9
Manè Pôi Taiq Ta-atoq Da Boc Plình
Đawit Achìh
1 Chuaq ôi, au dìq ca manoh manè pôi Ìh
wa jah ta'mon hlài rìm bìac halac ma Chuaq khoi broq.
2 Ta Ìh au jah lem bùi, au jah calêu padèch hiniq Ìh,
ôi Chuaq ma yi Ha'nhèq dìq dŏng.
3 Jò mangai tagit ca au wìh cadàu,
wì catŏih tacro wa 'bìq jêh đac enh ngìa ca Ìh.
4 Ma jah 'màng aih Chuaq wiang ti au tiaq bìac broq ta-atoq da au,
enh gèq bùa ha'nhèq Ìh hadrah ta-atoq.
5 Ìh khoi lech ca 'bài Diac, khoi jêh đac bàc mangai dù,
wa khoi xùt bahnhung đac hiniq wì hloi hloi.
6 Mangai tagit khoi glàm bìac raliang piang hloi hloi;
Ìh khoi raliang bahnhung đac phôq da wì haq, pi cabô hmàng trùh ca wòch wì haq hòm.
7 Mahaq Chuaq ma wèq cwìang hloi hloi,
Haq khoi broq cajap gèq bùa ta-atoq da Haq đòiq hadrah.
8 Chuaq hadrah crŏng taneh tiaq trong ta-atoq;
Haq wèq cwìang lem jang enh 'nhèq ca rìm jàn rìm Diac.
9 Chuaq, Haq đôn hanình da mangai leq 'nang chìuq bìac padit padiang,
Haq nòi canòm hanình cajap hagao jò glàm bìac ranàc.
10 Mangai leq loq ca hiniq Chuaq, haq jah canòm ca Ìh,
ma jah 'màng aih Ìh ùh jò leq cađac mangai leq loq ti chaq Ìh.
11 Calêu padèch hiniq Chuaq ma ŏi ta Jê-ru-sa-lem beq;
anoi hlài rìm bìac Haq khoi broq ta'ne ca rìm jàn.
12 Ma jah 'màng aih Haq ma broq ta-ùc chao ca mahem,
khoi hmàng trùh ca mangai xa nan, Haq ùh hèt ca bàu hmoi dang creo ca Haq.
13 Chuaq ôi! Xìn xa-ŏch ca au, ma ngan hnoq rìm bìac nan xa wì ma git ca au khoi broq loh ca au;
Ìh raq dèch au jah claih enh ngo da can cachìt,
14 đòiq au jah anoi pa'noh bàu manè padèch Ìh jang 'màng ngo da phôq con cadrì Jê-ru-sa-lem;
au dìq jaq lem bùi ca bìac Chuaq khoi dèch au jah claih.
15 Jàn ta rìm Diac khoi clìh dèh ta hàm ma cla wì haq khoi chìa,
jènh wì haq khoi lech hlàm ma cla wì haq khoi tang.
16 Chuaq khoi mahno Dađeh ta rìm bìac ta-atoq Haq khoi broq;
mangai dù bahlac dađeh xam bìac broq da tì cla wì haq.
17 Wì mangai dù ep loh ta 'bau ùnh,
rìm Diac ma hèt ca Chuaq hadai 'màng aih.
18 Mahaq mangai pa ùh hloi hloi 'bìq hèt;
bìac gòm ngèh da mangai xa nan ùh 'bìq raliang đac hloi hloi.
19 Chuaq ôi! Yòng beq, paq đòiq ca mangai crŏng taneh jah 'blêq.
Thê rìm Diac yòng enh ngìa ca Ìh đòiq hadrah wì haq.
20 Chuaq ôi, xìn broq ca wì haq yùq crè beq,
đòiq rìm Diac jah loq ca dađeh wì haq toq con mangai raq hêq.