34
Chuaq Am Dahwèq Haq Dŏih Dèch
Đawit Achìh
1 Au hloi hloi manè pôi Chuaq,
Bìac dèch bàu manè pôi Haq hloi ŏi jang hacùng au.
2 Mahua yiang au jah catèh ŏi ta Chuaq,
mangai paha'neq manoh jah tàng wa jah lem bùi.
3 Phai pajùm ti au padèch hiniq Chuaq,
wiang ti au padèch ha'nhèq hiniq Haq.
4 Au creo dang Chuaq, Haq padreo bàu hlài da au;
Haq khoi dèch au claih ca rìm bìac crè yùq.
5 Wì haq ngan Chuaq, hi khoi wì haq jah xreo 'ngah,
èh hadrò wì ùh jò leq camaih.
6 Mangai pa hamoq cô creo dang, Chuaq tàng bàu haq,
dèch haq claih enh rìm bìac nan xa da haq.
7 'Bình Plình da Chuaq broq traiq ŏi dudan ca mangai loq yùq crè ca Haq,
đòiq dèch claih wì.
8 Phai mòn loq, èh ngan hnoq Chuaq lem lình dìq jaq!
Xôq ramŏt ca mangai hanình ŏi ta Haq.
9 Ôi 'bài mangai hadròih da Chuaq,
loq yùq crè ca Haq beq ma jah 'màng aih mangai leq loq iu crè ca Chuaq,
haq ùh thìuq bìac cleq.
10 Baco hlari hadròng xôq i jò pangot hrah,
mahaq mangai leq creo dang Chuaq haq ùh thìuq mòiq bìac lem leq.
11 Ôi pì con, tamàng bàu au cô oq;
au jah hnài pì bìac loq yùq crè ca Chuaq.
12 Cabô mangai enh rìh halình
wa enh jah hnoq xôq ramŏt ta 'nhòng cô?
13 Mangai aih phai wèq dèh rapet claih ca bìac dù,
wa hacùng haq ùh jò leq i bàu amòng.
14 Wia ca bìac dù, èh broq bìac lem,
Chaq wa hnan tiaq bìac catèm.
15 Mat Chuaq ngan hnoq mangai ta-atoq,
don Haq tamàng bàu creo dang da wì haq.
16 Mahaq Chuaq tajraq hlài ca mangai dù
wa bahnhung đac teo dua da wì haq khoi ca crŏng taneh.
17 Mangai ta-atoq dang creo, Chuaq tamàng bàu wì haq,
dèch wì claih ca bìac nan xa da wì.
18 Chuaq ŏi haten ca wì mangai i manoh 'bìq jìq mango,
wa dèch mahua yiang mangai leq canao loq dèh ca tôiq lôi.
19 Mangai ta-atoq èh glàm bàc bìac xa nan,
mahaq Chuaq dèch haq jah claih dìq.
20 Chuaq wèq dìq ca caxènh
Haq ùh đòiq mòiq toq leq 'bìq tagoh padah.
21 Bìac dù jah jêh mangai dù;
mangai leq git mangai ta-atoq èh 'bìq ta'mòq wa baxa.
22 Mahaq Chuaq dèch mahua yiang wì mangai hapŏng da Haq,
èh dìq ca mangai canòm hanình nòi Haq ùh jò leq 'bìq ta'mòq.