35
Bàu Waiq Xìn Dèch Dŏih Enh Mangai Tagit
Đawit Achìh
1 Chuaq ôi! Xìn Ìh ta'blêq ca mangai ma ta'blêq ca au,
xìn Ìh tajraq hlài ca mangai ma tajraq hlài ca au.
2 Xìn Chuaq dèch khìan càn wa khìan 'yoh,
yòng đòiq jùp au beq.
3 Xìn Chuaq dèch chang wa jaoq
tajraq hlài ca mangai ma hnan au;
doi ca mahua yiang au:
“Au cô jah dŏih dèch ìh.”
4 Waiq xìn wì mangai ma chaq jêh au
loh camaih dìq jaq.
Waiq xìn wì mangai ma broq pađim dù đòiq raliang au,
phai talùi rai camaih.
5 Wì haq bu dàng manùh enh ngìa ca cayeo,
'bìq 'bình plình da Chuaq jêh hnan đac.
6 Waiq xìn trong da wì haq aih clam clôiq wa lia cro,
jò 'bình plình hnan wì.
7 Taiq ùh i can nen leq mahaq wì haq tang hlàm chaq rùp au
wa ùh i can nen leq wì haq chìa hàm đòiq au taclìh mùt.
8 Waiq xìn bìac ranàc da'ngàc trùh ca haq,
hlàm ma cla haq khoi tang cadoc hlèp, rùp ca dađeh;
'mùt haq taclìh ta bìac raliang aih.
9 Èh mahua yiang au jah lem bùi ŏi ta Chuaq,
jah lem bùi nhò bìac dèch claih da Haq.
10 Dìq ca caxènh au jah doi:
“Chuaq ôi, cabô jah tìah ca Ìh,
Chuaq ma dèch mangai ìuq hamoq claih enh mangai dêh padren,
Chuaq ma dèch mangai pa nan claih ca mangai loq tacaq ca haq?”
11 Wì mangai 'nùt amòng yòng enh ngìa ca au,
bòch au bìac au ùh lah 'nì.
12 Wì yŏc bìac dù đòiq ca'naih hlài thai bìac lem da au,
mahua yiang au ùh i can ngèh gòm hòm.
13 Mahaq phàn da au, jò wì ùh hrŏc,
au caxùnh bai briang, au mango,
rôn ca acaq waiq khàn, mahaq Chuaq ùh tamàng bàu au.
14 Au ngan wì haq tìah ca bua au,
tìah ca oh daq au;
au mango cùp gàu hmoi ca wì haq tìah ca au
hmoi dèh ca miq jò haq cachìt.
15 Mahaq jò au tacro, wì tagop dabau wiang lem bùi,
jò wì tagop dabau tajêh ca au, au ùh loq;
wì chaq trong đòiq tajraq hlài ca au ùh loq hêq.
16 Tìah ca mangai ùh lùi Boc Plình, wì jù lê au,
cadrit hanenh tajraq hlài ca au.
17 Chuaq ôi! Ìh gòm hanhoi wì haq trùh jò leq?
Xìn dèch mahua yiang au claih ca 'bài mangai broq 'mèq ca au;
xìn dèch can rìh au jah claih enh lù baco hlari cô.
18 Au jah manè pôi Ìh ŏi tagop hadròih càn,
ta tagop mangai bàc jah padèch hiniq Ìh?
19 Xìn paq đòiq ca wì mangai ùh i
ca nen chaq trong ta'blêq ca au jah lem bùi,
wa wì mangai ùh i
can nen git ca au jah do.
20 Ma jah 'màng aih wì haq ùh capoch bàu catèm,
mahaq capoch bàu padô 'nùt,
tajraq hlài ca mangai rìh catèm ta crŏng taneh.
21 Wì padèch dađeh rai doi: “Ha! Ha!
'mat oq, mat nhèn khoi jah hnoq!”
22 Chuaq ôi, Ìh khoi hnoq ro bìac cô; xìn paq ŏi hatenh.
Chuaq ôi, xìn paq hangai ca au.
23 Chuaq ôi, rìu beq, yòng beq jùp đò au.
Waiq Chuaq, Ìh Boc Plình da au, xìn wiang ti au.
24 Waiq Chuaq, Ìh Boc Plình da au,
xìn hadrah au tiaq bìac ta-atoq da Ìh,
xìn paq am wì haq lem bùi taiq bìac au.
25 Xìn paq am wì hèm ta manoh doi: “Ha! Ha! Cô raq bìac nhèn enh.”
Hadai ùh am wì jah doi: “Nhèn khoi lŏn caq haq!”
26 Waiq xìn wì mangai ma lem bùi enh 'nhèq ca bìac ranàc da au,
jah camaih wa loh ca manhài.
Xìn wì mangai ma padèch dađeh tajraq hlài ca au jah camaih
wa 'bìq paha'neq.
27 Xìn wì mangai ma lem bùi enh 'nhèq ca bìac ta-atoq da au,
jah dêh bàu lem bùi.
Wì haq hloi jah dèch bàu manè pôi doi: “Waiq Chuaq dìq jaq càn caiq!
Haq bùi đòiq am bìac can padrŏng ca hapŏng Haq.”
28 Rapet au hloi jah anoi 'noh bìac ta-atoq da Chuaq
wa jah dèch bàu calêu manè Haq xèq ca hì.