51
Bàu Waiq Khàn da Mangai Xìn Baxŏng Tôiq
Đawit Achìh
1 Boc Plình da au ôi, xìn Ìh xa-ŏch ca au,
tiaq can xa-ŏch xam manoh loq waq da Chuaq;
canòm ca manoh xa-ŏch bình halùih da Chuaq,
xìn Ìh baxŏng tôiq ca au.
2 Xìn 'nheo au hreo ca rìm bìac dù da au,
broq au jah hadròih hreo ca tôiq lôi da au.
3 Ma jah 'màng aih, au loq au khoi broq tôiq,
tôiq lôi da au hloi ŏi enh ngìa ca au.
4 Au khoi broq tôiq ca Ìh, toq Ìh raq hêq.
Au khoi broq bìac dù enh ngìa ca Ìh.
'Màng aih Ìh ta'mòq tôiq ca au, aih dìq jaq troq,
jò Ìh capoch wa jò Ìh hadrah, aih ta-atoq.
5 Joq 'màng aih, au khoi i tôiq jò bu xa-ông loh;
jò bu hadràp ta cliac dèh miq au khoi i tôiq.
6 Chuaq enh bìac lem jang ŏi enh dalam, wa ŏi ta nòi hlèp da manoh au;
waiq xìn Chuaq hnài au bìac khôn rabiaq.
7 Xìn Chuaq yŏc long cachiq xônh broq ca au jah hadròih,
hi khoi tôiq au jah baxŏng, au jah taboc yi hnao ca twiac.
8 Am au jah tamàng bìac lem bùi;
waiq xìn caxènh ma Chuaq khoi broq tagoh jah brêh.
9 Xìn Chuaq wìh đac mat enh tôiq lôi au
wa xùt đac rìm bìac ngang dù da au.
10 Boc Plình da au ôi, xìn Ìh broq ca au jah i mòiq manoh dìq jaq lem hreo,
wa broq neo hlài da au manoh yiang lem jang.
11 Xìn Chuaq paq cađac au khoi enh ngìa ca mat Ìh,
hadai xìn paq yŏc 'noh Yiang Hadròih da Ìh khoi ca au.
12 Xìn broq neo hlài da au bìac lem bùi ta can dèch claih Ìh.
Xìn am ca au manoh yiang loq enh dì tiaq.
13 Èh au jah hnài trong da Chuaq ca mangai ma broq tôiq,
wa wì mangai ma broq tôiq jah wìh hlài ta Ìh.
14 Boc Plình da au ôi, Ìh joq 'nàng Boc Plình dèch claih au.
Xìn Ìh dèch au jah claih ca tôiq broq ta-ùc mahem,
'màng aih rapet au jah dêh bàu padèch bìac ta-atoq da Ìh.
15 Waiq Chuaq, xìn pèh hacùng au,
èh rapet au jah calêu padèch hiniq Ìh.
16 Ma jah 'màng aih, Ìh ùh lem bùi ca ngè tadreo,
tàng ùh 'màng aih, au khoi dèch am.
Ngè tadreo bùh Ìh hadai ùh loq enh.
17 Ngè tadreo lem manoh Boc Plình,
aih loq cađac dèh manoh broq tôiq;
Boc Plình ùh khìn mangai i manoh padah
wa loq cađac dèh manoh broq tôiq.
18 Waiq xìn Chuaq broq lem ca Jê-ru-sa-lem tiaq manoh lem da Ìh.
Xìn broq hlài panàt phôq Jê-ru-sa-lem.
19 Jò aih Chuaq jah bùi lem ca ngè tadreo xam manoh am ta-atoq,
ngè tadreo dèch am wa ngè tadreo bùh.
Jò aih 'bo calô jah dèch ta ca'bŏng tadreo da Chuaq.