17
Waiq Xìn Chuaq Dŏih Dèch Enh Wì Padit Padiang
Đawit Achìh
1 Chuaq ôi, xìn tamàng bìac ta-atoq,
tamàng bàu waiq dang;
halang don tamàng bàu loh enh blìa hacùng
ùh jò leq amòng.
2 Xìn Chuaq, Ìh hadrah am ca au,
ma jah 'màng aih mat Ìh ngan hadrah tiaq trong lem jang.
3 Chuaq khoi ngan hnoq manoh au;
Ìh khoi thia hmàih jò damang;
Ìh khoi ngan hnoq manoh au hi khoi ùh chaq hnoq tôiq cleq;
au khoi 'nac ta manoh ùh broq tôiq xam bàu capoch.
4 Bìac da con mangai crŏng taneh,
nhò bàu anoi da Ìh,
au khoi wìa hangai ca mangai broq xòt ngang.
5 Au khoi cadiang lam cajap tiaq trong da Chuaq,
jènh au ùh hìaq loq lia tacro.
6 Boc Plình ôi, au creo dang Ìh, ma jah 'màng aih au loq Ìh jah tèo hlài au;
xìn Ìh cachình don tamàng bàu waiq khàn da au.
7 Waiq Chuaq ma jah dèch claih,
xìn patô 'noh can xa-ŏch xam manoh loq waq dìq jaq càn caiq da Ìh ca mangai loq canòm hanình ca tì pah 'ma Ìh;
dèch wì claih enh mangai ma git ca wì haq.
8 Xìn Chuaq wèq ban au tìah ca wèq ban dèh clong mat cla Ìh,
xìn cadoc au enh ca'nàm ca panan Chuaq,
9 đòiq jah claih ca wì ma tacaq ca au,
claih ca wì ma git 'nang dudan ca au.
10 Wì khoi clenh manoh ùh mòn cleq
wa hacùng wì toq capoch bàu padèch dađeh.
11 Wì hnan au khoi tem wa wì ŏi dudan au;
wì khoi chrìh ngan đòiq ca'nhùc au cro.
12 Haq tìah ca baco hlari hrah ca caq hanùm,
tìah ca baco hadròng achop enh nòi hlèp.
13 Chuaq ôi, xìn yòng beq,
nhò chang gùm Ìh xìn dèch au claih enh mangai dù.
14 Chuaq ôi, toq tì Ìh jah dèch au claih enh mangai 'màng cô;
aih wì mangai da crŏng taneh ma chaq bìac baha da wì haq jah 'mòi ta 'nhòng cô raq.
Wì haq lem manoh i 'bài con caiq,
èh wì haq đòiq hloi cùng hang cla da con caiq wì haq.
15 Mahaq phàn da au, nhò bìac ta-atoq au jah hnoq hadrò Chuaq;
jò au rìu, au jah bùi lem taiq khoi jah ngan ca ro cla Chuaq.