26
Waiq Xìn Chuaq Wèq Ban
Đawit Achìh
1 Chuaq ôi,
xìn Ìh palem am ca au,
ma jah 'màng aih au rìh tiaq trong lem jang,
au khoi lùi canòm ca Ìh ùh jò leq payŏih.
2 Chuaq ôi, xìn ngan hadrah manoh au wa baxa thù au beq;
xìn axràm manoh wa manoh hèm da au.
3 Ma jah 'màng aih can xa-ŏch xam manoh
loq waq Chuaq jò leq xôq enh ngìa ca au;
au cadiang lam tiaq bàu joq 'nàng da Chuaq.
4 Au ùh ha'ngui pajùm ti mangai amòng,
hadai ùh lam trong ti mangai bàu lem manoh dù.
5 Au git ca lù mangai broq dù,
ùh ha'ngui pajùm ti mangai ngang dù.
6 Chuaq ôi, au jah 'nheo tì đòiq patô au pi i tôiq cleq,
wa lam dudan ca'bŏng tadreo da Ìh,
7 đòiq au jah 'noh bàu manè pôi Chuaq,
èh anoi hlài rìm bìac halac Chuaq khoi broq.
8 Chuaq ôi, au tamèt cadrù ca hnem Ìh,
aih nòi ŏi da bìac 'ngah 'ngai Ìh.
9 Xìn paq cađac mahua yiang au pajùm ti mangai broq tôiq,
hadai paq 'ràng 'noh can rìh au pajùm ti mangai jêh đac mangai.
10 Aih wì mangai i tì ngan dù,
tì pah 'ma wì haq bình halùih ngè rŏt manoh.
11 Mahaq phàn au, au ran rìh lam trong lem jang;
xìn rŏt hlài au wa xa-ŏch ca au.
12 Jènh au yòng cajap nòi taneh tamang;
au jah calêu padèch hiniq Chuaq ta rìm tagop hadròih.