27
'Bŏi Calêu Canòm Boc Plình
Đawit Achìh
1 Chuaq, Haq can 'ngah wa bìac dèch claih da au.
Au ŏi yùq ca cabô?
Chuaq, Haq đôn pagia da can rìh au,
au ŏi yùq crè ca cabô?
2 Jò wì mangai dù trùh
enh xret đòiq caq jam au,
aih mangai git tajraq ca au,
wì haq dìq tacro.
3 'Nhac ca mòiq lù lình cràm yòng enh ngìa ca au,
manoh au xôq ùh crè;
'nhac ca bìac tajêh poh lam trùh ca au,
manoh au xôq cajap.
4 Au waiq xìn Chuaq mòiq bìac,
aih bìac au hloi hloi ti chaq;
đòiq au jah ŏi ta hnem Chuaq dìq
ca hì 'nhòng rìh da au;
đòiq au jah ngan hnoq can lem lình da Chuaq
wa jah hèm haboq Haq ta hnem cùh waiq Haq.
5 Ma jah 'màng aih ta hì xa nan,
Haq jah wèq au ŏi ta hnem Haq;
Chuaq jah cadoc hlèp au ta hnem traiq cùh waiq Haq,
dèch au ŏi ta crŏng hmu talach.
6 Jò aih gàu au jah dèch yi ha'nhèq ca wì mangai ma git ca au.
Au jah dèch am ngè tadreo au ta hnem traiq cùh waiq Chuaq,
aih ngè tadreo xam bàu manè lem bùi.
Au jah calêu padèch hiniq Chuaq.
7 Chuaq ôi, xìn tamàng bàu au jò au waiq dang,
xìn xa-ŏch ca au wa tèo hlài bàu au.
8 Jò Chuaq doi: “Chaq hadrò Au beq!”
Manoh au hèm doi: “Chuaq ôi, au cô èh chaq hadrò Chuaq.”
9 Xìn paq bahlèp đac hadrò Ìh khoi ca au!
Jò Ìh loh nòih, paq drùh hnan đac au.
Ìh khoi jùp đò au.
Paq hnan au, paq hangah ùh loq ca au,
ôi Boc Plình can dèch claih da au.
10 'Nhac ca miq baq au cađac au,
mahaq Chuaq jah yŏc nhàn au.
11 Chuaq ôi, xìn hnài au trong da Ìh.
Xìn 'nong au lam tiaq trong tamang,
ma jah 'màng aih wì ma git ca au khoi hacam ca au.
12 Xìn paq 'noh au mùt ta tì wì ma git ca au,
ma jah 'màng aih i mangai anoi hlài amòng
wa 'bài mangai ngang xòt khoi yòng tajraq hlài ca au.
13 Ôi! Tàng au ùh lùi joq 'nàng jah hnoq
xôq ramŏt da Chuaq ta nòi gùng au 'nang rìh,
èh au khoi hŏnh manoh.
14 Phai ngèh gòm Chuaq beq;
Phai yŏc manoh tadêh wa manoh tanuq,
Joq, gòm Chuaq beq.