50
Boc Plình Hadrah Mangai Ta-atoq wa Mangai Ngang Dù
Asap Achìh
1 Chuaq I Cwìang Itai, Haq raq Boc Plình, Haq raq Chuaq.
Haq creo dìq con mangai ŏi crŏng taneh,
enh mat mahì loh trùh mat mahì mùt.
2 Enh Jê-ru-sa-lem lem lình tôm gêh,
Boc Plình xreo 'noh can 'ngah.
3 Waiq xìn Boc Plình da nhèn lam trùh,
Haq ùh hatenh.
Enh ngìa ca Haq i ùnh cheo dêh,
wawenh ca Haq i cayeo bahùt càn.
4 Chuaq creo ca 'bài lòp plình ŏi ta plình ha'nhèq,
wa xam taneh ti 'neq, đòiq Haq hadrah jàn da Haq,
5 doi: “Tagop wì mangai hadròih ti Au,
aih wì mangai khoi broq wêh jao ca Au xam ngè tadreo.”
6 'Bài plình anoi 'noh bìac ta-atoq da Chuaq,
ma jah 'màng aih Boc Plình raq ma hadrah.
7 “Ôi jàn da Au, tamàng oq, cô Au anoi 'noh:
Ôi Is-ra-ên, Au jah anoi bàu tajraq hlài ca gè,
Au cô raq Boc Plình, Boc Plình da gè.
8 Au ùh lech ca gè taiq ngè tadreo gè,
ma jah 'màng aih ngè tadreo bùh da gè xôq hloi dèch am enh ngìa ca Au.
9 Au ùh nhet ca 'bo calô ta hnem gè,
loq bubi calô ta cadrong da gè.
10 Ma jah 'màng aih dìq ca ngè rôm aih da Au.
Dìq ca ngè aban ti go hadai.
11 Au canao loq dìq ca chìm ta rôm,
wa rìm ngè ŏi ta đùng aih dìq da Au.
12 Tàng Au pangot, Au ùh doi ca gè,
ma jah 'màng aih dìq ca crŏng taneh wa rìm bìac ŏi ta aih dìq da Au.
13 Au i caq jam 'bo calô loq
ôq mahem bubi calô ùh?
14 “Dèch am ngè tadreo ca Boc Plình xam bàu manè beq;
phai broq gêh bàu ma khoi pachac ca Chuaq ma Yi Ha'nhèq oq.
15 Ta hì glàm bìac 'mèq ranàc, dang creo ca Au beq,
Au jah dèch gè claih, èh gè jah padèch hiniq Au.”
16 Mahaq ca wì mangai ngang dù, Boc Plình doi:
“Gleq gè ma anoi 'noh ranenh Au?
Gleq gè ma anoi 'noh wêh jao ca Au toq xam hacùng bàu?
17 Ma jah 'màng aih gè git ca bìac pariaq baxa
wa cađac enh cloh bàu hnài da Au.
18 Jò hnoq mangai atùng, gè broq bua ca haq,
gè hadai mòiq manoh ca mangai tango anang.
19 Hacùng gè anoi 'noh bìac ngang dù,
rapet gè bình bàu padô 'nùt.
20 Gè capoch 'mèq dèh oh daq
wa jù lê con calô da miq gè.
21 Gè broq bìac cô, mahaq Au hatenh.
Gè xoh Au hadai tìah ca gè, mahaq
Au jah lech ca gè,
ta'mòq tôiq ca gè enh ngìa ca Au.
22 “ 'Màng aih, ôi mangai loq hèt ca Boc Plình,
phai hèm ta manoh bìac aih oq.
Tàng ùh èh, Au cô hich đac gè, ùh i mòiq ngai leq dèch gè.
23 Mangai leq dèch am ngè tadreo xam bàu manè pôi, padèch hiniq Au,
Au jah patô ca haq hnoq bìac dèch claih trùh enh Boc Plình.”