52
Mangai Broq Dù ma Padèch Dèh Manoh, aih Ùh Loh Cleq
Đawit Achìh
1 Ôi mangai tanuq, gleq ìh ma catèh bìac broq dù?
Can xa-ŏch xam manoh loq waq da Boc Plình i hloi hloi.
2 Ôi mangai i manoh padô 'nùt,
rapet gè bu dàng deo got xàc mùm,
toq enh broq bìac raliang đac.
3 Gè loq enh bìac dù, yi hnao ca bìac lem,
enh padô 'nùt yi hnao capoch bàu lem jang.
4 Ôi rapet padô 'nùt,
gè toq loq enh ca bàu 'mèq 'mac.
5 Mahaq Boc Plình èh jêh đac gè hloi hloi;
Haq rùp gè, hwenh gè loh khoi dèh ca nòi traiq,
wa bùiq gè loh khoi ca nòi taneh gè 'nang rìh ŏi.
6 Mahaq mangai ta-atoq jah hnoq bìac aih,
èh yùq crè wa do ca haq, doi:
7 “Cô! Mangai
ùh canòm ca Boc Plình đòiq broq pagia lì ca dađeh,
mahaq canòm dèh ca bìac padrŏng can,
'màng aih haq broq cajap tam dèh ca bìac ngan dù cla.”
8 Mahaq au cô tìah ca long ôliu xenh
lem ta hnem da Boc Plình;
au hloi hloi lùi canòm
ca can xa-ŏch xam manoh loq waq da Boc Plình.
9 Au hloi hloi manè apôi Chuaq,
taiq rìm bìac Ìh khoi broq ca au.
Au gòm ngèh ca hiniq Ìh,
taiq hiniq Ìh lem lình enh ngìa ca mangai hadròih da Ìh.