7
Waiq Khàn Bìac Wèq Ban Enh Mangai Dù
Đawit Achìh
1 Chuaq ôi Ìh Boc Plình da au, au hanình ca Ìh.
Xìn Ìh dèch au claih khoi ca wì ma hnan au.
2 Yùq mangai ma tagit ca au hich au tìah ca baco hlari hich hanùm,
hua chac au, èh ùh i cabô jah dèch au.
3 Chuaq ôi Ìh Boc Plình au, tàng au khoi broq bìac dù,
tì au khoi broq bìac ùh troq;
4 Tàng au khoi yŏc bìac dù tajraq hlài bìac dù ca bua au,
wa blah yŏc cùng hang wì ma git ca au 'nhac ca wì ùh i ca hiniq cleq,
5 èh đòiq mangai ma tagit ca au hnan tem au beq,
jôiq đac can rìh au ta taneh,
catùh đac tìang 'bang lem da au ta blo tanùh.
6 Chuaq ôi, xìn Ìh xam manoh nòih,
yòng tajraq hlài ca wì ma tagit ca au. Rìu beq, wiang ti au;
hadrah wì tiaq trong ta-atoq da Ìh.
7 Xìn Chuaq tagop jàn enh rìm Diac dudan ca Ìh,
enh nòi ha'nhèq Chuaq jah wèq cwìang wì haq.
8 Waiq Chuaq Ìh joq 'nàng Chuaq ma hadrah rìm jàn rìm diac;
xìn Ìh hadrah au tiaq bìac ta-atoq da au,
wa tiaq bìac lem jang da manoh au.
9 Ôi Boc Plình ta-atoq
ma xreo hnoq rìm manoh con mangai,
palùch đac bìac ngang xòt da mangai dù
wa broq ca mangai ta-atoq jah cajap hagao.
10 Boc Plình ôi! Ìh raq khìan da au
jah dèch claih mangai i manoh lem jang.
11 Boc Plình broq hadrah dìq jaq ta-atoq,
rìm hì Haq nòih ca mangai broq bìac dù.
12 Tàng mangai leq ùh cađac dèh manoh broq tôiq,
èh Boc Plình calenh chang gùm,
hyot đòiq panenh.
13 Haq hadai khoi padon ca Dađeh ranac jah jêh cachìt.
Haq khoi 'nac broq rang panenh i pla ùnh.
14 Mangai ngang dù hadràp ca bìac dù,
èh ŏi jiang xam bìac 'mèq 'mac xa-ông 'noh bìac amòng.
15 Haq chìa hàm dìq jaq jrùq,
èh cla haq raq clìh dèh hàm khoi chìa.
16 Bìac dù haq khoi broq jah ùc hlài ta gàu haq;
bìac xòt ngang haq khoi rai, jah ùc hlài ta gàu haq.
17 Au jah manè pôi Chuaq taiq bìac ta-atoq da Haq,
wa jah calêu padèch hiniq Chuaq ma Yi Ha'nhèq.