18
Bàu Manè Boc Plình Taiq Khoi Jah Dŏih Dèch Enh Tì Bùa Saulò
Đawit Achìh
1 Chuaq ôi, au loq waq ca Ìh; Ìh raq padren dêh da au.
2 Chuaq hmu càn au, hmu panàt da au, Haq dèch claih au.
Boc Plình da au, wang hmu đòiq au canòm hanình;
Haq khìan au, aki dèch claih au, nòi hagao hagình cajap da au.
3 Au creo dang Chuaq, Haq đang ca au manè padràu,
èh au jah claih enh wì ma git ca au.
4 Caxi da bìac cachìt rahnich yŏc au,
habùh da bìac raliang piang broq ca au yùq crè.
5 Caxi ralùng hanang 'bùbanh ca au,
hlàm da can cachìt tang enh ngìa ca au.
6 Ta jò xa nan, au dang creo ca Chuaq.
Au creo dang taiq Haq Boc Plình da au; enh Hnem Cùh Waiq da Haq,
Haq tamàng bàu da au, bàu creo dang da au trùh enh ngìa ca Haq,
mùt don Haq.
7 Jò aih plì taneh ra'nhùn.
Xèm da 'bài wang hadai tadroq wa tarìt,
ma jah 'màng aih Boc Plình khoi loh nòih.
8 Nhòi plôh loh enh mùh Haq,
ùnh đòiq bùh cheo tŏc enh hacùng Haq,
enh Haq ùnh cachah cheo dêh.
9 Haq pèh 'bài lòp plình, hi khoi Haq loh;
'bài yùc gam lam ti capiang jènh Haq.
10 Còi chê-ru-bim Haq pan,
yŏc panan cayeo Haq gliang.
11 Haq yŏc 'mù can clam broq mù cabàn Dađeh,
yŏc diac gam gôiq, yùc habàu habùt broq ngè glàp.
12 Enh ngìa Haq, i can ca-ah
wa yùc 'noh loh preo wa ùnh cachah.
13 Chuaq hadai broq loh cađah ŏi ta plình.
Chuaq Boc Plình ma Yi Ha'nhèq 'noh bàu capoch.
14 Haq penh 'noh rang, broq ca wì ma git ca au parai pariang;
Haq broq cađah broq ca wì loh pac lac.
15 Chuaq ôi, nhò bàu lech da Ìh,
wa hòi hihèm dêh loh enh hacùng Ìh,
driah nòi ma dìq jaq jrùq da diac raxìq khoi loh enh gùng,
tagùq xèm da plì taneh hadai khoi rahòng.
16 Enh 'nhèq Chuaq 'noh tì rùp yŏc au,
dèch au jah tŏc khoi enh nòi diac jrùq.
17 Haq dèch au claih enh wì ma dêh padren git ca au,
enh wì mangai git ca au, taiq au ùh nui ta'blêq wì.
18 Wì trùh đòiq tabroq ca au ta hì au glàm bìac raliang ralàc,
mahaq Chuaq wèq ban au.
19 Haq 'ràng au trùh nòi rùng anàh, Chuaq dèch au claih taiq Haq loq waq ca au.
20 Chuaq baha ca au tiaq bìac ta-atoq da au;
Haq ca'naih hlài xôq ca au taiq tì hreo lem da au.
21 Taiq au khoi wèq tiaq trong da Chuaq,
ùh broq bìac dù, wa ùh lam hangai ca Boc Plình da au.
22 Ma jah 'màng aih dìq ca ranenh da Chuaq ŏi enh ngìa ca au;
au ùh cađac tiaq mòiq ranenh leq da Haq.
23 Enh ngìa ca Chuaq ùh bìac cleq jah trech au.
Au khoi wèq dađeh đòiq ùh broq tôiq.
24 Ma jah 'màng aih Chuaq am xôq ca au tiaq bìac ta-atoq da au,
tiaq bìac broq lem hreo da tì au enh ngìa ca Haq.
25 Ca mangai i manoh loq xa-ŏch, Chuaq pa'noh manoh Dađeh xa-ŏch.
Ca mangai lem jang, Haq patô Dađeh lem jang.
26 Ca mangai hreo lem, Chuaq Haq patô Dađeh hreo lem,
mahaq ca mangai leq manoh ùh lem jang, Chuaq jah patô Dađeh xam manoh gràm padràng.
27 Ma jah 'màng aih Chuaq dèch mangai loq paha'neq dađeh,
mahaq ca'nìh mangai i mat loq catèh.
28 Chuaq ôi, Ìh khoi bùh đen da au, Ìh joq 'nàng Boc Plình da au.
Ìh xreo 'ngah nòi clam da au.
29 Ma jah 'màng aih, nhò Ìh au jah ta'blêq ca lù lình ma git ca au;
nhò Boc Plình da au, au jah heo pagia wì haq.
30 Trong da Boc Plình joq lem jang gêh tôm.
Bàu da Chuaq aih bàu khòh canòm joq 'nàng.
Haq khìan
ca mangai leq loq canòm hanình ca Haq.
31 Ma jah 'màng aih enh gùng Boc Plình, cabô broq Chuaq?
Cabô broq wang hmu enh gùng ca Boc Plình?
32 Boc Plình Haq raq tah tam padren ca au,
broq ca trong au jah lem lình dìq dŏng.
33 Chuaq broq ca jènh au jah yòng cajap tìah ca jènh jŏi,
broq au jah yòng cajap ta nòi ha'nhèq da cla au.
34 Chuaq hnài axràm ca tì au jah dêh đòiq padon ca bìac tajêh poh,
đòiq cŏng au jah gang đòiq nui 'nac panenh broq xam đùng.
35 Chuaq khoi am ca au khìan dèch claih da Ìh,
tì pah 'ma da Ìh dèch au yòng,
manoh habùat da Ìh broq au jah i 'bang tìang.
36 Chuaq broq rùng trong cadiang lam da au,
đòiq jènh au ùh hìaq 'bìq lia.
37 Au hnan wì ma git ca au, hi jah tem;
au ùh wìh hlài tàng ùh broq gêh raliang đac ca wì haq.
38 Au jêh wì haq đòiq wì haq ùh jah yòng.
Wì dìq cro enh 'neq ca jènh au.
39 Chuaq tah am padren dêh ca au đòiq tabroq poh,
broq ca wì ma tabroq ca au cro enh 'neq ca jènh au.
40 Ìh broq ca wì ma git ca au tawìh cadàu hangai ca au;
au raliang đac wì mangai ma git ca au.
41 Wì haq creo dang, mahaq ùh i cabô trùh wiang.
Wì dang Chuaq mahaq Chuaq ùh tèo wì.
42 Au jêh wì haprah tìah ca blo enh ngìa ca cayeo,
hapùih wì haq loh tìah ca blo ta trong.
43 Chuaq khoi dèch au jah claih khoi ca jàn broq manhài;
Chuaq dèch au broq gàu ca rìm diac, jàn au ùh canao jah patìh ca au.
44 Bu tàng bàu au capoch, wì haq khoi iu tiaq;
'bài mangai Diac 'noiq yùq crè tarìt enh ngìa ca au.
45 'Bài mangai Diac 'noiq yùq crè tarìt,
loh khoi enh nòi canòm hanình da wì haq.
46 Chuaq rìh hloi hloi, Haq Hmu Càn đang ca jah padèch ta 'nhèq!
Boc Plình Haq Chuaq dèch claih au,
Haq đang ca jah calêu manè wa dèch ha'nhèq.
47 Boc Plình, Haq jêh chao thai ca au,
broq ca jàn Diac 'noiq loq iu yùq ca au.
48 Chuaq dèch au jah claih enh mangai ma git ca au,
padèch au ha'nhèq ca wì ma tajraq hlài ca au,
dèch au jah claih ca wì ma xòt ngang.
49 Taiq 'màng aih au jah padèch hiniq Chuaq ta'ne dìq Diac,
èh au calêu dèch hiniq Ìh ta rìm nòi au jah lam.
50 Chuaq khoi am ca bùa Haq khoi dèch jah padèch ha'nhèq.
Haq patô can xa-ŏch xam manoh loq waq ca mangai Haq khoi xùt dàu,
aih am ca Đawit wa xinoi da Đawit jah xôq hloi hloi.