wèq ban.
Mangai leq tamèt ca hiniq Ìh jah lem bùi ŏi ta Ìh.
12 Chuaq ôi, Ìh joq 'nàng am xôq ca mangai ta-atoq,
Ìh ŏi dudan ca wì haq broq khìan xam can loq waq đòiq wì haq jah hanình.