8
Bìac 'Ngah 'Ngai da Boc Plình
Đawit Achìh
1 Ôi Chuaq, Ìh Chuaq da nhèn.
Hiniq da Ìh rahù ranhòm jàp crŏng taneh cô!
Bìac 'ngah 'ngai da Chuaq mahno loh yi ha'nhèq
ca 'bài lòp plình.
2 Taiq wì mangai ma git ca Ìh,
Ìh jah hacùng bàu wì con 'yoh wa con nga đang ùq padèch hiniq Ìh,
broq ca wì ma enh tajraq hlài ca Ìh,
loh ca hatenh.
3 Jò au ngan 'bài lòp plình,
aih bìac hadrang tì Chuaq broq loh,
mat khê wa mat halŏng
ma Ìh khoi broq loh wa ta'mroq đòiq.
4 Con mangai cabô ma Chuaq hmàng trùh,
wa con mangai aih cleq ma Chuaq wèq ngan haq?
5 Mahaq Chuaq broq con mangai yi ha'neq ca Boc Plình toq 'biaq,
èh pacôi am ca con mangai 'ngah 'ngai wa rahù ranhòm!
6 Chuaq am ca haq wèq cwìang enh 'nhèq rìm bìac tì cla Chuaq khoi broq loh;
Ìh khoi broq rìm bìac ŏi enh 'neq ca haq.
7 Dìq ca calùh trìu,
'bo, wa dìq ca ngè rôm.
8 Chìm ta plình,
ca ta diac wa dìq
ca ngè ma glài ta diac raxìq jrùq.
9 Ôi Chuaq, Ìh Chuaq da nhèn.
Hiniq da Ìh joq 'nàng rahù ranhòm jàp crŏng taneh cô!