12
Boc Plình Dèch Mangai Jah Claih ca Mangai Dù
Đawit Achìh
Chuaq ôi! Xìn dèch nhèn jah claih, ma jah 'màng aih mangai lùi Boc Plình pi ŏi i hòm,
wa mangai wèq dèh bàu 'nhòng cô khoi hnhung enh nòi con mangai.
Wì haq toq capoch cwàiq ca dabau.
Wì haq khoi baiq manoh
wa bàu pajìang ŏi jang blìa hacùng wì haq.
 
Xìn Chuaq cat đac blìa hacùng ma 'noh bàu pajìang
wa rapet ma loq catèh.
Cla wì haq doi:
“Nhèn jah 'blêq nhò hacùng cla nhèn,
nhò rapet cla nhèn. Cabô broq craq wèq nhèn?”
 
Chuaq doi:
“Taiq bìac mangai ìuq 'bìq padit padiang wa bàu hràng da mangai nan,
manàiq Au yòng,
Au đòiq wì haq ŏi ta nòi hanình, aih nòi cla wì haq enh dìq jaq.”
Bàu da Chuaq aih bàu hadròih,
tìah ca 'bac khoi tapèh yàng bùh xam ùnh.
 
Chuaq ôi! Ìh raq khoi wèq ban mangai 'bìq padit padiang.
Xìn Ìh wèq ban nhèn jah claih ca wì 'nhòng cô trùh hloi hloi.
Mangai dù èh jah lam hlài rìm nòi jò bìac
dù jah padèch ta 'nhòng con mangai.